നാളെയൊരു പക്ഷേ മൂന്നാം ലോകമഹായുദ്ധം ആരംഭിക്കുകയാണെങ്കിൽ, ലോകമെമ്പാടും അതിന്റെ പ്രത്യാഘാതങ്ങൾ ഒരേപോലെ ആയിരിക്കില്ല. ഭൂമിശാസ്ത്രപരമായ സ്ഥാനം, സൈനിക സഖ്യങ്ങൾ, ആണവായുധങ്ങൾ, സൈനിക താവളങ്ങൾ, അതിർത്തി തർക്കങ്ങൾ എന്നിവ കാരണം ചില രാജ്യങ്ങൾ വലിയ അപകടത്തിലാകും.
തീർച്ചയായും യുദ്ധം നടക്കുമെന്നോ, ഈ രാജ്യങ്ങൾ തകർന്നടിയുമെന്നോ ഇതിനർത്ഥമില്ല. ഇതൊരു സാങ്കൽപ്പിക വിലയിരുത്തൽ മാത്രമാണ്. എങ്കിലും ഒരു ആഗോള യുദ്ധമുണ്ടായാൽ ശത്രുരാജ്യങ്ങളുടെ സാമീപ്യവും, തന്ത്രപ്രധാനമായ സ്ഥാനവും, ആണവശക്തികളുടെ സാന്നിധ്യവും കാരണം താഴെ പറയുന്ന 5 രാജ്യങ്ങളാകും ഏറ്റവും വലിയ ഭീഷണി നേരിടുക.
1. അമേരിക്ക – മൂന്നാം ലോകമഹായുദ്ധമുണ്ടായാൽ ഏറ്റവും വലിയ ലക്ഷ്യം അമേരിക്കയായിരിക്കും. സമുദ്രങ്ങളാൽ ചുറ്റപ്പെട്ട സുരക്ഷിതമായ രാജ്യമാണെങ്കിലും, ലോകത്തിലെ ഏറ്റവും വലിയ സൈനിക ശക്തിയായതിനാൽ ശത്രുക്കളുടെ പ്രധാന നോട്ടപ്പുള്ളി അമേരിക്ക തന്നെയാകും. അമേരിക്കയുടെ ആഗോള സൈനിക ശൃംഖലയെയും സാങ്കേതികവിദ്യകളെയും തകർക്കാനാകും എതിരാളികൾ ആദ്യം ശ്രമിക്കുക. സൈനിക താവളങ്ങൾ, കമാൻഡ് സിസ്റ്റങ്ങൾ, ഉപഗ്രഹങ്ങൾ, സൈബർ നെറ്റ്വർക്കുകൾ, പ്രധാന നഗരങ്ങൾ എന്നിവ ആഗോള യുദ്ധത്തിൽ വലിയ ഭീഷണി നേരിടും.
2. റഷ്യ – യുദ്ധമുണ്ടായാൽ അതിലെ പ്രധാന പോരാളികളിൽ ഒന്നായിരിക്കും റഷ്യ. ലോകത്തിലെ ഏറ്റവും വലിയ ആണവശക്തികളിൽ ഒന്നായ റഷ്യയ്ക്ക് പല കോണുകളിൽ നിന്നും ആക്രമണം നേരിടേണ്ടി വരും. നാറ്റോയുടെ കിഴക്കൻ അതിർത്തിയിലുള്ള ആക്രമണങ്ങൾ, സൈനിക കേന്ദ്രങ്ങൾ ലക്ഷ്യമിട്ടുള്ള ദീർഘദൂര മിസൈലുകൾ, സൈബർ ആക്രമണങ്ങൾ, സാമ്പത്തിക ഉപരോധങ്ങൾ എന്നിവ റഷ്യയെ വലിയ അപകടത്തിലാക്കും. റഷ്യൻ കമാൻഡ് സെന്ററുകളും ആണവ കേന്ദ്രങ്ങളും ലക്ഷ്യമിട്ടുള്ള ആക്രമണങ്ങൾ രാജ്യത്ത് വലിയ നാശനഷ്ടങ്ങൾ സൃഷ്ടിക്കും.
3. തായ്വാൻ – അമേരിക്കയും ചൈനയും തമ്മിലുള്ള പോരാട്ടത്തിന്റെ പ്രധാന പ്രഭവകേന്ദ്രമാണ് തായ്വാൻ. തായ്വാൻ തങ്ങളുടെ ഭാഗമാണെന്ന് ചൈന അവകാശപ്പെടുമ്പോൾ, തായ്വാന് പ്രധാനമായും പ്രതിരോധ സഹായം നൽകുന്നത് അമേരിക്കയാണ്. ഒരു ലോകമഹായുദ്ധം പൊട്ടിപ്പുറപ്പെട്ടാൽ അമേരിക്കയും ചൈനയും തമ്മിലുള്ള പ്രധാന യുദ്ധഭൂമിയായി തായ്വാൻ മാറും. ചൈനയുടെ മിസൈലുകൾക്കും ഡ്രോണുകൾക്കും പെട്ടെന്ന് ആക്രമിക്കാൻ കഴിയുന്ന ദൂരത്തിലാണ് ഈ രാജ്യം സ്ഥിതി ചെയ്യുന്നത്.
4 . പോളണ്ട് – നാറ്റോയുടെ കിഴക്കൻ അതിർത്തിയിൽ, റഷ്യയുടെയും ബെലാറസിന്റെയും സൈനിക സ്വാധീന മേഖലകൾക്ക് സമീപം സ്ഥിതി ചെയ്യുന്ന പോളണ്ട് യൂറോപ്പിലെ ഏറ്റവും അപകടകരമായ രാജ്യങ്ങളിലൊന്നാകും. പോളണ്ടിനും ലിത്വാനിയയ്ക്കും ഇടയിലുള്ള ഇടുങ്ങിയ ഇടനാഴിയായ ‘സുവൽകി ഗ്യാപ്പ് നാറ്റോയുടെ ഏറ്റവും ദുർബലമായ പോയിന്റുകളിലൊന്നായാണ് കണക്കാക്കപ്പെടുന്നത്. ഒരു യുദ്ധമുണ്ടായാൽ സൈനിക വിന്യാസത്തിനും ലോജിസ്റ്റിക്സിനുമുള്ള പ്രധാന പാതയായി പോളണ്ട് മാറുമെന്നതിനാൽ ഇവിടം ഒരു നിർണായക ലക്ഷ്യമായി മാറും.
5. ദക്ഷിണ കൊറിയ – മൂന്നാം ലോകമഹായുദ്ധത്തിൽ ജീവിക്കാൻ ഏറ്റവും അപകടകരമായ സ്ഥലങ്ങളിൽ ഒന്നായിരിക്കും ദക്ഷിണ കൊറിയ. കാരണം ലോകത്തിലെ ഏറ്റവും വലിയ സൈനികവൽക്കരിക്കപ്പെട്ടതും, പ്രവചനാതീതവുമായ രാജ്യങ്ങളിലൊന്നായ ഉത്തര കൊറിയയുടെ തൊട്ടടുത്താണ് ഈ രാജ്യം സ്ഥിതി ചെയ്യുന്നത്. ഔദ്യോഗികമായി യുദ്ധം അവസാനിച്ചിട്ടില്ലാത്ത അതിർത്തിയാണ് ഇരു രാജ്യങ്ങൾക്കുമിടയിലുള്ളത്. 2026-ലും ഉത്തരകൊറിയ മിസൈൽ പരീക്ഷണങ്ങൾ തുടരുകയാണ്.
ഈ അഞ്ച് രാജ്യങ്ങൾക്ക് പുറമെ, നിലവിൽ റഷ്യയുമായി യുദ്ധം ചെയ്യുന്ന യുക്രെയ്നും, പസഫിക് മേഖലയിലെ പ്രശ്നങ്ങൾ കാരണം ജപ്പാനും കടുത്ത ഭീഷണി നേരിടും. നാറ്റോയുടെ അതിർത്തിയിലുള്ള ബാൾട്ടിക് രാജ്യങ്ങൾ നാറ്റോ ലോജിസ്റ്റിക്സിന്റെ കേന്ദ്രമായ ജർമ്മനി, അതുപോലെ മിഡിൽ ഈസ്റ്റിൽ യുദ്ധമുണ്ടായാൽ ഇസ്രായേൽ, ഇറാൻ എന്നീ രാജ്യങ്ങളും അതീവ അപകടത്തിലാകും. ചുരുക്കത്തിൽ, ഏറ്റവും വലിയ സൈന്യമുള്ള രാജ്യങ്ങളല്ല ലോകമഹായുദ്ധത്തിൽ ഏറ്റവും അപകടത്തിലാകുന്നത്, മറിച്ച് തന്ത്രപ്രധാനമായ ഭൂമിശാസ്ത്രപരമായ സ്ഥാനമുള്ള രാജ്യങ്ങളായിരിക്കും.
