ട്വന്റി-20 ലോകകപ്പിലെ മികച്ച പ്രകടനം നൽകിയ ആത്മവിശ്വാസം സ്വന്തം കളിയെ കൂടുതൽ നന്നായി മനസ്സിലാക്കാൻ സഹായിച്ചുവെന്ന് ഇന്ത്യൻ വിക്കറ്റ് കീപ്പർ ബാറ്റർ സഞ്ജു സാംസൺ. വെസ്റ്റ് ഇൻഡീസിനെതിരായ അഞ്ചാം ട്വന്റി-20 മത്സരത്തിന് മുന്നോടിയായി മഴ മൂലം കളി തടസ്സപ്പെട്ട സമയത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഫോമിൽ മാറ്റങ്ങളുണ്ടാകാറുണ്ടെങ്കിലും ടീം മാനേജ്‌മെന്റിന്റെ പിന്തുണ സഞ്ജുവിന് എപ്പോഴുമുണ്ട്. കളിയിലെ നേട്ടങ്ങൾ വലിയ ആത്മവിശ്വാസം നൽകുമെങ്കിലും അമിത ആഹ്ലാദമില്ലാതെ ശാന്തനായി നിലകൊള്ളാനും ഭയമില്ലാതെ അറ്റാക്കിങ് ക്രിക്കറ്റ് തുടരാനുമാണ് താൻ ആഗ്രഹിക്കുന്നതെന്ന് സഞ്ജു വ്യക്തമാക്കി. പുറത്തുനിന്നുള്ള വിമർശനങ്ങൾ ഒഴിവാക്കി മാനസികമായി മികച്ച അന്തരീക്ഷം സൃഷ്ടിച്ച് കളത്തിലിറങ്ങാനാണ് താൻ ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
തുടർച്ചയായ മത്സരങ്ങൾ നിറഞ്ഞ അന്താരാഷ്ട്ര കലണ്ടർ കാരണം അടുത്ത പരമ്പരകൾക്കായി പരിശീലിക്കാനോ തയ്യാറെടുപ്പുകൾ നടത്താനോ വേണ്ടത്ര സമയം ലഭിക്കാറില്ലെന്ന് സഞ്ജു തുറന്നുപറഞ്ഞു. അവിടെ മുൻപരിചയമാണ് തുണയാകുന്നത്. ഒക്ടോബർ 22-ന് ആരംഭിക്കുന്ന ന്യൂസിലൻഡ് പരമ്പരയ്ക്ക് മുന്നോടിയായി ഒരു ദിവസം മാത്രമാണ് ബാറ്റിങ് പരിശീലനത്തിന് ലഭിക്കുന്നത്. 20-ന് അവിടെയെത്തി 21-ന് പരിശീലനം നടത്തി 22-ന് തന്നെ മത്സരത്തിനിറങ്ങേണ്ട സാഹചര്യമാണുള്ളത്. എങ്കിലും നിലവിലെ പരമ്പരയിലെ നല്ല കാര്യങ്ങൾ മുന്നോട്ട് കൊണ്ടുപോകാനും ന്യൂസിലൻഡിലെ സാഹചര്യങ്ങളുമായി വേഗത്തിൽ പൊരുത്തപ്പെട്ട് അനുഭവസമ്പത്ത് മുൻനിർത്തി കളിക്കാനും സാധിക്കുമെന്ന പ്രതീക്ഷയിലാണ് സഞ്ജുവെന്നും അദ്ദേഹം പറഞ്ഞു. ഡ്രസ്സിങ് റൂമിൽ ചാഹലിന്റെ സാന്നിദ്ര്യത്തെക്കുറിച്ച് തമാശരൂപേണ സംസാരിച്ച സഞ്ജു, മഴയുള്ള സമയങ്ങളിൽ ഡ്രസ്സിങ് റൂമിലെ അന്തരീക്ഷം ലഘുവായി നിലനിർത്താൻ കൂടുതൽ ചിന്തകൾ ഒഴിവാക്കുകയാണ് ചെയ്യാറുള്ളതെന്നും വ്യക്തമാക്കി.
