ഇന്ത്യൻ കരസേനയുടെയും വ്യോമസേനയുടെയും നിരീക്ഷണ-റോന്തുചുറ്റൽ ശേഷി വർദ്ധിപ്പിക്കുന്നതിനായി 200 പുതിയ ലൈറ്റ് മൾട്ടിറോൾ ഹെലികോപ്റ്ററുകൾ (LMRH) വാങ്ങാൻ ഡിഫൻസ് അക്വിസിഷൻ കൗൺസിലിന്റെ (DAC) അനുമതി. ഏകദേശം 20,000 കോടി രൂപ ചെലവിൽ നടപ്പാക്കുന്ന ഈ പദ്ധതി വഴി പതിറ്റാണ്ടുകൾ പഴക്കമുള്ള ചേതക്, ചീറ്റ ഹെലികോപ്റ്ററുകൾക്ക് പകരം അത്യാധുനിക ഹെലികോപ്റ്ററുകൾ നിരത്തിലിറക്കാനാണ് കരസേനയും വ്യോമസേനയും ലക്ഷ്യമിടുന്നത്.
കേന്ദ്ര സർക്കാരിന്റെ ‘മേക്ക് ഇൻ ഇന്ത്യ’ പദ്ധതിക്ക് മുൻഗണന നൽകിക്കൊണ്ട് ഇന്ത്യൻ കമ്പനികളുടെ നേതൃത്വത്തിലാകും ഹെലികോപ്റ്ററുകളുടെ പ്രാദേശിക നിർമ്മാണം നടപ്പിലാക്കുക. ടെൻഡർ നടപടികളിൽ ഏറ്റവും കുറഞ്ഞ തുക വാഗ്ദാനം ചെയ്യുന്ന എൽ1 (L1), തൊട്ടടുത്ത തുക വാഗ്ദാനം ചെയ്യുന്ന എൽ2 (L2) കമ്പനികൾ തമ്മിൽ നിർമ്മാണ കരാർ പങ്കിട്ടു നൽകാനാണ് പ്രതിരോധ മന്ത്രാലയം തീരുമാനിച്ചിരിക്കുന്നത്. വ്യവസായ മേഖലയിലെ പ്രമുഖരായ ടാറ്റാ ഗ്രൂപ്പ് എയർബസുമായി ചേർന്നും, അദാനി ഗ്രൂപ്പ് ഇറ്റാലിയൻ കമ്പനിയായ ലിയോനാർഡോയുമായി പങ്കാളിത്തത്തിലുമാണ് പദ്ധതിക്കായി രംഗത്തുള്ളത്. ഇതോടൊപ്പം അമേരിക്കൻ വിമാന നിർമ്മാണ കമ്പനിയായ ബെൽ ഹെലികോപ്റ്റേഴ്സും കരാറിൽ പങ്കെടുക്കുമെന്നാണ് സൂചന.
സിയാച്ചിനിലെ അതിശൈത്യ മേഖലകൾ മുതൽ അരുണാചൽ പ്രദേശിലെ അതിർത്തി മലനിരകൾ വരെയുള്ള പ്രവിശ്യകളിൽ നിരീക്ഷണത്തിനും, രഹസ്യാന്വേഷണത്തിനും, ദുരന്തനിവാരണ രക്ഷാപ്രവർത്തനങ്ങൾക്കും ലൈറ്റ് മൾട്ടിറോൾ ഹെലികോപ്റ്ററുകൾ അത്യാവശ്യമാണ്. വരും വർഷങ്ങളിൽ സേനയിൽ നിന്ന് വിരമിക്കുന്ന 400-ഓളം ചേതക്-ചീറ്റ ഹെലികോപ്റ്ററുകൾക്ക് പകരക്കാരെ കണ്ടെത്താനുള്ള 20 വർഷത്തോളമായുള്ള നീക്കങ്ങൾക്കാണ് ഇപ്പോൾ ജീവൻ വച്ചിരിക്കുന്നത്. മുൻപ് റഷ്യൻ നിർമ്മിത കാമോവ് (Ka-226) ഹെലികോപ്റ്ററുകൾ വാങ്ങാൻ ധാരണയായിരുന്നെങ്കിലും സാങ്കേതിക തടസ്സങ്ങളാൽ അത് റദ്ദാക്കുകയായിരുന്നു. തിരച്ചിലിനും രക്ഷാപ്രവർത്തനങ്ങൾക്കുമായി ഇന്ത്യൻ നാവികസേനയും പുതിയ ലൈറ്റ് മാരിടൈം ഹെലികോപ്റ്ററുകൾ വാങ്ങാനുള്ള നടപടികൾ ഊർജ്ജിതമാക്കിയിട്ടുണ്ട്.
