തൃണമൂൽ കോൺഗ്രസിലെ പേര്-ചിഹ്ന തർക്കങ്ങൾക്കും രാഷ്ട്രീയ നാടകങ്ങൾക്കും പിന്നാലെ നന്ദിഗ്രാം ഉപതെരഞ്ഞെടുപ്പിൽ മമതാ ബാനർജി പക്ഷത്തിന് വൻ തിരിച്ചടി. മമതാ പക്ഷം സ്ഥാനാർത്ഥിയായി പ്രഖ്യാപിച്ചിരുന്ന സഞ്ചീത ദേ പ്രധാൻ നാമനിർദ്ദേശ പത്രിക പിൻവലിച്ചു. പശ്ചിമ ബംഗാൾ മുഖ്യമന്ത്രി സുവേന്ദു അധികാരിയുമായി കൂടിക്കാഴ്ച നടത്തിയതിന് പിന്നാലെയാണ് സഞ്ചീതയുടെ പിന്മാറ്റം.
ഒക്ടോബർ ആറിന് നടക്കാനിരിക്കുന്ന നന്ദിഗ്രാം ഉപതെരഞ്ഞെടുപ്പിനെ കൂടുതൽ സങ്കീർണ്ണമാക്കുന്നതാണ് പുതിയ രാഷ്ട്രീയ നീക്കം. പാർട്ടിയുടെ പേരിനും പരമ്പരാഗതമായ ‘ജോര ഫൂൽ’ ചിഹ്നത്തിനും വേണ്ടിയുള്ള തൃണമൂൽ കോൺഗ്രസിന്റെ രണ്ട് പക്ഷങ്ങൾ തമ്മിലുള്ള തർക്കങ്ങൾ തുടരുന്നതിനിടയിലാണ് ഈ നാടകീയ സംഭവവികാസങ്ങൾ. ഇരുവിഭാഗങ്ങൾക്കും ചിഹ്നവും പേരും ഉപയോഗിക്കുന്നതിൽ നിന്ന് തെരഞ്ഞെടുപ്പ് കമ്മീഷൻ വിലക്ക് ഏർപ്പെടുത്തിയിരുന്നു. കഴിഞ്ഞ സെപ്റ്റംബർ 13-നാണ് മമതാ പക്ഷത്തിന്റെ നന്ദിഗ്രാം സ്ഥാനാർത്ഥിയായി സ്കൂൾ അധ്യാപികയും മുൻ പഞ്ചായത്ത് സമിതി അംഗവുമായ സഞ്ചീത ദേ പ്രധാന്റെ പേര് പ്രഖ്യാപിച്ചിരുന്നത്.
2026-ലെ നിയമസഭാ തെരഞ്ഞെടുപ്പിൽ നന്ദിഗ്രാമിൽ വിജയിച്ച സുവേന്ദു അധികാരി ആ സീറ്റ് ഒഴിഞ്ഞതിനെ തുടർന്നാണ് ഉപതെരഞ്ഞെടുപ്പ് പ്രഖ്യാപിക്കപ്പെട്ടത്. മമതാ ബാനർജിയും സുവേന്ദു അധികാരിയും തമ്മിൽ കടുത്ത മത്സരം നടന്ന നന്ദിഗ്രാമിലെ ഈ പുതിയ രാഷ്ട്രീയ മാറ്റം വലിയ ചർച്ചകൾക്കാണ് വഴിവെച്ചിരിക്കുന്നത്.
