രണ്ട് പതിറ്റാണ്ടു നീണ്ട തന്റെ ക്രിക്കറ്റ് കരിയറിലെ ഏറ്റവും കഠിനമായ ഘട്ടം 2023-ലെ ഏകദിന ലോകകപ്പ് ഫൈനലിലെ തോൽവിയായിരുന്നുവെന്ന് വെളിപ്പെടുത്തി മുൻ ഇന്ത്യൻ ക്യാപ്റ്റൻ രോഹിത് ശർമ്മ. സ്വന്തം മണ്ണിൽ നടന്ന ലോകകപ്പിൽ തുടർച്ചയായ വിജയങ്ങളോടെ ഫൈനലിലെത്തിയ ഇന്ത്യയ്ക്ക് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന കലാശപ്പോരാട്ടത്തിൽ ഓസ്ട്രേലിയയോട് പരാജയം ഏറ്റുവാങ്ങേണ്ടി വന്നിരുന്നു.
2007-ൽ അരങ്ങേറ്റം കുറിച്ചത് മുതൽ ഇതുവരെ ഇത്തരമൊരു വിഷമഘട്ടത്തിലൂടെ താൻ കടന്നുപോയിട്ടില്ലെന്നും, ടൂർണമെന്റിലുടനീളം തകർപ്പൻ പ്രകടനം പുറത്തെടുത്തതിനാൽ തോൽക്കുമെന്ന് ഒട്ടും കരുതിയിരുന്നില്ലെന്നും രോഹിത് ഓർത്തെടുത്തു. എന്നാൽ എത്ര മികച്ച രീതിയിൽ മുന്നേറുമ്പോഴും അപ്രതീക്ഷിതമായ തിരിച്ചടികൾ കായികലോകം നൽകുമെന്ന വലിയ പാഠമാണ് ആ തോൽവി പഠിപ്പിച്ചതെന്നും താരം വ്യക്തമാക്കി.
അഹമ്മദാബാദിലേറ്റ ആ വൻ തിരിച്ചടിയാണ് തൊട്ടടുത്ത വർഷം നടന്ന 2024 ടി20 ലോകകപ്പിൽ കിരീടം ഉയർത്താൻ ഇന്ത്യയ്ക്ക് പ്രേരകമായതെന്നും ഹിറ്റ്മാൻ ചൂണ്ടിക്കാട്ടി. 2023 നവംബർ 19-ലെ നിരാശ ഇല്ലായിരുന്നുവെങ്കിൽ 2024 ജൂൺ 29-ലെ വിജയം സ്വന്തമാക്കാനുള്ള ആഗ്രഹവും വിശപ്പും ടീമിൽ ഇത്രത്തോളം ഉണ്ടാകുമായിരുന്നില്ലെന്ന് അദ്ദേഹം അഭിപ്രായപ്പെട്ടു.
വിജയങ്ങളേക്കാൾ കൂടുതൽ കാര്യങ്ങൾ പഠിപ്പിക്കുന്നത് പരാജയങ്ങളാണെന്നും, ഓരോ നവംബർ 19-നും പിന്നാലെ ഒരു ജൂൺ 29 ഉണ്ടാവുമെന്നും രോഹിത് ശർമ്മ കൂട്ടിച്ചേർത്തു. ബാർബഡോസിൽ നടന്ന ആവേശകരമായ ഫൈനലിൽ ദക്ഷിണാഫ്രിക്കയെ ഏഴ് റൺസിന് കീഴടക്കിയാണ് രോഹിത് ശർമ്മയുടെ നേതൃത്വത്തിലുള്ള ഇന്ത്യൻ സംഘം 2024-ൽ ടി20 ലോകകപ്പ് കിരീടം സ്വന്തമാക്കിയത്.
