ഇന്ത്യയുടെ സ്വകാര്യ ബഹിരാകാശ മേഖലയിൽ പുതിയ ചരിത്രമെഴുതി ഹൈദരാബാദ് ആസ്ഥാനമായി പ്രവർത്തിക്കുന്ന സ്റ്റാർട്ടപ്പ് കമ്പനിയായ സ്കൈറൂട്ട് എയറോസ്‌പേസ് (Skyroot Aerospace). കമ്പനി വികസിപ്പിച്ചെടുത്ത ആദ്യ ഓർബിറ്റൽ വിക്ഷേപണ വാഹനമായ ‘വിക്രം-1’ (Vikram-I) റോക്കറ്റിന്റെ ഒന്നാം ഘട്ടം ശ്രീഹരിക്കോട്ടയിലെ സതീഷ് ധവാൻ സ്‌പേസ് സെന്ററിലെ ഒന്നാം നമ്പർ വിക്ഷേപണ തറയിൽ (First Launch Pad) വിജയകരമായി സ്ഥാപിച്ചു (Stacking). ചന്ദ്രയാൻ, മംഗൾയാൻ തുടങ്ങിയ ഇന്ത്യയുടെ അഭിമാന ദൗത്യങ്ങൾക്ക് സാക്ഷ്യം വഹിച്ച ഐഎസ്ആർഒയുടെ (ISRO) ഇതേ വിക്ഷേപണ തറയിൽ ആദ്യമായാണ് പൂർണ്ണമായും സ്വകാര്യ മേഖലയിൽ രൂപകൽപ്പന ചെയ്ത് നിർമ്മിച്ച ഒരു ഭീമൻ റോക്കറ്റ് വിക്ഷേപണത്തിനായി സജ്ജമാക്കുന്നത്.
റോക്കറ്റിന്റെ കൂറ്റൻ ഭാഗങ്ങൾ ക്രെയിനുകളുടെ സഹായത്തോടെ ഉയർത്തി വിക്ഷേപണ തറയിൽ കൃത്യതയോടെ ഉറപ്പിക്കുന്നതിന്റെ ചിത്രങ്ങൾ സ്കൈറൂട്ട് എയറോസ്‌പേസ് തങ്ങളുടെ സോഷ്യൽ മീഡിയ പേജുകളിലൂടെ പങ്കുവെച്ചിട്ടുണ്ട്. “ഓരോ ഭാഗങ്ങളായി വിക്രം-1 ജീവൻ വെയ്ക്കുകയാണ്. ഓരോ ഘട്ടവും അതീവ ശ്രദ്ധയോടെ ഉയർത്തി, കൃത്യമായി ക്രമീകരിച്ച് ഒറ്റ റോക്കറ്റാക്കി മാറ്റുന്നു”— സ്കൈറൂട്ട് തങ്ങളുടെ എക്സ് (X) പോസ്റ്റിൽ കുറിച്ചു. മില്ലിമീറ്റർ അളവിലുള്ള കൃത്യതയോടെ റോക്കറ്റിന്റെ വിവിധ ഭാഗങ്ങൾ ലംബമായി കൂട്ടിയോജിപ്പിക്കുന്ന ‘റോക്കറ്റ് സ്റ്റാക്കിംഗ്’ പ്രക്രിയ വിക്ഷേപണത്തിന് തൊട്ടുമുമ്പുള്ള ഏറ്റവും സങ്കീർണ്ണമായ ഘട്ടങ്ങളിലൊന്നാണ്. ഈ ഘട്ടം വിജയകരമായി പൂർത്തിയായതോടെ, ഇനി ഇലക്ട്രിക്കൽ, മെക്കാനിക്കൽ പരിശോധനകളും ഇന്ധനം നിറയ്ക്കുന്നതിനുള്ള സജ്ജീകരണങ്ങളും വിലയിരുത്തിയ ശേഷം വിക്ഷേപണത്തിനായുള്ള കൗണ്ട്ഡൗൺ ആരംഭിക്കും.
ചെറിയ ഉപഗ്രഹങ്ങളെ ഭൂമിയുടെ താഴ്ന്ന ഭ്രമണപഥത്തിൽ (Low Earth Orbit) എത്തിക്കാൻ ശേഷിയുള്ള മൾട്ടി-സ്റ്റേജ് റോക്കറ്റാണ് വിക്രം-1. ഇന്ത്യൻ ബഹിരാകാശ ഗവേഷണത്തിന്റെ പിതാവായ ഡോ. വിക്രം സാരാഭായിയുടെ സ്മരണാർത്ഥമാണ് റോക്കറ്റിന് ‘വിക്രം’ എന്ന് പേരിട്ടിരിക്കുന്നത്. 2022 നവംബറിൽ ‘വിക്രം-എസ്’ എന്ന ചെറിയ റോക്കറ്റ് വിജയകരമായി വിക്ഷേപിച്ച് സ്കൈറൂട്ട് ചരിത്രം കുറിച്ചിരുന്നുവെങ്കിലും, വാണിജ്യാടിസ്ഥാനത്തിലുള്ള ഉപഗ്രഹങ്ങൾ ഭ്രമണപഥത്തിൽ എത്തിക്കാൻ ശേഷിയുള്ള വിക്രം-1 ന്റെ വിക്ഷേപണം കമ്പനിയുടെ ഏറ്റവും വലിയ സ്വപ്ന ദൗത്യമാണ്. ഈ ദൗത്യം വിജയകരമാകുന്നതോടെ ആഗോള വാണിജ്യ ബഹിരാകാശ വിപണിയിൽ ഇന്ത്യൻ സ്വകാര്യ കമ്പനികൾക്ക് വലിയ മുന്നേറ്റം നടത്താൻ സാധിക്കും. പുതിയ സ്റ്റാർട്ടപ്പുകൾക്ക് തങ്ങളുടെ സാങ്കേതികവിദ്യ വികസിപ്പിക്കുന്നതിനായി ശ്രീഹരിക്കോട്ടയിലെ വിക്ഷേപണ സൗകര്യങ്ങൾ വിട്ടുനൽകിക്കൊണ്ട് ഐഎസ്ആർഒയും ഇൻ-സ്പേസും (IN-SPACe) വലിയ പിന്തുണയാണ് നൽകി വരുന്നത്.
