തിരുവനന്തപുരം : അന്തരിച്ച നിയമസഭാ സ്പീക്കറും മുന്മന്ത്രിയും കോണ്ഗ്രസ് നേതാവുമായ ജി. കാര്ത്തികേയന് ഇന്ന് കേരളം വിട പറയും . ഇന്നലെ രാവിലെ 10.35നു ബെംഗളൂരുവിലെ ഹെല്ത്ത് കെയര് ഗ്ലോബല് (എച്ച്സിജി) ആശുപത്രിയിലായിരുന്നു അന്ത്യം. ആറുമാസമായി കരളിലെ അര്ബുദത്തിനു ചികില്സയിലായിരുന്നു.
ഡല്ഹിയിലും മുംബൈയിലും അമേരിക്കയിലെ മയോക്ലിനിക്കിലും ചികില്സക്കു ശേഷം ആരോഗ്യം മെച്ചപ്പെട്ടെങ്കിലും രോഗം ഗുരുതരമായതിനെത്തുടര്ന്ന് സൈബര് നൈഫ് റോബട്ടിക് റേഡിയേഷന് തെറപ്പിക്കായി കഴിഞ്ഞ മാസം 19ന് എച്ച്സിജിയില് പ്രവേശിപ്പിക്കുകയായിരുന്നു. സംസ്കാരം ഇന്നു വൈകിട്ട് ആറിനു തൈക്കാട് ശാന്തികവാടത്തില് പൂര്ണ ഔദ്യോഗിക ബഹുമതികളോടെ. ഭാര്യ ഡോ.എം.ടി. സുലേഖ, സര്വവിജ്ഞാനകോശം ഡയറക്ടര്. മക്കള് അനന്തപത്മനാഭന് (എന്ജിനീയര്, ജക്കാര്ത്ത), ശബരീനാഥന്( എച്ച്ആര് മാനേജര്, ടാറ്റ, മുംബൈ)
ഇന്നലെ വൈകിട്ടോടയാണ് ബംഗളൂരുവില് നിന്നു പ്രത്യേക വിമാനത്തില് ജി.കാര്ത്തികേയന്റെ മൃതദേഹം തിരുവനന്തപുരത്ത് എത്തിച്ചത്. വിമാനത്താവളത്തില് മുഖ്യമന്ത്രി ഉമ്മന്ചാണ്ടിയുടെ നേതൃത്വത്തില് ഏറ്റുവാങ്ങി. കെഎസ്ആര്ടിസിയുടെ അലംകൃത വാഹനത്തില് വിലാപയാത്രയായി നിയമസഭാ സമുച്ചയത്തിലെ സ്പീക്കറുടെ ഔദ്യോഗിക വസതിയായ ‘നീതിയില് എത്തിച്ച മൃതദേഹം പൊതുദര്ശനത്തിനു വച്ചപ്പോള് നേതാക്കളടക്കം വന് ജനസഞ്ചയം ആദരാഞ്ജലി അര്പ്പിക്കാന് എത്തി.
സ്പീക്കര് ജി. കാര്ത്തികേയന്റെ മൃതദേഹം ഇന്നുരാവിലെ ഒന്പതിനു നിയമസഭാഹാളിലെത്തിച്ചു പൊതുദര്ശനത്തിനു വയ്ക്കും. 10 മുതല് 11 വരെ കെപിസിസി ആസ്ഥാനമായ ഇന്ദിരാഭവനിലും 11 മുതല് 12 വരെ സെക്രട്ടേറിയറ്റിലെ ദര്ബാര്ഹാളിലും പൊതുദര്ശനത്തിനുശേഷം ആര്യനാട്ടേക്കു കൊണ്ടുപോകും. 12.30 മുതല് മൂന്നുവരെ ആര്യനാട് ഗവ. ഹയര് സെക്കന്ഡറി സ്കൂളില് പൊതുദര്ശനം. തിരികെ കാര്ത്തികേയന്റെ സ്വന്തംവസതിയായ ശാസ്തമംഗലം ശ്രീരംഗം ലെയിനിലെ അഭയത്തില് എത്തിച്ചശേഷം ആറുമണിയോടെ വിലാപയാത്രയായി തൈക്കാട് ശാന്തികവാടത്തില് കൊണ്ടുവരും. പൂര്ണ ഔദ്യോഗിക ബഹുമതികളോടെയാവും സംസ്കാരം.
സ്പീക്കറോടുള്ള ആദരസൂചകമായി ഇന്ന് വൈകിട്ടുവരെ ദേശീയപതാക പകുതിതാഴ്ത്തി കെട്ടും. നിയമസഭാസമ്മേളനം തുടരുന്നതുമായി ബന്ധപ്പെട്ട കാര്യങ്ങള് ഡപ്യൂട്ടി സ്പീക്കര് എന്. ശക്തനുമായി ആലോചിച്ചു തീരുമാനിക്കുമെന്നു മുഖ്യമന്ത്രി ഉമ്മന്ചാണ്ടി അറിയിച്ചു.
കാര്ത്തികേയന്റെ നിര്യാണത്തില് അനുശോചിച്ച് കോണ്ഗ്രസിന്റെ എല്ലാ പൊതുപരിപാടികളും മാറ്റിവച്ചതായി കെപിസിസി പ്രസിഡന്റ് വി.എം. സുധീരന് അറിയിച്ചു. ഒരാഴ്ച ദുഃഖാചരണം നടത്താനും തീരുമാനിച്ചിട്ടുണ്ട്.
Discussion about this post