ബംഗ്ലാദേശുമായുള്ള ഗംഗാ ജല പങ്കുവെക്കൽ കരാറിനും ഫറാക്കാ ബാരേജിനുമെതിരെ സംസ്ഥാനത്ത് പ്രതിഷേധം ശക്തമാകുന്നതിനിടെ ബീഹാർ സർക്കാർ പുതിയ എക്കൽ നിയന്ത്രണ നയം പ്രഖ്യാപിച്ചു. ഗംഗാ നദിയിൽ അടിഞ്ഞുകൂടുന്ന എക്കൽ ശാസ്ത്രീയമായി നീക്കം ചെയ്യാനും നദീതടങ്ങളുടെ സ്വാഭാവിക ഒഴുക്ക് വീണ്ടെടുക്കാനുമാണ് ഈ നയം ലക്ഷ്യമിടുന്നത്. പട്ന, ഭാഗൽപൂർ തുടങ്ങിയ ജില്ലകളിൽ വെള്ളപ്പൊക്കവും നദീതീര ഇടിഞ്ഞുവീഴലും പതിവായ സാഹചര്യത്തിലാണ് സംസ്ഥാന സർക്കാർ ഈ നിർണായക നടപടിയിലേക്ക് കടന്നത്.
ഫറാക്കാ ബാരേജ് നിർമ്മിച്ചതിനു ശേഷം ഗംഗാ നദിയിൽ വൻതോതിൽ എക്കൽ അടിഞ്ഞുകൂടുകയും നദിയുടെ ആഴവും വെള്ളം ഉൾക്കൊള്ളാനുള്ള ശേഷിയും കുറയുകയും ചെയ്തതായി ബീഹാർ ഉപമുഖ്യമന്ത്രി വിജയ് കുമാർ ചൗധരി ആരോപിച്ചു. 1996-ൽ ഇന്ത്യയും ബംഗ്ലാദേശും തമ്മിൽ ഒപ്പുവെച്ച ഗംഗാ ജല പങ്കുവെക്കൽ കരാർ ബീഹാറിന്റെ താത്പര്യങ്ങൾക്ക് തിരിച്ചടിയായെന്നാണ് സംസ്ഥാന സർക്കാരിന്റെ നിലപാട്. ഈ കരാറിന്റെ കാലാവധി 2026 ഡിസംബറിൽ അവസാനിക്കാനിരിക്കെ, ബീഹാറിന്റെ ആശങ്കകൾ പരിഗണിക്കാതെ കരാർ പുതുക്കരുതെന്ന് സംസ്ഥാനം കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്.
പുതിയ എക്കൽ നിയന്ത്രണ നയപ്രകാരം ജലാശയങ്ങളിലെയും നദികളിലെയും എക്കൽ കൃത്യമായ മാനദണ്ഡങ്ങൾ പാലിച്ചായിരിക്കും നീക്കം ചെയ്യുക. എക്കൽ യഥാസമയം നീക്കം ചെയ്യാതിരുന്നാൽ നദിയുടെ സ്വാഭാവിക ഘടന മാറും എന്ന് പരിസ്ഥിതി വിദഗ്ദ്ധർ മുന്നറിയിപ്പ് നൽകിയിട്ടുണ്ട്. കുടിവെള്ളത്തിനും കൃഷിക്കും വ്യവസായ ആവശ്യങ്ങൾക്കും കൂടുതൽ വെള്ളം ആവശ്യമുള്ളതിനാൽ നദീതട മാനേജ്‌മെന്റിൽ കേന്ദ്ര സർക്കാരിന്റെ ഭാഗത്തുനിന്ന് അടിയന്തിര ഇടപെടൽ ഉണ്ടാകണമെന്നാണ് ബീഹാറിന്റെ പ്രധാന ആവശ്യം.
