കോമൺവെൽത്ത് ഗെയിംസിലെ ചരിത്രവിജയത്തിന് പിന്നാലെ സ്കോട്ട്ലൻഡിലെ ഗ്ലാസ്ഗോയിൽ ഇന്ത്യൻ ബോക്സിംഗ് താരങ്ങൾക്ക് നൽകിയ വിരുന്നിനിടെ ഭാരതത്തിന്റെ തെറ്റായ ഭൂപടം ഉപയോഗിച്ച സംഭവത്തിൽ വൻ വിവാദം. ഗ്ലാസ്ഗോയിലെ പ്രശസ്തമായ ‘മിസ്റ്റർ സിങ്സ് ഇന്ത്യ – ദി ഹോം ഓഫ് കറി’ എന്ന ഇന്ത്യൻ റസ്റ്റോറന്റിൽ വിളമ്പിയ നാപ്കിനുകളിലും ബോർഡുകളിലും പതിച്ച ഭൂപടത്തിൽ നിന്ന് വടക്കുകിഴക്കൻ സംസ്ഥാനങ്ങളും ജമ്മു കശ്മീരിന്റെ ഭാഗങ്ങളും പൂർണ്ണമായി ഒഴിവാക്കിയതാണ് വിവാദമായത്. വിഷയം ഒളിമ്പിക്സ് മെഡൽ ജേതാവും അസം സ്വദേശിയുമായ ബോക്സിംഗ് താരം ലവ്ലിന ബൊർഗോഹെയ്ൻ ചൂണ്ടിക്കാണിച്ചതോടെ സ്കോട്ട്ലൻഡിലെ ഇന്ത്യൻ എംബസി വിഷയത്തിൽ നേരിട്ട് ഇടപെടുകയും ഹോട്ടൽ അധികൃതർ പരസ്യമായി മാപ്പുപറഞ്ഞ് തെറ്റായ ഭൂപടം പിൻവലിക്കുകയും ചെയ്തു.
കോമൺവെൽത്ത് ഗെയിംസിൽ 7 സ്വർണ്ണവും 3 വെള്ളിയുമടക്കം 10 മെഡലുകളുമായി എക്കാലത്തെയും മികച്ച പ്രകടനം കാഴ്ചവെച്ച ഇന്ത്യൻ ബോക്സിംഗ് താരങ്ങൾക്ക് വിരുന്ന് നൽകാനാണ് സംഘാടകർ പ്രമുഖ റസ്റ്റോറന്റായ മിസ്റ്റർ സിങ്സ് തിരഞ്ഞെടുത്ത്. എന്നാൽ ഭക്ഷണത്തിനിടെ നൽകിയ നാപ്കിനിൽ പ്രിന്റ് ചെയ്തിരുന്ന ഇന്ത്യൻ ഭൂപടത്തിൽ സ്വന്തം ജന്മനാടായ വടക്കുകിഴക്കൻ പ്രദേശം പൂർണ്ണമായും വെട്ടിമാറ്റിയ നിലയിലാണെന്ന് ലവ്ലിന കണ്ടെത്തുകയായിരുന്നു. “ദയവായി ഇതൊരു തെറ്റായ രീതിയിൽ എടുക്കരുത്, പക്ഷേ ഇത് കണ്ട് എന്റെ മനസ്സിന് വലിയ വിഷമം തോന്നി. ഭാരതത്തിന്റെ ഭൂപടത്തിൽ നിന്ന് നമ്മുടെ വടക്കുകിഴക്കൻ സംസ്ഥാനങ്ങൾ അപ്രത്യക്ഷമായിരിക്കുന്നു. ഹോട്ടലിന് മുന്നിലെ ബോർഡിലും ഇതേ തെറ്റായ ഭൂപടമാണുള്ളത്. വടക്കുകിഴക്കൻ മേഖലയിൽ നിന്നുള്ള ഒരാളെന്ന നിലയിൽ ഇത് ഞങ്ങളെ ഏറെ വേദനിപ്പിക്കുന്നു. ഭാരതത്തിന്റെ ഓരോ ഭാഗവും ഒരുപോലെ പ്രാധാന്യമുള്ളതാണ്,” ലവ്ലിന വീഡിയോയിലൂടെ വ്യക്തമാക്കി.
ലവ്ലിനയ്ക്ക് പൂർണ്ണ പിന്തുണയുമായി ബോക്സിംഗ് ഫെഡറേഷൻ ഓഫ് ഇന്ത്യ (BFI) പ്രസിഡന്റ് അജയ് സിംഗും രംഗത്തെത്തി. ഭൂപടത്തിൽ ജമ്മു കശ്മീർ പ്രദേശവും അപൂർണ്ണമായാണ് ചിത്രീകരിച്ചിരിക്കുന്നതെന്ന് അദ്ദേഹം ചൂണ്ടിക്കാട്ടി. സംഭവം വലിയ പ്രതിഷേധത്തിന് വഴിവെച്ചതോടെ സ്കോട്ട്ലൻഡിലെ ഇന്ത്യൻ എംബസി വിഷയത്തിൽ അടിയന്തരമായി ഇടപെട്ട് ഹോട്ടൽ മാനേജ്മെന്റുമായി ബന്ധപ്പെട്ടു. തുടര്ന്ന് റസ്റ്റോറന്റ് മാനേജ്മെന്റ് തെറ്റ് പരസ്യമായി സമ്മതിക്കുകയും മാപ്പ് അപേക്ഷിച്ച് ഔദ്യോഗിക പ്രസ്താവന ഇറക്കുകയും ചെയ്തു. 32 വർഷമായി പ്രവർത്തിക്കുന്ന സ്ഥാപനം എന്ന നിലയിൽ ഇന്ത്യൻ താരങ്ങളുടെ വികാരം വ്രണപ്പെടുത്താൻ ഉദ്ദേശിച്ചിരുന്നില്ലെന്നും, തെറ്റായ ഭൂപടം ഉൾപ്പെടുത്തിയ നാപ്കിനുകളും ലോഗോയും ഉടനടി മാറ്റി ശരിയായ ഭൂപടം ഉൾപ്പെടുത്തുമെന്നും അവർ അറിയിച്ചു. മാപ്പപേക്ഷ നൽകിയതിന് പിന്നാലെ വിവാദങ്ങൾ തണുപ്പിക്കാനായി റസ്റ്റോറന്റ് തങ്ങളുടെ ഇൻസ്റ്റാഗ്രാം അക്കൗണ്ടും താത്കാലികമായി നിശ്ചലമാക്കിയിട്ടുണ്ട്.
