മുംബൈ: ബോളിവുഡ് താരം ടൈഗർ ഷ്‌റോഫിന്റെ വാഹനത്തിന് നേരെ മുംബൈ ജൂഹുവിൽ വെടിവെപ്പുണ്ടായ സംഭവത്തിൽ ഞെട്ടിക്കുന്ന വെളിപ്പെടുത്തലുമായി മുംബൈ പോലീസ്. അക്രമികളുടെ പ്രധാന ലക്ഷ്യം നടൻ ആമിർ ഖാനായിരുന്നുവെന്നും, പദ്ധതി പാളിയതിനെ തുടർന്നാണ് ടൈഗർ ഷ്‌റോഫിലേക്ക് അക്രമികൾ തിരിഞ്ഞതെന്നുമാണ് പോലീസ് അന്വേഷണത്തിൽ വ്യക്തമായിരിക്കുന്നത്.
ഗുണ്ടാത്തലവൻ ലോറൻസ് ബിഷ്‌ണോയ് സംഘത്തിൽപ്പെട്ട ക്വാട്ടേഷൻ സംഘമാണ് ആക്രമണത്തിന് പിന്നിലെന്ന് കണ്ടെത്തിയിട്ടുണ്ട്. ആമിർ ഖാന്റെ മുംബൈ ബാന്ദ്രയിലെ വസതിയും പരിസരവും കേന്ദ്രീകരിച്ച് ആഴ്ചകളോളം ഇവർ കൃത്യമായ നിരീക്ഷണം (റെക്കി) നടത്തിയിരുന്നു. എന്നാൽ ഷൂട്ടിംഗിനായി ആമിർ ഖാൻ നിരന്തരം നഗരത്തിന് പുറത്തായിരുന്നതിനാലും, വീട്ടിലുള്ളപ്പോൾ ദിവസങ്ങളോളം പുറത്തിറങ്ങാത്ത പ്രകൃതക്കാരനായതിനാലും ഇയാളെ നേരിട്ട് കണ്ടെത്താൻ അക്രമികൾക്ക് സാധിച്ചില്ല. തുടർന്നാണ് എളുപ്പത്തിൽ ലക്ഷ്യമിടാൻ കഴിയുന്ന നടൻ എന്ന നിലയിൽ ടൈഗർ ഷ്‌റോഫിന് നേരെ ആക്രമണം നടത്താൻ സംഘം പദ്ധതി മാറ്റിയത്.
കഴിഞ്ഞ ജൂലൈ മാസത്തിൽ ആമിർ ഖാന്റെ വിവാഹത്തിന് പിന്നാലെ ലോറൻസ് ബിഷ്‌ണോയ് സംഘാംഗമെന്ന് അവകാശപ്പെടുന്ന അർസൂ ബിഷ്‌ണോയ് സോഷ്യൽ മീഡിയയിലൂടെ താരത്തിന് നേരെ വധഭീഷണി ഉയർത്തിയിരുന്നു. ആമിർ ഖാന്റെ വിവാഹം സനാതന ധർമത്തിനും രാജ്യത്തിന്റെ മൂല്യങ്ങൾക്കും എതിരാണെന്നും ഇതിന് ശക്തമായ മറുപടി നൽകുമെന്നുമായിരുന്നു ഭീഷണി സന്ദേശം. ഇതിന്റെ തുടർച്ചയായാണോ ആമിർ ഖാനെ അക്രമികൾ ലക്ഷ്യമിട്ടതെന്ന കാര്യത്തിൽ പോലീസ് വിശദമായ അന്വേഷണം നടത്തുന്നുണ്ട്.
സംഭവവുമായി ബന്ധപ്പെട്ട് രാജസ്ഥാനിലെ കോട്ടയിൽ നിന്നും മറ്റ് സ്ഥലങ്ങളിൽ നിന്നുമായി കേസിൽ ഉൾപ്പെട്ട മുഖ്യ പ്രതികളെ പോലീസ് പിടികൂടിയിട്ടുണ്ട്. അക്രമികൾ ഉപയോഗിച്ച തോക്കുകളും മറ്റ് ആയുധങ്ങളും കണ്ടെടുത്തിട്ടുണ്ട്. ബോളിവുഡ് താരങ്ങൾക്ക് നേരെയുള്ള ആക്രമണ ഭീഷണി ശക്തമായ പശ്ചാത്തലത്തിൽ ആമിർ ഖാൻ, സൽമാൻ ഖാൻ തുടങ്ങിയ പ്രമുഖ താരങ്ങളുടെ വസതികൾക്ക് മുന്നിൽ പോലീസ് സുരക്ഷ വർധിപ്പിച്ചിരിക്കുകയാണ്.
