ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ അബുദാബി സന്ദർശനത്തിന് പിന്നാലെ യുഎഇക്കും മേഖലയിലെ മറ്റ് രാജ്യങ്ങൾക്കും മുന്നറിയിപ്പുമായി ഇറാൻ. നെതന്യാഹുവിന്റെ സന്ദർശനത്തിന് “വളരെ അപകടകരമായ പ്രത്യാഘാതങ്ങൾ” ഉണ്ടാകാമെന്നാണ് ഇറാൻ വിദേശകാര്യ മന്ത്രാലയം മുന്നറിയിപ്പ് നൽകിയത്. ഇസ്രയേലിന്റെ മേഖലാതല സാന്നിധ്യം പ്രാദേശിക സമാധാനത്തിനും സുരക്ഷയ്ക്കും ഭീഷണിയാകുമെന്ന നിലപാടും ഇറാൻ ആവർത്തിച്ചു.
സെപ്റ്റംബർ 27ന് അപ്രതീക്ഷിതമായി അബുദാബിയിലെത്തിയ നെതന്യാഹു യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി കൂടിക്കാഴ്ച നടത്തിയിരുന്നു. ഇസ്രയേൽ ഉദ്യോഗസ്ഥരാണ് സന്ദർശന വിവരം ആദ്യം സ്ഥിരീകരിച്ചത്. പിന്നീട് യുഎഇയുടെ ഔദ്യോഗിക വാർത്താ ഏജൻസിയായ WAMയും കൂടിക്കാഴ്ച സ്ഥിരീകരിച്ചു. ഇരുരാജ്യങ്ങളും തമ്മിലുള്ള ബന്ധം ശക്തിപ്പെടുത്തുന്നതും മേഖലയിലെ വിവിധ വിഷയങ്ങളും ചർച്ചയായതായി യുഎഇ അറിയിച്ചു.
നെതന്യാഹുവിന്റെ യുഎഇയിലെ സാന്നിധ്യത്തെ ഇറാൻ വിദേശകാര്യ മന്ത്രാലയം ശക്തമായി വിമർശിച്ചു. ഇസ്രയേൽ ഇറാനെതിരെ ആവർത്തിച്ച് ഭീഷണികൾ ഉയർത്തുന്ന സാഹചര്യത്തിൽ, മേഖലയിലെ രാജ്യങ്ങൾ ഇത്തരം ഇടപെടലുകളുടെ സുരക്ഷാ പ്രത്യാഘാതങ്ങളെക്കുറിച്ച് ജാഗ്രത പാലിക്കണമെന്നാണ് ഇറാന്റെ ആവശ്യം. അയൽരാജ്യങ്ങളുടെ സ്ഥിരതയെ ബാധിക്കുന്ന നടപടികൾക്ക് തങ്ങളുടെ ഭൂപ്രദേശം ഉപയോഗിക്കാൻ അനുവദിക്കരുതെന്നും ഇറാൻ പ്രാദേശിക സർക്കാരുകളോട് ആവശ്യപ്പെട്ടു.
പ്രാദേശിക സുരക്ഷ എല്ലാവരുടെയും കൂട്ടായ ഉത്തരവാദിത്വമാണെന്നും അത് പരസ്പരം വേർതിരിക്കാനാകാത്ത വിഷയമാണെന്നും ഇറാൻ വിദേശകാര്യ മന്ത്രാലയം വ്യക്തമാക്കി. ഇസ്രയേലിന്റെ സൈനിക-സുരക്ഷാ സാന്നിധ്യം ഗൾഫ് മേഖലയിലേക്ക് കൂടുതൽ വ്യാപിക്കുന്നത് അയൽരാജ്യങ്ങളുടെ സുരക്ഷയെ ബാധിക്കുമെന്ന ആശങ്കയാണ് ഇറാൻ മുന്നോട്ടുവയ്ക്കുന്നത്. അതേസമയം, ഇസ്രയേലും യുഎഇയും തമ്മിലുള്ള നയതന്ത്രബന്ധം 2020ലെ അബ്രഹാം ഉടമ്പടിക്ക് പിന്നാലെ വ്യാപാരം, സാങ്കേതികവിദ്യ, നിക്ഷേപം, സുരക്ഷാ സഹകരണം തുടങ്ങിയ മേഖലകളിലേക്ക് വികസിച്ചിട്ടുണ്ട്.
നെതന്യാഹുവിന്റെ പുതിയ സന്ദർശനം നടന്നത് 2023 ഒക്ടോബർ 7ന് മുമ്പ് ഹമാസ് ആക്രമണത്തെക്കുറിച്ച് യുഎഇ പ്രസിഡന്റ് നെതന്യാഹുവിന് മുന്നറിയിപ്പ് നൽകിയിരുന്നുവെന്ന റിപ്പോർട്ടുകൾ വീണ്ടും ചർച്ചയാകുന്നതിനിടെയാണ്. ഇസ്രയേൽ പ്രധാനമന്ത്രി ഈ റിപ്പോർട്ടുകൾ നിഷേധിച്ചിട്ടുണ്ട്. സന്ദർശനത്തിന്റെ പ്രധാന ലക്ഷ്യങ്ങളിലൊന്ന് ഈ വിവാദവുമായി ബന്ധപ്പെട്ട വിഷയങ്ങളാണെന്ന റിപ്പോർട്ടുകളും പുറത്തുവന്നിട്ടുണ്ട്. എന്നാൽ കൂടിക്കാഴ്ചയിൽ ചർച്ചയായ വിഷയങ്ങളെക്കുറിച്ച് ഇരുരാജ്യങ്ങളും പൊതുവായി നൽകിയത് ഉഭയകക്ഷി ബന്ധവും പ്രാദേശിക വെല്ലുവിളികളും സംബന്ധിച്ച വിവരങ്ങളാണ്.
നെതന്യാഹുവിന്റെ യുഎഇ സന്ദർശനവും ഇറാന്റെ ശക്തമായ പ്രതികരണവും പശ്ചിമേഷ്യയിലെ നിലവിലെ സംഘർഷങ്ങൾക്കിടയിൽ ഗൾഫ് മേഖലയിലെ ഇസ്രയേൽ-യുഎഇ ബന്ധത്തിന് കൂടുതൽ പ്രാധാന്യം നൽകുന്ന സംഭവമായി മാറുകയാണ്.
