ഫ്ലൈദുബായ് വിമാനത്തിനുള്ളിൽ സഹപൈലറ്റായ ഇന്ത്യാക്കാരൻ ക്യാപ്റ്റൻ സ്മിത് മച്ചാറിനെ ആക്രമിച്ച കേസിൽ അറസ്റ്റിലായ ഒമാൻ സ്വദേശി ഹമാം അൽ-ഹമ്മാമിയുടെ തീവ്രവാദ പശ്ചാത്തലവും തീവ്ര ആശയങ്ങളും വെളിപ്പെടുത്തുന്ന വിവരങ്ങൾ പുറത്ത്. 2021, 2022 വർഷങ്ങളിലായി അദ്ദേഹം ഡിലീറ്റ് ചെയ്ത ഏകദേശം മൂവായിരത്തോളം ട്വീറ്റുകൾ വിശകലനം ചെയ്തതിൽ നിന്നാണ് അദ്ദേഹത്തിന്റെ സ്ത്രീവിരുദ്ധവും വർഗീയവുമായ നിലപാടുകൾ പുറത്തുവന്നത്.
വിവാഹശേഷം സ്ത്രീകൾ നഖാബ് ധരിക്കണമെന്നും ജോലി ഉപേക്ഷിക്കണമെന്നുമുള്ള തന്റെ കർശന നിബന്ധനകൾ അംഗീകരിക്കുന്ന പങ്കാളിയെ കണ്ടെത്താൻ നേരിട്ട ബുദ്ധിമുട്ടുകളെക്കുറിച്ച് ഇയാൾ പോസ്റ്റുകളിൽ കുറിച്ചിരുന്നു. പുരുഷന്മാരും സ്ത്രീകളും ഒന്നിച്ച് ജോലി ചെയ്യുന്ന ഇടങ്ങൾ സ്ത്രീകളുടെ മതവിശ്വാസത്തെ തകർക്കുമെന്നും ഇയാൾ വാദിച്ചിരുന്നു. കൂടാതെ, ജൂതന്മാരെ കൊന്നൊടുക്കുന്നതിനെക്കുറിച്ചും മറ്റ് അക്രമ ആശയങ്ങളെക്കുറിച്ചുമുള്ള പോസ്റ്റുകളും ഇയാളുടെ സോഷ്യൽ മീഡിയ അക്കൗണ്ടുകളിൽ കണ്ടെത്തിയിട്ടുണ്ട്. സെപ്റ്റംബർ 30-ന് ദുബായ്-ടെൽ അവീവ് വിമാനത്തിന്റെ കോക്ക്പിറ്റിൽ വെച്ച് ഹമ്മാമി സ്മിത് മച്ചാറിനെ ആക്രമിച്ചതിനെത്തുടർന്ന് വിമാനം പെട്ടെന്ന് താഴേക്ക് പതിച്ചിരുന്നു. തുടർന്ന് ജീവനക്കാരും യാത്രക്കാരും ചേർന്ന് ഇയാളെ കീഴ്പ്പെടുത്തുകയായിരുന്നു.
മുൻപ് ഒമാൻ എയറിൽ ജോലി ചെയ്തിരുന്ന സമയത്തും തീവ്രവാദ ആശയങ്ങളോടുള്ള ആഭിമുഖ്യവും സംശയാസ്പദമായ വെബ്‌സൈറ്റ് സന്ദർശനങ്ങളും കാരണം ഇയാളെ പറക്കൽ ചുമതലകളിൽ നിന്ന് മാറ്റി ഡെസ്ക് ജോലികളിലേക്ക് മാറ്റിയിരുന്നതായി റിപ്പോർട്ടുകളുണ്ട്. സംഭവത്തിനുശേഷം ഇയാളുടെ ലിങ്ക്ഡ്ഇൻ അക്കൗണ്ടിൽ അൽ ഖ്വയ്ദ ഭീകരരുടെ ചിത്രങ്ങളും മൂന്ന് വിശുദ്ധ കേന്ദ്രങ്ങളുടെ ചിത്രങ്ങളുമടങ്ങിയ പോസ്റ്റുകൾ പ്രത്യക്ഷപ്പെട്ടതും അന്വേഷണ ഏജൻസികൾ പരിശോധിച്ചുവരികയാണ്. സംഭവം ഏതെങ്കിലും ഭീകരവാദ പ്രവർത്തനങ്ങളുമായോ ജൂത യാത്രക്കാരെ ലക്ഷ്യമിട്ടുള്ള നീക്കങ്ങളുമായോ ബന്ധപ്പെട്ടതാണോ എന്ന കാര്യത്തിലാണ് അധികൃതർ അന്വേഷണം നടത്തുന്നത്
