പശ്ചിമേഷ്യയിൽ യുദ്ധം കൊടുമ്പിരിക്കൊള്ളവെ ലബനനിൽ ഇസ്രയേൽ നടത്തുന്ന കടന്നാക്രമണങ്ങളിൽ കടുത്ത ആശങ്കയറിയിച്ച് ഇന്ത്യ. കഴിഞ്ഞ ഒരു മാസമായി തുടരുന്ന വ്യോമാക്രമണങ്ങളിലും കരയുദ്ധത്തിലും ലബനനിൽ സിവിലിയന്മാർ കൂട്ടക്കൊല ചെയ്യപ്പെടുന്ന സാഹചര്യം ‘അത്യന്തം അസ്വസ്ഥതയുണ്ടാക്കുന്നതാണെന്ന്’ വിദേശകാര്യ മന്ത്രാലയം വ്യക്തമാക്കി. ബുധനാഴ്ച മാത്രം നടന്ന അതിശക്തമായ ബോംബിംഗിൽ 303 പേർ കൊല്ലപ്പെട്ടത് അന്താരാഷ്ട്ര തലത്തിൽ വൻ പ്രതിഷേധത്തിന് കാരണമായിരുന്നു. ഇതോടെയാണ് മേഖലയിൽ സമാധാനം പുനഃസ്ഥാപിക്കണമെന്ന കർശന നിലപാടുമായി ഇന്ത്യ രംഗത്തെത്തിയത്. ഐക്യരാഷ്ട്രസഭയുടെ സമാധാന സേനയുടെ (UNIFIL) ഭാഗമായി ഇന്ത്യൻ സൈനികർ ലബനനിൽ നിലയുറപ്പിച്ചിട്ടുള്ള സാഹചര്യത്തിൽ നിലവിലെ സംഭവവികാസങ്ങളെ ഇന്ത്യ അതീവ ഗൗരവത്തോടെയാണ് കാണുന്നത്.
രാജ്യാന്തര നിയമങ്ങൾ പാലിക്കണമെന്നും രാജ്യങ്ങളുടെ പരമാധികാരത്തെ ബഹുമാനിക്കണമെന്നും വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വാർത്താ സമ്മേളനത്തിൽ പറഞ്ഞു. ഇസ്രയേലിന്റെ പേര് നേരിട്ട് പരാമർശിച്ചില്ലെങ്കിലും, ലബനനിലെ കൂട്ടക്കുരുതിയെ അപലപിച്ചതിലൂടെ ഇസ്രയേൽ നീക്കങ്ങളോടുള്ള അതൃപ്തി ഇന്ത്യ വ്യക്തമാക്കി. ഹിസ്ബുള്ളയുമായുള്ള പോരാട്ടത്തിന്റെ പേരിൽ സിവിലിയന്മാരെ ലക്ഷ്യമിടുന്നത് അംഗീകരിക്കാനാവില്ലെന്ന സന്ദേശമാണ് ഇന്ത്യ നൽകുന്നത്. കഴിഞ്ഞ ഒരു മാസത്തിനിടെ ലബനനിൽ 1,800-ഓളം പേർ കൊല്ലപ്പെടുകയും 5,000-ത്തിലധികം പേർക്ക് പരിക്കേൽക്കുകയും ചെയ്തിട്ടുണ്ട്. ലബനനിലുള്ള ആയിരത്തോളം വരുന്ന ഇന്ത്യൻ പൗരന്മാരുടെ സുരക്ഷ ഉറപ്പാക്കാൻ ബെയ്റൂട്ടിലെ ഇന്ത്യൻ എംബസി നിരന്തരം ബന്ധപ്പെട്ടുവരികയാണെന്നും വിദേശകാര്യ മന്ത്രാലയം അറിയിച്ചു. അമേരിക്കയും ഇറാനും തമ്മിലുള്ള സമാധാന ശ്രമങ്ങളെപ്പോലും അട്ടിമറിക്കുന്ന തരത്തിലാണ് നിലവിലെ ആക്രമണങ്ങൾ തുടരുന്നത്.
