ഐക്യരാഷ്ട്രസഭയുടെ പൊതുസഭയുടെ 81-ാമത് സമ്മേളനത്തിന്റെ ഭാഗമായി നടന്ന ഒ ഐ സി കോൺടാക്റ്റ് ഗ്രൂപ്പ് യോഗത്തിൽ ജമ്മു കശ്മീരിനെക്കുറിച്ച് നടത്തിയ പരാമർശങ്ങളെ ഇന്ത്യ ശക്തമായി എതിർത്തു. ജമ്മു കശ്മീരിനെക്കുറിച്ചുള്ള പരാമർശങ്ങൾ തികഞ്ഞ വസ്തുതാവിരുദ്ധവും അനാവശ്യവുമാണെന്നും, ഇന്ത്യയുടെ ആഭ്യന്തര കാര്യങ്ങളിൽ അഭിപ്രായപ്പെടാൻ ഒ ഐ സിക്ക് യാതൊരുവിധ അധികാരവുമില്ലെന്നും വിദേശകാര്യ മന്ത്രാലയം വ്യക്തമാക്കി.
ജമ്മു കശ്മീറും ലഡാക്കും ഇന്ത്യയുടെ അഭിവാജ്യഘടകങ്ങളാണെന്ന് മന്ത്രാലയം ആവർത്തിച്ചു. രാഷ്ട്രീയ പ്രേരിതമായ പ്രചാരണങ്ങൾക്ക് ഒ ഐ സി നിരന്തരം വേദി നൽകുന്നത് സംഘടനയുടെ വിശ്വാസ്യതയെയാണ് ചോദ്യം ചെയ്യുന്നതെന്ന് ഇന്ത്യ തുറന്നടിച്ചു. അന്താരാഷ്ട്ര വേദികളിൽ ജമ്മു കശ്മീരിന്റെ പദവി മാറ്റാൻ നടത്തുന്ന ശ്രമങ്ങളെയും ഇന്ത്യ തള്ളിക്കളഞ്ഞു. അസർബൈജാൻ, പാകിസ്ഥാൻ, തുർക്കി, സൗദി അറേബ്യ, നൈജർ എന്നീ രാജ്യങ്ങളൾ അടങ്ങിയ ഒ ഐ സി കോൺടാക്റ്റ് ഗ്രൂപ്പ് ചൊവ്വാഴ്ച ന്യൂയോർക്കിൽ യോഗം ചേർന്നിരുന്നു. കശ്മീർ ജനതയുടെ ആത്മനിർണ്ണയാവകാശത്തെ പിന്തുണയ്ക്കുന്നതായി യോഗം ആവർത്തിച്ചു വ്യക്തമാക്കിയിരുന്നു.
എന്നാൽ ഒ ഐ സി പ്ലാറ്റ്ഫോം ഉപയോഗിച്ച് പാകിസ്ഥാൻ വ്യാജ പ്രചാരണങ്ങൾ നടത്തുകയാണെന്നും, അത്തരം കാര്യങ്ങൾക്ക് വേദി നൽകുന്നതിന് പകരം പാകിസ്ഥാനെ ഉപദേശിക്കുകയാണ് ഒ ഐ സി ചെയ്യേണ്ടതെന്നും വിദേശകാര്യ മന്ത്രാലയം വ്യക്തമാക്കി. ഭീകരവാദത്തെ പിന്തുണയ്ക്കുന്നതിൽ കുപ്രസിദ്ധമായ ചരിത്രമുള്ള പാകിസ്ഥാൻ, തങ്ങളുടെ നിയന്ത്രണത്തിലുള്ള പ്രദേശങ്ങളിൽ നിന്നുള്ള ഭീകരവാദ ഭീഷണി തടയാൻ തയ്യാറാകണമെന്നും ഇന്ത്യ ആവശ്യപ്പെട്ടു. ഐക്യരാഷ്ട്രസഭയിലും മറ്റ് അന്താരാഷ്ട്ര വേദികളിലും ജമ്മു കശ്മീർ വിഷയത്തിൽ ഒ ഐ സി അംഗങ്ങൾ ഒറ്റക്കെട്ടായി നിലകൊള്ളണമെന്ന് യോഗത്തിൽ സംസാരിച്ച പാകിസ്ഥാൻ ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാർ ആവശ്യപ്പെട്ടിരുന്നു. 2019 ഓഗസ്റ്റ് 5 ന് ശേഷം ഇന്ത്യ എടുത്ത നടപടികൾ പിൻവലിക്കണമെന്നും രാഷ്ട്രീയ തടവുകാരെ മോചിപ്പിക്കണമെന്നും അന്താരാഷ്ട്ര നിരീക്ഷകർക്ക് പ്രവേശനം നൽകണമെന്നും അദ്ദേഹം യോഗത്തിൽ ആവശ്യപ്പെടുകയുണ്ടായി.
