പത്തനംതിട്ട : ശബരിമല ക്ഷേത്രത്തിനു മുകളിലൂടെ ഹെലികോപ്റ്റർ താഴ്ന്നു പറന്നത് ആശങ്ക സൃഷ്ടിച്ച സംഭവത്തിൽ പുതിയ വഴിത്തിരിവ്. കോസ്റ്റ് ഗാർഡ് ഹെലികോപ്റ്റർ ആണ് ശബരിമല ക്ഷേത്രത്തിനു മുകളിലൂടെ പറന്നതെന്ന് വ്യക്തമായി. ഇന്ത്യൻ കോസ്റ്റ് ഗാർഡിന്റെ ‘ചേതക്’ ഹെലികോപ്റ്റർ ആണ് ക്ഷേത്രത്തിനു മുകളിലൂടെ താഴ്ന്നു പറന്നത്. ആകാശത്ത് മേഘാവൃതമായ അന്തരീക്ഷമായതിനാൽ പൈലറ്റിന് കാഴ്ച തടസ്സപ്പെട്ടതാണ് ഹെലികോപ്റ്റർ താഴ്ന്നു പറക്കാൻ കാരണമായത് എന്നാണ് കോസ്റ്റ് ഗാർഡ് വ്യക്തമാക്കുന്നത്.
ലക്ഷ്യസ്ഥാനത്തേക്ക് പോകുന്നതിനിടെ ദിശ മാറി സന്നിധാനത്തിന് മുകളിലെത്തുകയായിരുന്നു എന്ന് ഇന്ത്യൻ കോസ്റ്റ് ഗാർഡ് വിശദീകരിച്ചു. കാഴ്ച വ്യക്തമാകുന്നതിനും ലാൻഡിംഗ് സാധ്യതകൾ പരിശോധിക്കുന്നതിനുമായി താഴ്ന്നു പറന്നതാണെന്നും മറ്റ് സുരക്ഷാ പ്രശ്നങ്ങൾ ഇല്ലെന്നും അധികൃതർ അറിയിച്ചു.
