സിഎംആർഎൽ-എക്സാലോജിക് കേസിൽ സർക്കാർ സ്വീകരിച്ച നിലപാടുകളുമായി ബന്ധപ്പെട്ട് കെപിസിസി മീഡിയ വാട്‌സ്ആപ്പ് ഗ്രൂപ്പിൽ കടുത്ത വാക്‌പോരും ഭിന്നതയും. ഹൈക്കോടതിയിൽ പിണറായി വിജയന് അനുകൂലമായ നിലപാടാണ് സർക്കാർ സ്വീകരിച്ചതെന്നും, ഉമ്മൻചാണ്ടിക്ക് നീതി നിഷേധിക്കപ്പെട്ടപ്പോൾ മറ്റൊരു രീതിയിലുള്ള സമീപനമാണ് കാണുന്നതെന്നും ചൂണ്ടിക്കാട്ടി ഒരു വിഭാഗം യുവനേതാക്കൾ രംഗത്തെത്തിയതോടെയാണ് ഗ്രൂപ്പിൽ തർക്കമുണ്ടായത്.
ജിന്റോ ജോൺ, വി.ആർ. അനൂപ് തുടങ്ങിയ നേതാക്കളാണ് സർക്കാരിന്റെ നിലപാടുകളെ രൂക്ഷമായി വിമർശിച്ച് രംഗത്തെത്തിയത്. എന്നാൽ സർക്കാരിനെ പരസ്യമായി വിമർശിക്കാൻ പാടില്ലെന്നായിരുന്നു രാജു പി നായരുടെ പക്ഷം. എങ്കിലും സർക്കാരിന്റെ വീഴ്ചകൾ ചൂണ്ടിക്കാണിക്കുമെന്നും വിമർശനങ്ങളെ വിലക്കുന്നത് ശരിയല്ലെന്നും മറ്റൊരു വിഭാഗം നേതാക്കൾ നിലപാടെടുത്തു. കെപിസിസി പ്രസിഡന്റും ജനറൽ സെക്രട്ടറിയും ഉൾപ്പെടെയുള്ളവർ അംഗമായ ഗ്രൂപ്പിലാണ് ഈ തർക്കങ്ങളുണ്ടായത്.
മുൻ മുഖ്യമന്ത്രി ഉമ്മൻചാണ്ടിക്ക് മുൻ സർക്കാരിന്റെ കാലത്ത് നീതി ലഭിച്ചിരുന്നില്ലെന്നും, സരിതയുടെ കയ്യിൽ നിന്ന് കത്ത് വാങ്ങി അദ്ദേഹത്തെ സിബിഐക്ക് മുന്നിലേക്ക് എറിഞ്ഞുകൊടുത്ത ആളാണ് പിണറായി വിജയൻ എന്നുമുള്ള മാത്യു കുഴൽനാടൻ എംഎൽഎയുടെ വാക്കുകളും ഗ്രൂപ്പിൽ ചർച്ചയായി. പിണറായി വിജയനെതിരെ ഇഡി നടപടി ആവശ്യപ്പെടുമ്പോൾ കോൺഗ്രസ് അതെല്ലാം വെള്ളം തൊടാതെ വിഴുങ്ങുന്ന നിലപാട് സ്വീകരിക്കില്ലെന്നും, രാഷ്ട്രീയ അന്തസിന് വിരുദ്ധമായ കാര്യങ്ങൾ ചെയ്യില്ലെന്നും വ്യക്തമാക്കി കെ.പി. നൗഷാദ് അലി എംഎൽഎ സർക്കാരിനെയും പാർട്ടിയുടെ നിലപാടിനെയും പിന്തുണച്ച് രംഗത്തുവന്നിരുന്നു.
എന്നാൽ ഉമ്മൻചാണ്ടി ഭരിച്ച കാലത്തും അതിനുശേഷവും പാർട്ടിക്ക് അകത്തും പുറത്തും അദ്ദേഹത്തിന് നീതി കിട്ടിയില്ലെന്നും, മാധ്യമങ്ങളിൽ പാർട്ടിയെ പ്രതിരോധിച്ചവർക്ക് അർഹമായ പരിഗണന കിട്ടിയോ എന്ന ചോദ്യം നിലനിൽക്കുന്നുണ്ടെന്നും വി.ആർ. അനൂപ് വിമർശിച്ചു. കേസിൽ സർക്കാരിന്റെ ഭാഗത്തുനിന്നുണ്ടായ മൃദുസമീപനവും കോടതിയിലെ വാദഗതികളും കോൺഗ്രസിനകത്ത് വലിയ രാഷ്ട്രീയ ചർച്ചകൾക്കാണ് വഴിവെച്ചിരിക്കുന്നത്.
