നടപ്പ് സാമ്പത്തിക വർഷത്തിന്റെ ആദ്യ അഞ്ച് മാസങ്ങളിൽ റഷ്യയിൽ നിന്നുള്ള ഇന്ത്യയുടെ ഇറക്കുമതിയിൽ 57 ശതമാനത്തിന്റെ വൻ വർദ്ധനവ് . ക്രൂഡ് ഓയിൽ വിതരണം വൻതോതിൽ ഉയർന്നതാണ് ഈ സാമ്പത്തിക വളർച്ചയ്ക്ക് പ്രധാന കാരണമായത്. റഷ്യയ്ക്കെതിരെ പാശ്ചാത്യ രാജ്യങ്ങൾ ഉപരോധം ശക്തമാക്കിയ സാഹചര്യത്തിലും റഷ്യയിൽ നിന്ന് കുറഞ്ഞ നിരക്കിൽ ഇന്ധനം വാങ്ങുന്നത് ഇന്ത്യ വൻതോതിൽ തുടരുകയാണ്. ഇതോടെ ഇന്ത്യയുടെ പ്രധാന വ്യാപാര പങ്കാളികളിൽ ഒരാളായി റഷ്യ വീണ്ടും മാറിയിട്ടുണ്ട്.
റഷ്യയിൽ നിന്നുള്ള ഇറക്കുമതി ഉയർന്നുവെങ്കിലും ഇന്ത്യയുടെ ഏറ്റവും വലിയ ഇറക്കുമതി സ്രോതസ്സായി ചൈന തന്നെ ഒന്നാം സ്ഥാനത്ത് തുടരുന്നു. ഇലക്ട്രോണിക്സ് ഉൽപ്പന്നങ്ങൾ, യന്ത്രസാമഗ്രികൾ, കെമിക്കലുകൾ എന്നിവയ്ക്കായി ഇന്ത്യ പ്രധാനമായും ചൈനയെയാണ് ആശ്രയിക്കുന്നത്. സാമ്പത്തിക മേഖലയിലെയും അതിർത്തിയിലെയും തർക്കങ്ങൾ നിലനിൽക്കുമ്പോഴും ചൈനയുമായുള്ള വ്യാപാര പങ്കാളിത്തം വലിയ തോതിൽ ഉയർന്നു നിൽക്കുന്നത് ശ്രദ്ധേയമാണ്.
വാണിജ്യ മന്ത്രാലയം പുറത്തുവിട്ട ഏറ്റവും പുതിയ കണക്കുകൾ പ്രകാരമാണ് വ്യാപാര കണക്കുകളിലെ ഈ മാറ്റം വ്യക്തമാകുന്നത്. റഷ്യ, ചൈന എന്നീ രാജ്യങ്ങൾക്ക് പുറമെ സൗദി അറേബ്യ, യു.എ.ഇ, അമേരിക്ക തുടങ്ങിയ രാജ്യങ്ങളും ഇന്ത്യയുടെ പ്രമുഖ വ്യാപാര പങ്കാളികളായി പട്ടികയിലുണ്ട്. രാജ്യത്തെ ആഭ്യന്തര ആവശ്യങ്ങൾ നിറവേറ്റുന്നതിനായി ഈ രാജ്യങ്ങളിൽ നിന്നുള്ള ഇറക്കുമതി നിർണ്ണായക പങ്ക് വഹിക്കുന്നുണ്ട്.
