തിരുവനന്തപുരം: ലോ അക്കാദമിയില്‍ ആഴ്ചകളായി തുടരുന്ന വിദ്യാര്‍ഥി സമരം ഇന്ന് അവസാനിച്ചേക്കും.പ്രിന്‍സിപ്പല്‍ ലക്ഷ്മി നായരെ മാറ്റിയുള്ള പ്രശ്നപരിഹാരത്തിനായി മാനേജ്മെന്റ് തയ്യാറാവുന്നുവെന്നാണ് വിവരം. വിദ്യാര്‍ഥി പ്രതിനിധികളുമായും മാനേജ്മെന്റ് ചര്‍ച്ച നടത്തും. എട്ടുമണിക്കാണ് വിദ്യാര്‍ഥി പ്രതിനിധികളുമായുള്ള ചര്‍ച്ച. സമരം ഇന്ന് തന്നെ അവസാനിപ്പിക്കാന്‍ ശ്രമിക്കുമെന്ന് ഡയറക്ടര്‍ നാരായണന്‍ നായര്‍ മാധ്യമങ്ങളോട് പറഞ്ഞു.
സര്‍ക്കാര്‍ ഇടപെട്ട് ലക്ഷ്മി നായരെ പുറത്താക്കുന്നത് ഒഴിവാക്കി പകരം സ്വമേധയ രാജിവെച്ച് മാറുന്നതടക്കമുള്ള സമവായ ചര്‍ച്ചകള്‍ സിപിഎം നേതൃത്വവുമായി ലോ അക്കാദമി മാനേജ്മെന്റ് നടത്തിയിരുന്നു.
മാനേജ്മെന്റ് പറയുന്ന ഏത് തീരുമാനവും അംഗീകരിക്കാമെന്ന് ലക്ഷ്മി നായര്‍ വ്യക്തമാക്കി. ഇന്ന് വൈകീട്ട് ചേര്‍ന്ന ഡയറക്ടര്‍ ബോര്‍ഡ് യോഗത്തില്‍ പ്രിന്‍സിപ്പല്‍ സ്ഥാനത്തു നിന്നും മാറി നില്‍ക്കണമെന്ന് ലക്ഷ്മി നായര്‍ക്ക് നിര്‍ദ്ദേശം നല്‍കിയിരുന്നു. ഇതിന് പിറകെയാണ് രാജിസന്നദ്ധത ലഷ്മി നായര്‍ തന്നെ അറിയിച്ചത്.
പ്രിന്‍സിപ്പല്‍ സ്ഥാനം രാജിവെക്കില്ലെന്ന ഉറച്ച തീരുമാനമാണ് ലക്ഷ്മി നായരോട് മാറി നില്‍ക്കാന്‍ ഡയറക്ടര്‍ബോര്‍ഡ് ആവശ്യപ്പെടാന്‍ ഇടയാക്കിയത്. വൈകീട്ട് വിദ്യാര്‍ത്ഥികളുമായി ഡയറക്ടര്‍ ബോര്‍ഡ് ചര്‍ച്ച നടത്തിയ ശേഷമാകും അന്തിമ തീരുമാനമുണ്ടാകുക..
ലക്ഷ്മി നായര്‍ പ്രിന്‍സിപ്പന്‍ സ്ഥാനം ഒഴിഞ്ഞാല്‍ ലോ അക്കാദമിക്ക് മുന്നില്‍ പത്തൊമ്പത് ദിവമായി വിദ്യാര്‍ത്ഥികള്‍ നടത്തുന്ന സമരം അവസാനിപ്പിച്ചേക്കും.
Discussion about this post