ഐപിഎൽ 2026 സീസണിൽ ചെന്നൈ സൂപ്പർ കിംഗ്സിനായി വെടിക്കെട്ട് ബാറ്റിംഗ് കാഴ്ചവെക്കുന്ന മലയാളി താരം സഞ്ജു സാംസൺ കളത്തിന് പുറത്തും ആരാധകരുടെ മനം കവരുകയാണ്. ഇപ്പോഴിതാ സിഎസ്കെ പുറത്തുവിട്ട സഞ്ജുവിന്റെ മറ്റൊരു രസകരമായ വീഡിയോ കൂടി സമൂഹമാധ്യമങ്ങളിൽ തരംഗമാകുന്നു. ചെന്നൈ സൂപ്പർ കിങ്സിന്റെ ഔദ്യോഗിക യൂട്യൂബ് ചാനലിലൂടെയാണ് ഈ പുതിയ വീഡിയോ പുറത്തുവന്നിരിക്കുന്നത്.
ചെന്നൈ സൂപ്പർ കിംഗ്സ് താരങ്ങൾക്കായി സംഘടിപ്പിച്ച ‘സൂപ്പർ ലോക്കൽ ചലഞ്ച്’എന്ന രസകരമായ ഗെയിമിലാണ് സഞ്ജു ഇത്തവണ പങ്കെടുത്തത്. കുട്ടിക്കാലത്ത് നമ്മളൊക്കെ കളിച്ചിരുന്ന തനി നാടൻ കളിയായ ‘പമ്പരം കറക്കൽ’ ആയിരുന്നു താരങ്ങൾക്കുള്ള ടാസ്ക്. സിഎസ്കെയിലെ താരങ്ങളെല്ലാം ഈ പമ്പരം കറക്കാൻ ശ്രമിക്കുന്നതും, അതിനിടയിൽ നടക്കുന്ന രസകരമായ നിമിഷങ്ങളുമാണ് വീഡിയോയിലുള്ളത്.
പമ്പരം കയ്യിൽ കിട്ടിയതോടെ സഞ്ജു ആവേശത്തിലായി. കുട്ടിക്കാലത്തെ ഓർമ്മകൾ പുതുക്കിക്കൊണ്ട് വളരെ അനായാസം പമ്പരം കറക്കാൻ ശ്രമിച്ച സഞ്ജു, താനൊരു “പമ്പരം ചാമ്പ്യനാണെന്ന്”അവകാശപ്പെടുന്നതും വീഡിയോയിൽ കാണാം. താരങ്ങളുടെ ചിരിയും ബഹളവുമൊക്കെയായി വളരെ എന്റർടെയ്നിങ് ആയ ഒരു വീഡിയോയാണിത്. സഞ്ജു മനോഹരമായി പമ്പരം കറക്കൽ നടത്തുന്നതും വീഡിയോയിൽ കാണാം.
കഴിഞ്ഞ ദിവസം സിഎസ്കെ വേദിയിൽ വെച്ച് സഞ്ജു പൂച്ചക്കരച്ചിൽ അനുകരിച്ച വീഡിയോ വൈറലായതിന് പിന്നാലെയാണ് ഇപ്പോൾ പമ്പരം കറക്കുന്ന വീഡിയോയും ആരാധകർ ഏറ്റെടുത്തിരിക്കുന്നത്. ബാറ്റിംഗിലെ ഫോമിനൊപ്പം, ക്യാമ്പിനുള്ളിലെ ഇത്തരം രസകരമായ ഇടപെടലുകളിലൂടെയും സഞ്ജു സിഎസ്കെയുടെയും ‘വിസിൽ പോട്’ ആരാധകരുടെയും പ്രിയങ്കരനായി മാറിക്കഴിഞ്ഞു.
