മുംബൈ : ഇന്ത്യൻ സംഗീത ലോകത്തെ ഇതിഹാസ ഗായികമാരിൽ ഒരാളായ ആശാ ഭോസ്ലെയെ ഹൃദയാഘാതത്തെ തുടർന്ന് ആശുപത്രിയിൽ പ്രവേശിപ്പിച്ചു. മുംബൈയിലെ ബ്രീച്ച് കാൻഡി ആശുപത്രിയിലെ തീവ്ര പരിചരണ വിഭാഗത്തിലാണ് ആശാ ഭോസ്ലെയെ പ്രവേശിപ്പിച്ചിരിക്കുന്നത്. 92 വയസ്സുകാരിയായ ഗായികക്ക് ശനിയാഴ്ച വൈകുന്നേരം ആണ് ഹൃദയാഘാതം ഉണ്ടായത്.
ശനിയാഴ്ച വൈകുന്നേരത്തോടെ താരത്തിന് ശാരീരിക അസ്വസ്ഥതകൾ അനുഭവപ്പെടുകയായിരുന്നു. ഉടൻ തന്നെ ബന്ധുക്കൾ ചേർന്ന് ആശുപത്രിയിൽ എത്തിച്ചു. പ്രാഥമിക പരിശോധനയിൽ ഹൃദയാഘാതമാണെന്ന് സ്ഥിരീകരിച്ചതോടെ തീവ്രപരിചരണ വിഭാഗത്തിലേക്ക് മാറ്റി. ഹോസ്പിറ്റലിലെ എമർജൻസി മെഡിക്കൽ സർവീസസ് ചികിത്സകൾ തുടരുകയാണ്. നില ‘ഗുരുതരമായി തുടരുന്നു’ എന്നാണ് അനൗദ്യോഗിക റിപ്പോർട്ടുകൾ സൂചിപ്പിക്കുന്നത്. പ്രശസ്ത കാർഡിയോളജിസ്റ്റുകളുടെ നേതൃത്വത്തിലുള്ള പ്രത്യേക സംഘമാണ് ചികിത്സയ്ക്ക് മേൽനോട്ടം വഹിക്കുന്നത്.
