ന്യൂഡൽഹി: അന്താരാഷ്ട്ര തലത്തിൽ ഇന്ത്യയുടെ സ്ഥാനത്തെ കേവലം ഒരു ‘ഇടത്തരം ശക്തി’ (Middle Power) എന്ന് വിശേഷിപ്പിക്കുന്നത് രാജ്യത്തിന്റെ ശേഷിയെ പരിമിതപ്പെടുത്തലാണെന്ന് കേന്ദ്ര വിദേശകാര്യ മന്ത്രി എസ്. ജയശങ്കർ. ബ്ലൂംബെർഗ് ന്യൂ ഇക്കോണമി ഫോറത്തിൽ (Bloomberg New Economy Forum) നടന്ന പാനൽ ചർച്ചയിൽ സംസാരിക്കവേയാണ് ആഗോള രാഷ്ട്രീയത്തിൽ ഭാരതത്തിന്റെ പ്രസക്തിയും വൻശക്തി സ്ഥാനവും അദ്ദേഹം എടുത്തുപറഞ്ഞത്. ഇന്ത്യയെ ‘മിഡിൽ പവർ’ എന്ന് വിളിക്കാൻ താല്പര്യപ്പെടാത്തത് എന്തുകൊണ്ടാണെന്ന മാധ്യമപ്രവർത്തകരുടെ ചോദ്യത്തിന്, ഇന്ത്യ കേവലം ഒരു മിഡിൽ പവർ അല്ലെന്നും മറിച്ച് ലോകരാഷ്ട്രങ്ങൾക്ക് നടുവിൽ കൃത്യമായ സ്വാധീനമുള്ള ‘പവർ ഇൻ ദി മിഡിൽ’ (Power in the middle) ആണെന്നും അദ്ദേഹം വ്യക്തമാക്കി.
ഇടത്തരം ശക്തി എന്ന വിശേഷണം ഇന്ത്യക്ക് ഒട്ടും അനുയോജ്യമല്ലെന്നും, മറ്റ് രാജ്യങ്ങളെയും ജനങ്ങളെയും ശാക്തീകരിക്കാൻ ശേഷിയുള്ള രാജ്യങ്ങളാണ് യഥാർത്ഥത്തിൽ ‘മിഡിൽ പവർ’ എന്ന പ്രധാനമന്ത്രി നരേന്ദ്ര മോദിയുടെ മുൻ പ്രസ്താവനയും ജയശങ്കർ ഈ വേദിയിൽ ചൂണ്ടിക്കാണിച്ചു. ആഗോളതലത്തിൽ ധനകാര്യം, ഉപരോധങ്ങൾ തുടങ്ങിയ മേഖലകളിൽ ചില കേന്ദ്രങ്ങൾ സൃഷ്ടിക്കുന്ന നിയന്ത്രണങ്ങളും തടസ്സങ്ങളും (Choke points) ലോകത്തെ വലിയ രീതിയിൽ ബാധിക്കുന്നുണ്ടെന്നും ഇത്തരം വെല്ലുവിളികളെ അതിജീവിച്ച് സ്വന്തം പരമാധികാരവും വിദേശനയവും സംരക്ഷിക്കാൻ ഇന്ത്യക്ക് സാധിക്കുന്നുണ്ടെന്നും അദ്ദേഹം പറഞ്ഞു. വൻശക്തികൾക്കിടയിൽ കൃത്യമായ നയതന്ത്ര സന്തുലിതാവസ്ഥ പാലിച്ചുകൊണ്ട് ആഗോള തീരുമാനങ്ങളെ സ്വാധീനിക്കാൻ ഇന്ത്യയ്ക്കുള്ള ശേഷിയാണ് ജയശങ്കറിന്റെ വാക്കുകളിലൂടെ വീണ്ടും വ്യക്തമാകുന്നത്.
