ജന്തർ മന്തറിൽ നടന്ന പ്രതിഷേധങ്ങൾക്കിടെ പോലീസുകാർക്ക് നേരെ അരങ്ങേറിയത് സമാനതകളില്ലാത്ത ക്രൂരതയെന്ന് വ്യക്തമാക്കി പരിക്കേറ്റ ദില്ലി പോലീസ് ഉദ്യോഗസ്ഥരുടെ കുടുംബങ്ങൾ. സിജെപി (CJP) പ്രവർത്തകർ നടത്തിയ പ്രതിഷേധത്തിനിടെ ക്രൂരമായി ആക്രമിക്കപ്പെടുകയും പിന്നീട് സോഷ്യൽ മീഡിയയിലൂടെ കള്ളപ്രചാരണങ്ങൾ നേരിടേണ്ടി വരികയും ചെയ്ത ഉദ്യോഗസ്ഥരുടെ ദുരനുഭവങ്ങളാണ് കുടുംബാംഗങ്ങൾ പരസ്യമായി വെളിപ്പെടുത്തിയത്. കുറ്റക്കാർക്കെതിരെ കർശന നടപടി സ്വീകരിക്കണമെന്നും പ്രതിഷേധിച്ച വിദ്യാർത്ഥികളെയും അക്രമം അഴിച്ചുവിട്ട സാമൂഹിക വിരുദ്ധരെയും കൃത്യമായി തിരിച്ചറിയണമെന്നും ഇവർ ആവശ്യപ്പെട്ടു.
മുൻ മരീൻ കമാൻഡോയും നിലവിൽ ദില്ലി പോലീസിൽ സബ് ഇൻസ്പെക്ടറുമായ ഉദ്യോഗസ്ഥന്റെ മകൾ വെളിപ്പെടുത്തിയത് കേട്ടവർ ഞെട്ടലോടെയാണ് കേട്ടത്. ജൂലൈ 25-ന് ഉച്ചയ്ക്ക് രണ്ട് മണിയോടെ ജന്തർ മന്തറിലെ വേദിക്ക് സമീപത്തു വെച്ച് അക്രമികൾ ഇയാളെ കൂട്ടത്തോടെ വലിിച്ചിഴച്ച് കൊലപ്പെടുത്താൻ ശ്രമിക്കുകയായിരുന്നു. ആക്രമണത്തിൽ ഗുരുതരമായി പരിക്കേറ്റ ഇയാൾ റാം മനോഹർ ലോഹിയ ആശുപത്രിയിൽ നാല് മണിക്കൂറോളമാണ് ബോധരഹിതനായി കിടന്നത്. രാത്രി പത്ത് മണിയോടെ സഹപ്രവർത്തകർ രക്തം പുരണ്ട യൂണിഫോമുമായി ഇയാളെ വീട്ടിലെത്തിച്ചപ്പോൾ കുടുംബം തകർന്നുപോയി. എന്നാൽ പരിക്കേറ്റ ഉദ്യോഗസ്ഥനെ സോഷ്യൽ മീഡിയയിലൂടെ ക്രിമിനലായി ചിത്രീകരിക്കാനാണ് പ്രതിഷേധക്കാർ ശ്രമിച്ചതെന്നും മകൾ ആരോപിക്കുന്നു.
മറ്റൊരു അസിസ്റ്റന്റ് കമ്മീഷണർ ഓഫ് പോലീസിന്റെ (ACP) ഭാര്യയും ജൂലൈ 20-ന് നടന്ന സംഘർഷത്തിൽ ഭർത്താവിനേറ്റ പരിക്കുകളെക്കുറിച്ച് വൈകാരികമായി സംസാരിച്ചു. അന്നേദിവസം അർദ്ധരാത്രിയോടെ ശരീരമാസകലം പരിക്കുകളുമായി ഭർത്താവ് വീട്ടിലെത്തിയപ്പോൾ താനും രണ്ടു വയസ്സുള്ള മകളും കടുത്ത ഭീതിയിലായെന്ന് ഇവർ പറഞ്ഞു. കടമ നിർവ്വഹിക്കുന്നതിനിടെ ക്രൂരമായ ആക്രമണം നേരിടേണ്ടി വന്ന ഉദ്യോഗസ്ഥരെ പിന്തുണയ്ക്കണമെന്നും, അക്രമത്തിന് പിന്നിൽ പ്രവർത്തിച്ചവർക്കെതിരെ ശക്തമായ നിയമനടപടി വേണമെന്നും കുടുംബങ്ങൾ സർക്കാരിനോടും പോലീസിനോടും ആവശ്യപ്പെട്ടു.
