രാജ്യത്തിന്റെ പ്രതിരോധ ശേഷി വർദ്ധിപ്പിക്കുന്നതിനായി 2.12 ലക്ഷം കോടി രൂപയുടെ സൈനിക ഏറ്റെടുക്കൽ നിർദ്ദേശങ്ങൾക്ക് പ്രതിരോധ മന്ത്രാലയം അനുമതി നൽകി. പ്രതിരോധ മന്ത്രി രാജ്നാഥ് സിംഗിന്റെ അധ്യക്ഷതയിൽ ചേർന്ന പ്രതിരോധ ഏറ്റെടുക്കൽ കൗൺസിൽ (ഡി.എ.സി) യോഗമാണ് വിവിധ മൂലധന ഏറ്റെടുക്കൽ നിർദ്ദേശങ്ങൾക്ക് തത്വത്തിൽ അനുമതി നൽകിയത്.
ഇന്ത്യൻ സൈന്യത്തിനായി 335 കെ9 വജ്ര-ടി (K9 VAJRA-T) സെൽഫ് പ്രൊപ്പെൽഡ് ട്രാക്ക്ഡ് ഗണ്ണുകൾ വാങ്ങുന്നതാണ് ഇതിലെ ഏറ്റവും പ്രധാനപ്പെട്ട തീരുമാനം. കിഴക്കൻ ലഡാക്ക് ഉൾപ്പെടെയുള്ള അതിർത്തികളിൽ പരീക്ഷിച്ചു വിജയിച്ച ഈ തോക്കുകൾ ആർട്ടിലറി റെജിമെന്റുകളുടെ മുഖ്യ കരുത്തായി മാറും. ഇതിനുപുറമേ ഉയർന്ന മൊബിലിറ്റി വാഹനങ്ങൾ, ഗൺ ഷോട്ട് റെസ്പോൺസ് സിസ്റ്റം, ലഘു മൾട്ടിറോൾ ഹെലികോപ്റ്ററുകൾ, അതിഹൃസ്വദൂര വ്യോമ പ്രതിരോധ സംവിധാനങ്ങൾ, വിവിധതരം ഡ്രോണുകൾ എന്നിവയും സൈന്യത്തിനായി വാങ്ങാൻ അനുമതി ലഭിച്ചിട്ടുണ്ട്. ‘മേക്ക് ഇൻ ഇന്ത്യ’ പദ്ധതിയുടെ ഭാഗമായി ലാർസൻ ആൻഡ് ടൂബ്രോയാണ് (L&T) കെ9 വജ്ര നിർമ്മിക്കുന്നത്.
നാവികസേനയുടെ കരുത്ത് വർദ്ധിപ്പിക്കുന്നതിനായി ആക്റ്റീവ് ഓഫ്‌ബോർഡ് ഡെക്കോയ് സിസ്റ്റം (AODS) ഉൾപ്പെടെയുള്ളവ വാങ്ങാനും യോഗം അനുമതി നൽകി. ശത്രുക്കളുടെ ആധുനിക മിസൈലുകളെ പ്രതിരോധിക്കുന്നതിനും നാവികസേനയുടെ യുദ്ധശേഷി വർദ്ധിപ്പിക്കുന്നതിനുമാണ് ഈ സംവിധാനങ്ങൾ ഉപയോഗിക്കുന്നത്. തദ്ദേശീയമായി രൂപകൽപ്പന ചെയ്ത് നിർമ്മിക്കുന്ന പുതിയ നാവിക പ്ലാറ്റ്‌ഫോമുകളും നാവികസേനയുടെ ഭാഗമാകും.
വ്യോമസേനയുടെ പ്രതിരോധ, യുദ്ധോപകരണ ശേഷി വർദ്ധിപ്പിക്കുന്നതിനുള്ള പ്രൊപ്പോസലുകൾക്കും യോഗം അംഗീകാരം നൽകി. ഇതിന്റെ ഭാഗമായി രാഷ്ട്രപതി, ഉപരാഷ്ട്രപതി, പ്രധാനമന്ത്രി തുടങ്ങിയ വിവിഐപികളുടെ യാത്രകൾക്കായി ഏകദേശം 10,000 കോടി രൂപ ചെലവിൽ 24 പുതിയ സ്പെഷ്യൽ യൂട്ടിലിറ്റി ഹെലികോപ്റ്ററുകൾ വാങ്ങും. നിലവിൽ ഉപയോഗത്തിലുള്ള റഷ്യൻ നിർമ്മിത എം.ഐ-17 വി5 (Mi17-V5) ഹെലികോപ്റ്ററുകൾക്ക് പകരമായാണ് പുതിയവ എത്തുന്നത്. യൂറോപ്യൻ കമ്പനിയായ എയർബസും അമേരിക്കൻ കമ്പനിയായ ലോക്ക്ഡീഡ് മാർട്ടിനും തമ്മിലാണ് ഇതിനായുള്ള പ്രധാന മത്സരം. കൂടാതെ വ്യോമ പ്രതിരോധ സംവിധാനങ്ങൾ, ആയുധങ്ങൾ, മൊബൈൽ എക്സ്-ബാൻഡ് ഡോപ്ലർ വെതർ റഡാർ സിസ്റ്റം എന്നിവയും വ്യോമസേനയ്ക്കായി ഏറ്റെടുക്കും.
