കൊച്ചി: പെരുമ്പാവൂരില്‍ നിയമ വിദ്യാര്‍ത്ഥി ജിഷയുടെ കൊലപാതകക്കേസില്‍ പ്രതി അമീറുള്‍ ഇസ്ലാമിനുവേണ്ടി അഡ്വ. ബി.എ. ആളൂര്‍ ഹാജരാകും. സൗമ്യ വധക്കേസ് പ്രതി ഗോവിന്ദച്ചാമിക്കുവേണ്ടി സുപ്രീം കോടതിയിലടക്കം ഹാജരായ അഭിഭാഷകനാണ് ആളൂര്‍. ആളൂരിനെ അഭിഭാഷകനായി നിയമിക്കണമെന്ന് ആവശ്യപ്പെട്ട് അമീറുള്‍ ഇസ്ലാം നല്‍കിയ അപേക്ഷ കോടതി അംഗീകരിച്ചു.
തനിക്ക് അഭിഭാഷകനായി അഡ്വക്കേറ്റ് ബിഎ ആളൂരിനെ വേണമെന്ന് ജിഷ കൊലക്കേസ് പ്രതി അമീറുള്‍ ഇസ്ലാം നേരത്തെ വിചാരണ കോടതിയില്‍ അപേക്ഷ നല്‍കിയിരുന്നു. കാക്കനാട് ജില്ലാ ജയില്‍ സൂപ്രണ്ട് മുഖേനെയാണ് അമീറുള്‍ അപേക്ഷ തയ്യാറാക്കി കോടതിയില്‍ സമര്‍പ്പിച്ചത്. ഹിന്ദി അറിയുന്ന അഭിഭാഷകനെ വേണമെന്നും അമീറുള്‍ അപേക്ഷയില്‍ ആവശ്യപ്പെട്ടിരുന്നു. നേരത്തെ അമീറുള്ളുമായി സംസാരിക്കാനും വക്കാലത്ത് ഒപ്പിടാനും ബിഎ ആളൂര്‍ ശ്രമിച്ചിരുന്നുവെങ്കിലും കോടതി അനുമതി നല്‍കിയിരുന്നില്ല. തുടര്‍ന്നാണ് വക്കീലായി ആളൂറിനെ വേണമെന്ന് അമീറുള്‍ അപേക്ഷ സമര്‍പ്പിച്ചത്.
കഴിഞ്ഞ ഏപ്രില്‍ 28 നാണ് രായമംഗലം പഞ്ചായത്തിലെ ഇരവിച്ചിറയില്‍ 29 കാരിയായ നിയമ വിദ്യാര്‍ഥിനി ജിഷയെ രാത്രി വീടിനുള്ളില്‍ മരിച്ചനിലയില്‍ കണ്ടത്. കൂലിപ്പണിക്ക് പോയിരുന്ന അമ്മ രാത്രി 8.30ന് വീട്ടിലെത്തിയപ്പോഴാണ് മൃതദേഹം കണ്ടത്. നെഞ്ചിലും കഴുത്തിലും തലയുടെ പിന്‍വശത്തും താടിയിലും ആയുധം കൊണ്ടുണ്ടായ മുറിവുണ്ടായിരുന്നു. ആന്തരാവയവങ്ങള്‍ വയര്‍പൊട്ടി പുറത്തുവന്ന നിലയിലായിരുന്നു. ചുരിദാറിന്റെ ടോപ്പ് മാത്രമേ ശരീരത്തില്‍ ഉണ്ടായിരുന്നുള്ളൂ. നാടിനെ നടുക്കിയ കൊലപാതകക്കേസില്‍ അസം സ്വദേശിയായ അമീറുള്‍ ഇസ്ലാമിനെ നീണ്ട അന്വേഷണത്തിനൊടുവില്‍ ജൂണ്‍ 14 ന് തമിഴ്‌നാട്ടിലെ കാഞ്ചീപുരത്തുനിന്ന് പോലീസ് അറസ്റ്റ് ചെയ്തു.
Discussion about this post