ആരോഗ്യകരമെന്ന് നമ്മൾ കരുതുന്ന പല ഭക്ഷണങ്ങളും അമിതമായി കഴിക്കുന്നത് ആരോഗ്യത്തിന് ഗുണത്തേക്കാളേറെ ദോഷം ചെയ്തേക്കാം. പനീർ, ബദാം, നെയ്യ് തുടങ്ങിയവയെല്ലാം ആരോഗ്യത്തിന് നല്ലതാണെന്ന് കരുതുന്നവരാണ് നമ്മൾ. എന്നാൽ ഇവയുടെ അമിത ഉപയോഗം ശരീരത്തിന് ദോഷകരമായി മാറിയേക്കാം. ഭക്ഷണക്രമത്തിൽ വരുത്തേണ്ട ചെറിയ മാറ്റങ്ങൾ ആരോഗ്യവും ഉന്മേഷവും നിലനിർത്താൻ സഹായിക്കും.
അവയിൽ ചിലത് നോക്കാം:
പനീർ: പ്രോട്ടീൻ ധാരാളമുള്ള പനീർ പേശികളുടെ വളർച്ചയ്ക്ക് നല്ലതാണ്. എന്നാൽ അമിതമായി കഴിക്കുന്നത് കൊളസ്ട്രോൾ, രക്തത്തിലെ പഞ്ചസാരയുടെ അളവ് എന്നിവ വർദ്ധിപ്പിക്കാനും ശരീരഭാരം കൂടാനും കാരണമാകും. പച്ചക്കറികളോടൊപ്പം മിതമായ അളവിൽ പനീർ ഉപയോഗിക്കുന്നതാണ് ഉചിതം.
ബദാം: ആരോഗ്യകരമായ കൊഴുപ്പും നാരുകളും അടങ്ങിയ ബദാം മിതമായ അളവിൽ കഴിക്കുന്നതാണ് നല്ലത്. അമിതമായി കഴിക്കുന്നത് ചിലരിൽ കിഡ്നി സ്റ്റോണിന് കാരണമായേക്കാം. ദിവസവും ഒരു ചെറിയ പിടി ബദാം മാത്രം കഴിക്കുക.
ഫ്രൂട്ട് ജ്യൂസ്: പാക്കറ്റുകളിൽ വരുന്ന മിക്ക ജ്യൂസുകളിലും പഞ്ചസാര കൂടുതലും നാരുകൾ കുറവുമാണ്. ഇത് വണ്ണം കൂടാൻ കാരണമാകും. കൃത്രിമ മധുരത്തിന് പകരം പഴങ്ങൾ നേരിട്ട് കഴിക്കുന്നതാണ് ഏറ്റവും ആരോഗ്യകരം.
നെയ്യ്: രുചി വർദ്ധിപ്പിക്കാൻ ഉപയോഗിക്കുന്ന നെയ്യിൽ പൂരിത കൊഴുപ്പ് (saturated fat) കൂടുതലായുണ്ട്. ഇത് കൊളസ്ട്രോൾ വർദ്ധിപ്പിക്കാം. അതിനാൽ നെയ്യ് വളരെ കുറച്ച് മാത്രം ഉപയോഗിക്കുകയും ഒലീവ് ഓയിൽ, കടുകെണ്ണ തുടങ്ങിയ ആരോഗ്യകരമായ എണ്ണകളുമായി ബാലൻസ് ചെയ്യുകയും ചെയ്യുക.
തൈര്: പ്ലെയിൻ തൈര് ദഹനത്തിന് നല്ലതാണ്. എന്നാൽ മധുരം ചേർത്ത ഫ്ലേവർഡ് തൈരുകളിൽ കൃത്രിമ ചേരുവകളും പഞ്ചസാരയും അടങ്ങിയിട്ടുണ്ടാകും. അൺസ്വീറ്റൻഡ് തൈര് വാങ്ങി അതിൽ ഫ്രഷ് പഴങ്ങൾ ചേർത്ത് കഴിക്കുന്നതാണ് നല്ലത്.
എനർജി ബാറുകൾ: ആരോഗ്യകരമായ ലഘുഭക്ഷണം എന്ന് പരസ്യപ്പെടുത്താറുണ്ടെങ്കിലും പല എനർജി ബാറുകളിലും അമിതമായി
പഞ്ചസാരയും പ്രിസർവേറ്റീവുകളും അടങ്ങിയിട്ടുണ്ട്. ഇതിന് പകരമായി നട്സുകൾ, വിത്തുകൾ, പഴങ്ങൾ എന്നിവ ഉൾപ്പെടുത്താം.
അപ്പോൾ ” ഹെൽത്തി ” ആണെന്ന് കരുതി എല്ലാം വലിച്ചുവാരി കഴിക്കാതിരിക്കാൻ ശ്രമിക്കുക.
