പനജി: കള്ളപ്പണത്തിനെതിരായ പ്രധാനമന്ത്രി നരേന്ദ്ര മോദിയുടെ മിന്നലാക്രമണം പ്രതികൂലമായത് ഭീകരവാദത്തിനും കൂടിയാണെന്ന് പ്രതിരോധമന്ത്രി മനോഹര്‍ പരീക്കര്‍. ഭീകരവാദത്തിനും കുറ്റകൃത്യങ്ങള്‍ക്കുമുള്ള ഫണ്ട് നല്‍കലിനെ മോദിയുടെ തീരുമാനം പ്രതികൂലമായി ബാധിച്ചു. ഇവയ്ക്കു പണം നല്‍കിയവരെ വീര്‍പ്പുമുട്ടിക്കുന്ന തീരുമാനമാണിതെന്നും പരീക്കര്‍ പറഞ്ഞു. നോട്ട് അസാധുവാക്കാനുള്ള പ്രധാനമന്ത്രിയുടെ തീരുമാനത്തിന് ഇന്ത്യന്‍ ജനത പൂര്‍ണ പിന്തുണ നല്‍കിയിട്ടുണ്ടെന്നും അദ്ദേഹം പറഞ്ഞു.
രാജ്യത്തിന്റെ സമ്പദ്‌വ്യവസ്ഥയെ ബാധിക്കുന്ന കള്ളപ്പണത്തിനെതിരെ പ്രധാനമന്ത്രി പ്രഖ്യാപിച്ചിരിക്കുന്ന മറ്റൊരു യുദ്ധമാണ് നോട്ട് അസാധുവാക്കല്‍. രാജ്യത്തെ പണപ്പെരുപ്പത്തിന് ഒരു പരിധിവരെ കാരണമായിരിക്കുന്നത് കള്ളപ്പണമാണ്. ഉയര്‍ന്ന മൂല്യമുള്ള നോട്ടുകള്‍ അസാധുവാക്കിയതോടെ ഭീകരരിലേക്കും ക്രിമിനലുകളിലേക്കും എത്തിയിരുന്ന പണത്തില്‍ കുറവുവന്നിട്ടുണ്ടെന്നും പരീക്കര്‍ വ്യക്തമാക്കി. ശത്രുക്കള്‍ക്കു വളരെ ശക്തമായ മറുപടിയാണ് അതിര്‍ത്തിയില്‍ നല്‍കുന്നത്. പകരത്തിനു പകരമായുള്ള ഏറ്റുമുട്ടലാണു നടക്കുന്നത്. രാജ്യത്തിന്റെ അതിര്‍ത്തികളെല്ലാം സുരക്ഷിതമാണെന്നും പരീക്കര്‍ പറഞ്ഞു.
Discussion about this post