സംസ്ഥാനത്തെ ജയിലുകളിൽ തടവുകാർക്ക് നൽകുന്ന മെനുവിൽ വൻ പരിഷ്കാരത്തിനൊരുങ്ങി ജയിൽ വകുപ്പ്. തടവുകാർക്ക് നിലവിൽ നൽകിവരുന്ന മട്ടൻ കറി വിഭവങ്ങൾ ഒഴിവാക്കാനും പകരം ആരോഗ്യദായകവും ചെലവ് കുറഞ്ഞതുമായ ചിക്കനും മുട്ടയും ഉൾപ്പെടുത്താനുമാണ് ജയിൽ വകുപ്പിന്റെ നീക്കം. റെഡ് മീറ്റ് വിഭാഗത്തിൽപ്പെടുന്ന മട്ടൻ തുടർച്ചയായി കഴിക്കുന്നത് തടവുകാർക്ക് ഗുരുതരമായ ആരോഗ്യപ്രശ്നങ്ങൾ സൃഷ്ടിക്കാൻ സാധ്യതയുണ്ടെന്ന കണ്ടെത്തലിന്റെയും വിപണിയിലെ ഉയർന്ന വിലക്കയറ്റത്തിന്റെയും പശ്ചാത്തലത്തിലാണ് ഈ നിർണായക മാറ്റം.
നിലവിൽ പ്രിസൺ മാനുവൽ പ്രകാരം നിശ്ചിത ദിവസങ്ങളിൽ തടവുകാർക്ക് മട്ടൻ വിഭവങ്ങൾ നൽകിവരുന്നുണ്ട്. എന്നാൽ, ഉയർന്ന കൊളസ്ട്രോൾ, ഹൃദ്രോഗങ്ങൾ, ഉയർന്ന രക്ത സമ്മർദ്ദം തുടങ്ങിയ ആരോഗ്യപ്രശ്നങ്ങൾക്ക് മട്ടൻ കാരണമാകുന്നുണ്ടെന്നാണ് വിലയിരുത്തൽ. കൂടാതെ, വിപണിയിൽ മട്ടന്റെ വില കുതിച്ചുയരുന്നതും ജയിൽ വകുപ്പിന് വലിയ സാമ്പത്തിക ബാധ്യത വരുത്തിവെക്കുന്നുണ്ട്. ഇതിനുപകരം പ്രോട്ടീൻ സമ്പന്നമായ ചിക്കനും മുട്ടയും നൽകുന്നത് തടവുകാരുടെ ആരോഗ്യം മെച്ചപ്പെടുത്താൻ സഹായിക്കുമെന്നാണ് ജയിൽ അധികൃതർ ചൂണ്ടിക്കാണിക്കുന്നത്.
ഭക്ഷണക്രമം പുനഃക്രമീകരിക്കുന്നതിനെക്കുറിച്ച് വിശദമായ പഠനം നടത്തി റിപ്പോർട്ട് തയ്യാറാക്കി വരികയാണെന്ന് ജയിൽ ഡിജിപി എസ്.ശ്രീജിത്ത് സ്ഥിരീകരിച്ചു. ഈ റിപ്പോർട്ട് ഉടൻതന്നെ ആഭ്യന്തര വകുപ്പിനും സർക്കാരിനും കൈമാറും. സർക്കാരിന്റെ അന്തിമ അനുമതിയും അംഗീകാരവും ലഭിച്ച ശേഷമായിരിക്കും പുതിയ മെനു ജയിലുകളിൽ ഔദ്യോഗികമായി നടപ്പിലാക്കുക. തടവുകാരുടെ ഭക്ഷണനിലവാരം ഉയർത്തുന്നതിനൊപ്പം സംസ്ഥാന ഖജനാവിന് ഭാരമാകാത്ത രീതിയിൽ ഭരണച്ചെലവ് ചുരുക്കുക കൂടിയാണ് ഈ പരിഷ്കരണത്തിലൂടെ ജയിൽ വകുപ്പ് ലക്ഷ്യമിടുന്നത്.
