ഭാവിയെ യുദ്ധങ്ങളിൽ ഡ്രോണുകളും ബഹിരാകാശ സാങ്കേതികവിദ്യകളും നിർണ്ണായക ശക്തിയായി മാറുമ്പോൾ, അത് വിജയകരമായി നേരിടാൻ ഇന്ത്യ അനുകൂല സാഹചര്യത്തിലാണെന്ന് പ്രതിരോധ വിദഗ്ധർ. ഇന്ത്യ ടുഡേ കോൺക്ലേവ് സൗത്തിൽ നടന്ന ചർച്ചയിലാണ് ശാസ്ത്രജ്ഞരും വ്യാവസായിക പ്രമുഖരും രാജ്യത്തിന്റെ നിർണ്ണായക മുന്നേറ്റവും ഭാവി സാധ്യതകളും വ്യക്തമാക്കിയത്. ഉപകരണ നിർമ്മാണത്തിനപ്പുറം തദ്ദേശീയമായി നിർണ്ണായക സാങ്കേതികവിദ്യകൾ വികസിപ്പിക്കുന്നതിലും അതിൻ്റെ ഐപി (ബൗദ്ധിക സ്വത്ത്) സ്വന്തമാക്കുന്നതിലുമാണ് ഇന്ത്യ ഇപ്പോൾ ശ്രദ്ധ കേന്ദ്രീകരിക്കുന്നത്.
ഓപ്പറേഷൻ സിന്ദൂർ വേളയിൽ അതിർത്തി കടന്നുവന്ന ഡ്രോൺ കൂട്ടങ്ങളെ വിജയകരമായി ചെറുക്കാൻ ഇന്ത്യൻ പ്രതിരോധ സംവിധാനങ്ങൾക്ക് സാധിച്ചിട്ടുണ്ടെന്ന് ബെംഗളൂരു അധിഷ്ഠിത ന്യൂസ്പേസ് റിസർച്ച് ആൻഡ് ടെക്നോളജീസ് സിഇഒ സമീർ ജോഷി പറഞ്ഞു. ഭാവിയിൽ ഇത്തരം സാങ്കേതിക ഭീഷണികൾ വർദ്ധിച്ചേക്കാമെങ്കിലും, കൃത്യമായ തന്ത്രങ്ങളും നൂതന സാങ്കേതികവിദ്യകളും വേഗത്തിൽ നടപ്പിലാക്കാൻ കഴിഞ്ഞാൽ ഏത് വെല്ലുവിളിയും മറികടന്ന് ഇന്ത്യക്ക് മുന്നേറാൻ സാധിക്കുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
യുഎവി (UAV) സാങ്കേതികവിദ്യയിൽ എഴാം തലമുറ മാറ്റങ്ങളാണ് സംഭവിക്കുന്നതെന്ന് ഡിആർഡിഒ നാവിക ഫിസിക്കൽ ആൻഡ് ഓഷ്യനോഗ്രാഫിക് ലബോറട്ടറി (എൻപിഒഎൽ) ഡയറക്ടർ ഡി. ശേഷാഗിരി ചൂണ്ടിക്കാട്ടി. വെള്ളത്തിനടിയിൽ കൂടുതൽ നിശ്ശബ്ദമായി പ്രവർത്തിക്കുന്ന വാഹനങ്ങളും ഡ്രോൺ കണ്ടെത്തൽ സംവിധാനങ്ങളും രാജ്യം വേഗത്തിൽ ശക്തിപ്പെടുത്തി വരികയാണ്. വ്യോമ അധിഷ്ഠിത പ്ലാറ്റ്ഫോമുകൾ കൂടുതൽ കാര്യക്ഷമമാക്കുന്നതിലൂടെ പ്രതികരണ സമയം മെച്ചപ്പെടുത്താൻ സാധിക്കും.
ഭാവി യുദ്ധങ്ങളുടെ പ്രധാന കേന്ദ്രം ബഹിരാകാശ അധിഷ്ഠിത സാങ്കേതികവിദ്യകളിലേക്ക് മാറുമ്പോൾ, ആ മേഖലയിലും വിപ്ലവകരമായ മുന്നേറ്റത്തിനാണ് രാജ്യം ഒരുങ്ങുന്നത്. ‘മേക്ക് ഇൻ ഇന്ത്യ’ വിജയകരമായി നടപ്പിലാക്കിയതിന് പിന്നാലെ, ‘ഇൻവെന്റ് ഇൻ ഇന്ത്യ’, ‘ഓൺ ഇൻ ഇന്ത്യ’ എന്നീ തത്ത്വങ്ങൾ മുൻനിർത്തി തദ്ദേശീയ സാങ്കേതികവിദ്യകളിൽ അധിഷ്ഠിതമായ സമ്പൂർണ്ണ സ്വയംപര്യാപ്തത ഉറപ്പാക്കുകയാണ് ലക്ഷ്യമെന്ന് വിദഗ്ധർ വ്യക്തമാക്കി.
