ജമ്മു കാശ്മീരിലെ ബഡ്ഗാമിൽ സുരക്ഷാസേന വധിച്ച ലഷ്‌കറെ തൊയ്ബ കമാൻഡർ മുഹമ്മദ് ആസിഫ് എന്ന ഹാഷിം മൂസ കൊല്ലപ്പെട്ടിട്ടില്ലെന്ന് വരുത്തിതീർക്കാൻ വ്യാജ വ്യക്തിയെ മാധ്യമങ്ങൾക്ക് മുന്നിൽ ഹാജരാക്കിയ പാകിസ്ഥാന്റെ പ്രചാരണം പൊളിഞ്ഞു. മുൻ പാകിസ്ഥാൻ എസ്.എസ്.ജി കമാൻഡോയും ലഷ്‌കറെ തൊയ്ബ തലവനുമായ ഹാഷിം മൂസ ബഡ്ഗാമിലെ യൂസ്മാർഗിൽ നടന്ന ഏറ്റുമുട്ടലിൽ കൊല്ലപ്പെട്ടതായി ഇന്ത്യൻ സൈന്യം സ്ഥിരീകരിച്ചിരുന്നു. എന്നാൽ ഇതിന് പിന്നാലെ, താൻ ജീവനോടെയുണ്ടെന്ന് അവകാശപ്പെട്ട് പാക് സൈന്യത്തിന്റെ ഡിജി ഐഎസ്പിആർ ലഫ്റ്റനന്റ് ജനറൽ അഹമ്മദ് ഷെരീഫ് ചൗധരിക്കൊപ്പം മുഹമ്മദ് ആസിഫ് എന്നൊരാൾ വാർത്താസമ്മേളനത്തിൽ എത്തുകയായിരുന്നു.
പാകിസ്ഥാൻ ഹാജരാക്കിയ ആൾക്ക് കൊല്ലപ്പെട്ട ഹാഷിം മൂസയുടെ മുഖലക്ഷണങ്ങളുമായി യാതൊരു സാമ്യവുമില്ലെന്ന് ഓപ്പൺ സോഴ്സ് ഇന്റലിജൻസ് (OSINT) വിദഗ്ധരും പ്രതിരോധ വിശകലന വിദഗ്ധരും വ്യക്തമാക്കിയതോടെയാണ് പാകിസ്ഥാന്റെ വ്യാജ പ്രചാരണം പൊളിഞ്ഞത്. മൂക്കിന്റെയും കാതിന്റെയും ഘടനയിലും കണ്ണുകളുടെ വിന്യാസത്തിലും വലിയ വ്യത്യാസങ്ങളുണ്ടെന്ന് ചൂണ്ടിക്കാണിക്കപ്പെടുന്നു. വധിക്കപ്പെട്ടത് തങ്ങളുടെ മുൻ സൈനികനാണെന്ന സത്യം മറച്ചുവെക്കാൻ പാകിസ്ഥാൻ മറ്റൊരു ഡ്യൂപ്ലിക്കേറ്റിനെ രംഗത്തിറക്കുകയായിരുന്നുവെന്ന് മുൻ ഇന്ത്യൻ സൈനിക ഉദ്യോഗസ്ഥർ വിമർശിച്ചു. പഹൽഗാം ഭീകരാക്രമണമടക്കം നിരവധിയായ ഭീകരപ്രവർത്തനങ്ങൾക്ക് പിന്നിൽ പ്രവർത്തിച്ച ഹാഷിം മൂസയുടെ മരണം ലഷ്‌കറെ തൊയ്ബയ്ക്ക് ലഭിച്ച വലിയ തിരിച്ചടിയാണ്
