ആം ആദ്മി പാർട്ടി നേതൃത്വവുമായി ദീർഘനാളായി നിലനിന്നിരുന്ന തർക്കത്തിനൊടുവിൽ രാഘവ് ചദ്ദ പാർട്ടി വിട്ടു. ഇന്ന് നടന്ന വാർത്താ സമ്മേളനത്തിൽ സന്ദീപ് പഥക്, അശോക് മിത്തൽ എന്നിവരുൾപ്പെടെയുള്ള ആറ് രാജ്യസഭാ എം.പിമാരും തങ്ങൾ ബിജെപിയിൽ ചേരുന്നതായി ഔദ്യോഗികമായി പ്രഖ്യാപിച്ചു. രാജ്യസഭയിലെ എഎപിയുടെ രണ്ട് ശതമാനം അംഗങ്ങളും ബിജെപിയിൽ ലയിക്കുന്നതോടെ കൂറുമാറ്റ നിരോധന നിയമത്തിലെ സാങ്കേതികതകളെ മറികടക്കാനാണ് ഇവരുടെ നീക്കം.
പതിനഞ്ച് വർഷക്കാലം തന്റെ രക്തവും വിയർപ്പും ഒഴുക്കി വളർത്തിയ പാർട്ടി ഇപ്പോൾ തത്വങ്ങളിൽ നിന്നും മൂല്യങ്ങളിൽ നിന്നും വ്യതിചലിച്ചുവെന്ന് രാഘവ് ചദ്ദ കുറ്റപ്പെടുത്തി. രാജ്യസഭയിലെ എഎപി നേതാവ് എന്ന സ്ഥാനത്ത് നിന്ന് ചദ്ദയെ മാറ്റിയത് മുതൽ പാർട്ടി നേതൃത്വവുമായി അദ്ദേഹം കടുത്ത പോരാട്ടത്തിലായിരുന്നു. പ്രധാനമന്ത്രി നരേന്ദ്ര മോദിയുടെ നേതൃത്വത്തെ പുകഴ്ത്തിയ ചദ്ദ, ഭീകരവാദത്തെ തുടച്ചുനീക്കുന്നതിനും രാജ്യത്തെ സാമ്പത്തികമായി വളർത്തുന്നതിനും മോദി സർക്കാർ എടുത്ത ശക്തമായ തീരുമാനങ്ങളെ പിന്തുണച്ചു. അമിത് ഷായുടെ ദൃഢനിശ്ചയത്തിനൊപ്പം ചേർന്ന് രാജ്യത്തിനായി പ്രവർത്തിക്കുമെന്നും അദ്ദേഹം കൂട്ടിച്ചേർത്തു.
ആം ആദ്മി പാർട്ടിയെ അടിമുടി ഉലച്ചുകൊണ്ട് രാജ്യസഭയിൽ നിന്ന് ബിജെപിയിലേക്ക് ചേക്കേറിയ ഏഴ് പ്രമുഖ എം.പിമാരുടെ പട്ടികയിൽ രാഘവ് ചദ്ദയാണ് നേതൃത്വം നൽകുന്നത്. രാഘവ് ചദ്ദയ്ക്കൊപ്പം മുൻ ക്രിക്കറ്റ് താരം ഹർഭജൻ സിംഗ്, ഡൽഹി വനിതാ കമ്മീഷൻ മുൻ അധ്യക്ഷ സ്വാതി മലിവാൾ എന്നിവരുടെ സാന്നിധ്യം രാഷ്ട്രീയ ലോകത്തെ ഞെട്ടിച്ചു. ഇവർക്ക് പുറമെ പാർട്ടിയുടെ സംഘടനാ ചുമതലയുണ്ടായിരുന്ന സന്ദീപ് പഥക്, പ്രമുഖ വിദ്യാഭ്യാസ പ്രവർത്തകൻ അശോക് മിത്തൽ, രാഷ്ട്രീയ രംഗത്തെ ശ്രദ്ധേയ മുഖങ്ങളായ രാജീന്ദർ ഗുപ്ത, വിക്രം സാഹ്നി എന്നിവരും എഎപി വിട്ട് കാവിയണിഞ്ഞു. പാർട്ടിയുടെ രാജ്യസഭാ അംഗങ്ങളിൽ മൂന്നിൽ രണ്ട് വിഭാഗവും ഇത്തരത്തിൽ ബിജെപിയിൽ ലയിക്കാൻ തീരുമാനിച്ചത് അരവിന്ദ് കെജ്രിവാളിനും ആം ആദ്മി പാർട്ടിക്കും ദേശീയ തലത്തിൽ വൻ തിരിച്ചടിയായിരിക്കുകയാണ്.
പാർട്ടി തന്നെ നിശബ്ദനാക്കാൻ ശ്രമിച്ചുവെന്നും എന്നാൽ ഇനി സാധാരണക്കാരുടെ പ്രശ്നങ്ങൾ കൂടുതൽ ഊർജ്ജസ്വലമായി രാജ്യസഭയിൽ ഉന്നയിക്കുമെന്നും രാഘവ് ചദ്ദ ജനങ്ങൾക്ക് ഉറപ്പ് നൽകി. “ഞാൻ ശരിയായ മനുഷ്യനാണ്, പക്ഷെ ഇത്രകാലം പ്രവർത്തിച്ചത് തെറ്റായ പാർട്ടിയിലായിരുന്നു” എന്ന വികാരനിർഭരമായ പരാമർശവും അദ്ദേഹം നടത്തി.
