ഭാരതത്തിന്റെ സാമ്പത്തിക ചരിത്രത്തിലെ ഏറ്റവും വേദനിപ്പിക്കുന്നതും എന്നാൽ വിപ്ലവകരവുമായ ആ അധ്യായം ഒരിക്കൽ കൂടി ചർച്ചയാകുന്നു. 1991-ൽ രാജ്യം കടുത്ത സാമ്പത്തിക പ്രതിസന്ധിയിൽ ഉഴലവേ, പരമാധികാര വീഴ്ച (Sovereign Default) ഒഴിവാക്കാൻ ഭാരതത്തിന്റെ പക്കലുണ്ടായിരുന്ന 47,000 കിലോ ഗ്രാം സ്വർണം രഹസ്യമായി വിദേശത്തേക്ക് വിമാനമാർഗ്ഗം കടത്തിയ ആ ‘സീക്രട്ട് ഓപ്പറേഷൻ’ ഇന്നും ഓരോ ഇന്ത്യക്കാരന്റെയും ഉള്ളിൽ കനലായി അവശേഷിക്കുന്നു. വെറും ഒരാഴ്ചത്തെ ഇറക്കുമതിക്ക് മാത്രമുള്ള വിദേശനാണ്യം ബാക്കിയുണ്ടായിരുന്ന കാലത്ത്, രാജ്യത്തിന്റെ മാനം കാക്കാൻ സ്വർണം ലണ്ടനിലെ ബാങ്ക് ഓഫ് ഇംഗ്ലണ്ടിൽ പണയപ്പെടുത്തിയ ആ നടപടി അന്ന് വലിയ വിവാദങ്ങൾക്കാണ് വഴിവെച്ചത്.
1991 ജൂലൈ മാസത്തിലായിരുന്നു ലോകത്തെ ഞെട്ടിച്ച ആ സംഭവം. മുംബൈ എയർപോർട്ടിലെ ടാർമാക്കിലൂടെ വലിയ ട്രങ്കുകളിൽ സ്വർണം കാർഗോ വിമാനത്തിലേക്ക് മാറ്റുന്ന ദൃശ്യങ്ങൾ പുറത്തുവന്നപ്പോഴാണ് കേന്ദ്ര സർക്കാർ രാജ്യം നേരിടുന്ന അതീവ ഗുരുതരമായ സാമ്പത്തിക തകർച്ചയുടെ ആഴം വെളിപ്പെടുത്തിയത്. ചന്ദ്രശേഖർ സർക്കാരിന്റെ കാലത്ത് തുടങ്ങിയ നീക്കങ്ങൾ പി.വി. നരസിംഹ റാവു പ്രധാനമന്ത്രിയായ ശേഷമാണ് പൂർത്തിയാക്കിയത്. റിസർവ് ബാങ്ക് ഗവർണർ എസ്. വെങ്കിട്ടരമണന്റെ നേതൃത്വത്തിൽ നടന്ന ഈ ദൗത്യത്തിലൂടെ 405 മില്യൺ ഡോളറാണ് ഇന്ത്യ അടിയന്തര വായ്പയായി സ്വീകരിച്ചത്. ഭാരതീയർക്ക് സ്വർണം എന്നത് വെറും ലോഹമല്ല, മറിച്ച് അത് കുടുംബത്തിന്റെ ഐശ്വര്യവും സുരക്ഷയുമാണ്. അതുകൊണ്ടുതന്നെ രാജ്യത്തിന്റെ കരുതൽ ധനം പണയപ്പെടുത്തുന്നത് അന്ന് വലിയ ദേശീയ അപമാനമായിട്ടാണ് വിലയിരുത്തപ്പെട്ടത്.
എന്നാൽ ഇന്ന് കാലം മാറി. 1991-ൽ 47 ടൺ സ്വർണം പണയപ്പെടുത്തേണ്ടി വന്ന ഭാരതം, 2026 മാർച്ചിലെ കണക്കനുസരിച്ച് 880.5 ടൺ സ്വർണമാണ് സ്വന്തം കരുതലായി സൂക്ഷിച്ചിരിക്കുന്നത്. ഇതിൽ ഏറിയ പങ്കും ഇപ്പോൾ ഭാരതത്തിന്റെ മണ്ണിൽ തന്നെയാണ് സൂക്ഷിച്ചിരിക്കുന്നത് എന്നത് നമ്മുടെ സാമ്പത്തിക ശക്തിയുടെ തെളിവാണ്. പശ്ചിമേഷ്യയിൽ യുദ്ധം കൊടുമ്പിരിക്കൊള്ളുന്ന ഈ വേളയിൽ, വിദേശനാണ്യം ലാഭിക്കാനായി അനാവശ്യമായ സ്വർണ്ണാഭരണ വാങ്ങലുകൾ ഒഴിവാക്കാൻ പ്രധാനമന്ത്രി നരേന്ദ്ര മോദി നടത്തിയ ആഹ്വാനം ഇതോടൊപ്പം ചേർത്തുവായിക്കേണ്ടതാണ്. 1991-ലെ ഗൾഫ് യുദ്ധം ഇന്ത്യയെ തളർത്തിയെങ്കിൽ, ഇന്നത്തെ ആഗോള സംഘർഷങ്ങളെ നേരിടാൻ ഭാരതം സജ്ജമാണെന്നും എന്നാൽ കരുതൽ അനിവാര്യമാണെന്നും പ്രധാനമന്ത്രി ഓർമ്മിപ്പിക്കുന്നു.
1960-കളിൽ മൊറാർജി ദേശായി സ്വർണ്ണ ഇറക്കുമതി നിയന്ത്രിക്കാൻ കൊണ്ടുവന്ന നിയമങ്ങൾ മുതൽ 1991-ലെ ആ കപ്പൽയാത്ര വരെ ഇന്ത്യയുടെ സാമ്പത്തിക സുരക്ഷ സ്വർണവുമായി ബന്ധപ്പെട്ടുകിടക്കുന്നു. 2025-26 കാലയളവിൽ മാത്രം 72 ബില്യൺ ഡോളറിന്റെ സ്വർണമാണ് ഇന്ത്യ ഇറക്കുമതി ചെയ്തത്. അതായത് 1991-ൽ നമ്മൾ പണയപ്പെടുത്തി നേടിയ തുകയുടെ നൂറിലധികം മടങ്ങ്! പഴയ പരാജയങ്ങളിൽ നിന്ന് പാഠം ഉൾക്കൊണ്ട്, ലോകത്തിലെ മൂന്നാമത്തെ സാമ്പത്തിക ശക്തിയായി മാറാനുള്ള ഭാരതത്തിന്റെ കുതിപ്പിൽ ഓരോ പൗരനും ഉത്തരവാദിത്തമുണ്ടെന്ന സന്ദേശമാണ് ഈ ചരിത്രവും വർത്തമാനവും നൽകുന്നത്. ശത്രുരാജ്യങ്ങളുടെ വെല്ലുവിളികൾക്കും ആഗോള സാമ്പത്തിക പ്രതിസന്ധികൾക്കും ഇടയിൽ ഭാരതത്തിന്റെ സാമ്പത്തിക അടിത്തറ തകരാതിരിക്കാൻ മോദി സർക്കാർ നടത്തുന്ന ഇടപെടലുകൾ ഈ ചരിത്രപരമായ തിരിച്ചറിവിൽ നിന്നുള്ളതാണ്.
