ചൈനയുടെ കടുത്ത ജല അധിനിവേശത്തെയും തന്ത്രപരമായ ഭീഷണികളെയും ചെറുക്കാൻ ഭാരതം അരുണാചൽ പ്രദേശിൽ നിർമ്മിക്കാൻ ലക്ഷ്യമിടുന്ന ബൃഹത്തായ പദ്ധതിക്കെതിരെ വടക്കുകിഴക്കൻ അതിർത്തിയിൽ വൻ പ്രതിഷേധവും അക്രമങ്ങളും. ബ്രഹ്മപുത്ര നദിയിൽ ചൈന നിർമ്മിച്ചുകൊണ്ടിരിക്കുന്ന ഭീമൻ അണക്കെട്ടിന് മറുപടിയായി ഇന്ത്യ പ്ലാൻ ചെയ്ത 11,200 മെഗാവാട്ട് ശേഷിയുള്ള സിയാംഗ് അപ്പർ മൾട്ടിപർപ്പസ് പ്രൊജക്റ്റിനെതിരെ (SUMP) അരുണാചൽ പ്രദേശിലെ ഈസ്റ്റ് സിയാംഗ് ജില്ലയിൽ ജനറേഷൻ സെഡ് (Gen Z) യുവാക്കളും പ്രാദേശിക ആദി ഗോത്രവിഭാഗങ്ങളും തെരുവിലിറങ്ങിയിരിക്കുകയാണ്.
ഒക്ടോബർ 23 വെള്ളിയാഴ്ച രാത്രിയോടെ അക്രമസക്തമായ പ്രക്ഷോഭം പ്രദേശത്ത് ക്രമസമാധാന നില പൂർണ്ണമായി തകർത്തു. ജനപ്രതിനിധികളുടെ വസതികൾ ആക്രമിക്കപ്പെടുകയും, നാഷണൽ ഹൈഡ്രോ ഇലക്ട്രിക് പവർ കോർപ്പറേഷന്റെ (NHPC) ഓഫീസിനും വാഹനങ്ങൾക്കും തീയിടുകയും ചെയ്തു. ജനക്കൂട്ടത്തെ പിരിച്ചുവിടാൻ പൊലീസിന് കണ്ണീർവാതകവും ലാത്തിച്ചാർജും പ്രയോഗിക്കേണ്ടി വന്നു.ക്രമസമാധാനം വീണ്ടെടുക്കാൻ കേന്ദ്ര ആഭ്യന്തര മന്ത്രാലയം ദ്രുതകർമ്മ സേനയുടെ (RAF) രണ്ടു കമ്പനികളെയും റാപ്പിഡ് ആക്ഷൻ പടയെയും ഉടൻ തന്നെ സംഭവസ്ഥലത്തേക്ക് നിയോഗിച്ചിട്ടുണ്ട്.
എന്തുകൊണ്ട് ഇന്ത്യയ്ക്ക് ഈ അണക്കെട്ട് നിർണ്ണായകം?
ഭാരതത്തിന്റെ പരമാധികാരവും വടക്കുകിഴക്കൻ സംസ്ഥാനങ്ങളുടെ സുരക്ഷയും ഉറപ്പാക്കാൻ സിയാംഗ് അണക്കെട്ട് അത്യന്താപേക്ഷിതമാണ്. ടിബറ്റിൽ യെർലുങ് സാങ്പോ എന്ന് വിളിക്കപ്പെടുന്ന ബ്രഹ്മപുത്ര നദി ഇന്ത്യയിലേക്ക് പ്രവേശിക്കുന്നത് അരുണാചലിലെ സിയാംഗ് നദിയായാണ്.
2025 ജൂലൈയിൽ ടിബറ്റിലെ മേഡോങ് പ്രവിശ്യയിൽ ചൈന നിർമ്മാണം ആരംഭിച്ച 60,000 മെഗാവാട്ടിന്റെ മഹാ അണക്കെട്ട് ഇന്ത്യയ്ക്കും ബംഗ്ലാദേശിനും വലിയ സുരക്ഷാ ഭീഷണിയാണ് ഉയർത്തുന്നത്. 1.2 ട്രില്യൺ യുവാൻ ചെലവഴിച്ച് ചൈന നിർമ്മിക്കുന്ന ഈ പദ്ധതി ലോകത്തിലെ ഏറ്റവും വലിയ ജലവൈദ്യുത പദ്ധതിയായി മാറും. അതിർത്തിയിൽ പെട്ടെന്ന് വെള്ളം തുറന്നുവിട്ട് പ്രളയം സൃഷ്ടിക്കാനും (വാട്ടർ ബോംബ്) അല്ലെങ്കിൽ വേനൽക്കാലത്ത് വെള്ളം തടഞ്ഞുനിർത്തി ഇന്ത്യയെ വരൾച്ചയിലേക്ക് തള്ളിയിടാനും ചൈനയ്ക്ക് ഇതിലൂടെ കഴിയും. ഇന്ത്യ സിന്ധു നദീജല കരാർ താൽക്കാലികമായി നിർത്തിവെച്ചപ്പോൾ ഭാരതത്തെ സമ്മർദ്ദത്തിലാക്കാൻ ബ്രഹ്മപുത്രയിലെ വെള്ളം തടയുമെന്ന് പാകിസ്ഥാൻ ഭീഷണിപ്പെടുത്തിയത് ഇതിന് ഉദാഹരണമാണ്.
ഈ ഭീഷണിയെ പ്രതിരോധിക്കാൻ ഇന്ത്യയ്ക്ക് സ്വന്തമായി ഒരു വലിയ സംഭരണി വേണം. ഇന്ത്യ നിർമ്മിക്കാൻ ഉദ്ദേശിക്കുന്ന സിയാംഗ് അണക്കെട്ടിന് 9.2 ബില്യൺ ക്യൂബിക് മീറ്റർ ലൈവ് സ്റ്റോറേജ് ശേഷിയുണ്ടാകും. ചൈനയുടെ മേഡോങ് പദ്ധതിയുടെ സംഭരണശേഷി (5.5 ബില്യൺ ക്യൂബിക് മീറ്റർ) യേക്കാൾ വളരെ കൂടുതലാണിത്. ചൈന പെട്ടെന്ന് തുറന്നുവിടുന്ന വൻ ജലപ്രവാഹത്തെ തടഞ്ഞുനിർത്താനും അപ്രതീക്ഷിത പ്രളയങ്ങളിൽ നിന്ന് അസമിനെയും മറ്റ് താഴത്തെ പ്രദേശങ്ങളെയും സംരക്ഷിക്കാനും ഈ അണക്കെട്ട് ഒരു മികച്ച ‘സ്ട്രാറ്റജിക് ബഫർ’ (Strategic Buffer) ആയി പ്രവർത്തിക്കും. അതോടൊപ്പം വടക്കുകിഴക്കൻ ഭാരതത്തിന്റെ ഊർജ്ജ പ്രതിസന്ധിക്ക് പരിഹാരമാകാനും അരുണാചലിന്റെ അടിസ്ഥാന സൗകര്യ വികസനത്തിന് ആക്കം കൂട്ടാനും പദ്ധതി സഹായിക്കും.
വികസനത്തിനും സർക്കാരിന്റെ നിലപാടിനുമൊപ്പം
അരുണാചൽ പ്രദേശ് മുഖ്യമന്ത്രി പേമ ഖണ്ഡു സാഹചര്യം വിശദീകരിച്ച് രംഗത്തെത്തിയിട്ടുണ്ട്. പദ്ധതിയെക്കുറിച്ച് വ്യാജപ്രചാരണങ്ങളും തെറ്റിദ്ധാരണകളും പടർത്തുകയാണ്. അണക്കെട്ട് നിർമ്മാണത്തിൽ അന്തിമ തീരുമാനം എടുത്തിട്ടില്ലെന്നും, ഇപ്പോൾ സാങ്കേതികവും പാരിസ്ഥിതികവുമായ സാധ്യത പഠനം (Pre-Feasibility Report) മാത്രമാണ് നടക്കുന്നതെന്നും അദ്ദേഹം വ്യക്തമാക്കി. വിദഗ്ധ പഠനത്തിൽ പദ്ധതി അനുയോജ്യമല്ലെന്ന് കണ്ടാൽ മുന്നോട്ട് പോകില്ലെന്നും ജനങ്ങളുടെ ആശങ്കകൾ പൂർണ്ണമായും പരിഹരിച്ച ശേഷമേ തീരുമാനങ്ങൾ കൈക്കൊള്ളൂ എന്നും സർക്കാർ അറിയിച്ചു.
