വംബർ ഒന്നിന് രാംലീല മൈതാനത്ത് നടത്താൻ നിശ്ചയിച്ചിരിക്കുന്ന കോൺഗ്രസിന്റെ മഹാറാലി നവംബർ 10-ന് ശേഷത്തേക്ക് മാറ്റിവെക്കണമെന്ന് ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയോട് ഔദ്യോഗികമായി ആവശ്യപ്പെട്ട് ചേംബർ ഓഫ് ട്രേഡ് ആൻഡ് ഇൻഡസ്ട്രി (സി.ടി.ഐ). ദീപാവലി ഉൾപ്പെടെയുള്ള പ്രമുഖ ഉത്സവ സീസണിന്റെ പശ്ചാത്തലത്തിൽ റാലി നടത്തുന്നത് ദില്ലിയിലെ വ്യാപാര മേഖലയെയും കച്ചവടക്കാരെയും പ്രതികൂലമായി ബാധിക്കുമെന്ന് ചൂണ്ടിക്കാട്ടിയാണ് വ്യാപാരി സംഘടനയായ സി.ടി.ഐ ചെയർമാൻ ബ്രിജേഷ് ഗോയൽ ഒക്ടോബർ 24-ന് അയച്ച കത്തിൽ ഈ ആവശ്യം ഉന്നയിച്ചത്.
നവംബർ 6-ന് ധൻതേരസ്, 8-ന് ദീപാവലി, 10-ന് ഭായ് ദൂജ് എന്നീ പ്രധാന ആഘോഷങ്ങൾ നടക്കാനിരിക്കെ ദില്ലിയിലെ ചില്ലറ വിൽപ്പന വിപണികളിൽ ഏറ്റവും കൂടുതൽ വ്യാപാരം നടക്കുന്ന സമയമാണിതെന്ന് കത്തിൽ ഓർമ്മിപ്പിക്കുന്നു. ധൻതേരസ് ദിനത്തിൽ മാത്രം സ്വർണ്ണം, വസ്ത്രങ്ങൾ, ഇലക്ട്രോണിക്സ്, മധുരപലഹാരങ്ങൾ തുടങ്ങിയ മേഖലകളിലായി ദില്ലിയിൽ ഏകദേശം 25,000 കോടി രൂപയുടെ ബിസിനസ്സ് നടക്കുമെന്നാണ് പ്രതീക്ഷിക്കുന്നത്. ഒക്ടോബറിലെ റോഡ് അടയ്ക്കലുകളും ഗതാഗത നിയന്ത്രണങ്ങളും കാരണം വ്യാപാരികൾക്ക് ഇതിനകം 3,000 കോടി രൂപയുടെ നഷ്ടമുണ്ടായതായും സംഘടന വ്യക്തമാക്കുന്നു.
രാംലീല മൈതാനത്തിന് അഞ്ച് കിലോമീറ്റർ ചുറ്റളവിൽ ചാന്ദ്‌നി ചൗക്ക്, സദർ ബസാർ, കരോൾ ബാഗ് ഉൾപ്പെടെ ഇരുപതോളം വൻകിട മൊത്ത-ചില്ലറ വിപണികളും പ്രമുഖ റെയിൽവേ സ്റ്റേഷനുകളും സ്ഥിതി ചെയ്യുന്നുണ്ട്. റാലിയുടെ ഭാഗമായി ബാരിക്കേഡുകൾ ഉയർത്തുന്നതും മെട്രോ സ്റ്റേഷനുകൾ അടയ്ക്കുന്നതും ഗതാഗത നിയന്ത്രണങ്ങളും ഏർപ്പെടുത്തുന്നത് ദില്ലിക്ക് പുറത്തുനിന്നും സാധനങ്ങൾ വാങ്ങാനെത്തുന്ന ഉപഭോക്താക്കൾക്കും കച്ചവടക്കാർക്കും വലിയ ബുദ്ധിമുട്ട് സൃഷ്ടിക്കുമെന്നാണ് ആശങ്ക. രാഷ്ട്രീയ പാർട്ടികൾക്ക് റാലി നടത്താനുള്ള അവകാശത്തെ മാനിക്കുന്നതോടൊപ്പം തന്നെ വ്യാപാരികളുടെ ആശങ്ക പരിഗണിച്ച് പരിപാടി നവംബർ 10-ന് ശേഷമുള്ള ഏതെങ്കിലും ദിവസത്തേക്ക് മാറ്റിവെക്കണമെന്നും സി.ടി.ഐ രാഹുൽ ഗാന്ധിയോട് അഭ്യർത്ഥിച്ചു.
