ക്രിക്കറ്റ് ആരാധകർക്കിടയിൽ കാലങ്ങളായി നിലനിൽക്കുന്ന ഒരു സംശയമാണ് പാണ്ഡ്യ സഹോദരന്മാർ തമ്മിൽ അത്ര നല്ല ബന്ധത്തിലല്ല എന്നത്. ഐപിഎൽ 2026 സീസണിൽ മുംബൈ ഇന്ത്യൻസും ആർസിബിയും ഏറ്റുമുട്ടിയപ്പോൾ ഹാർദിക്കിനെതിരെ ക്രുണാൽ പാണ്ഡ്യ. പന്ത് എറിയുന്ന ദൃശ്യങ്ങൾ ഈ അഭ്യൂഹങ്ങൾക്ക് വീണ്ടും ആക്കം കൂട്ടിയിരുന്നു. എന്നാൽ, ഈ ‘പിണക്ക’ വാർത്തകളോട് രസകരമായി പ്രതികരിക്കുകയാണ് ക്രുണാൽ പാണ്ഡ്യ.
ആർസിബി പോഡ്കാസ്റ്റിൽ അവതാരകൻ ഡാനിഷ് സേത്ത് “നിങ്ങൾ തമ്മിൽ എല്ലാം ഓക്കെയാണോ അതോ വല്ല അടിയും നടന്നോ?” എന്ന് ചോദിച്ചപ്പോൾ ക്രുണാൽ പൊട്ടിച്ചിരിക്കുകയായിരുന്നു. “കെയിനും അണ്ടർടേക്കറും തമ്മിൽ പോലും ഇടയ്ക്ക് അടികൂടാറുണ്ട്” എന്ന ഡാനിഷിന്റെ തമാശ കേട്ട് ചിരിച്ച ക്രുണാൽ , തങ്ങൾക്കിടയിൽ ഒരു പ്രശ്നവുമില്ലെന്നും എല്ലാം സുഗമമായി പോകുന്നുവെന്നും (“All ok”) വ്യക്തമാക്കി.
ലഖ്നൗ സൂപ്പർ ജയന്റ്സിന്റെ യുവതാരം മുകുൾ ചൗധരിയെ കളിക്കളത്തിൽ അധിക്ഷേപിച്ചു (Sledging) എന്ന ആരോപണത്തിനും കൃണാൽ മറുപടി നൽകി. “ഞാൻ അവനെ സ്ലെഡ്ജ് ചെയ്തതല്ല. ആദ്യ പന്തിൽ അവൻ ഒരു പാഡിൽ ഷോട്ട് കളിച്ചു. അപ്പോൾ ഞാൻ അവനോട് പറഞ്ഞു, ‘മുകുൾ, നീ ഒരു ചെറുപ്പക്കാരനാണ്, നിനക്ക് ലോംഗ് ഓണിനും ലോംഗ് ഓഫിനും മുകളിലൂടെ സിക്സർ അടിക്കാനുള്ള കരുത്തുണ്ട്, അവിടെ അടിക്കാൻ നോക്ക്’ എന്ന്. ഞങ്ങൾ രണ്ടുപേരും അത് കേട്ട് ചിരിക്കുകയായിരുന്നു. എന്റെ ഹെയർ സ്റ്റൈൽ കണ്ടിട്ട് ഞാൻ ഭയങ്കര ഗൗരവക്കാരനും ദേഷ്യക്കാരനും ആണെന്ന് ആളുകൾക്ക് തോന്നുന്നതാണ്,” ക്രുണാൽ വിശദീകരിച്ചു.
ഈ സീസണിൽ ആർസിബിയുടെ പ്രധാന താരങ്ങളിൽ ഒരാളാണ് കൃണാൽ. തന്റെ ബൗളിംഗിൽ പുതിയ പരീക്ഷണങ്ങൾ ഉൾപ്പെടുത്തി കൂടുതൽ അപകടകാരിയായി ക്രുണാൽ മാറിയിട്ടുണ്ട്. മികച്ച പ്രകടനത്തിലൂടെ ഇന്ത്യൻ ദേശീയ ടീമിലേക്ക് വീണ്ടും തിരഞ്ഞെടുക്കപ്പെടുമെന്ന പ്രതീക്ഷയിലാണ് താരം.
