ജീവിതത്തിൽ ഏറെ ആരാധിക്കുകയും ബഹുമാനിക്കുകയും ചെയ്യുന്ന നടിയാണ് നയൻതാരയെന്ന് മാളവിക മോഹനൻ. ഒരു സീനിയർ എന്ന നിലയിൽ അവരുടെ അവിശ്വസനീയമായ യാത്രയെ ശരിക്കും നോക്കിക്കാണുന്നുവെന്നും മാളവിക പറയുന്നു.
കഴിഞ്ഞ ദിവസങ്ങളിൽ അഭിമുഖത്തിനിടെ നായികമാരെ ലേഡി സൂപ്പർസ്റ്റാറെന്ന് വിളിക്കാതെ സൂപ്പർ സ്റ്റാർ എന്ന് വിളിച്ചാൽ മതിയെന്ന് മാളവിക പറഞ്ഞിരുന്നു. ഒരു യൂട്യൂബ് ചാനലിന് നൽകിയ അഭിമുഖത്തിലാണ് മാളവിക ലേഡി സൂപ്പർസ്റ്റാർ എന്ന വിശേഷണത്തിനെതിരെ പ്രതികരിച്ചത്.
നായകന്മാരെ എന്നപോലെ നായികമാരെയും സൂപ്പർ സ്റ്റാർ എന്ന് വിളിക്കുന്ന സാഹചര്യമുണ്ടാവണം. ലേഡി സൂപ്പർസ്റ്റാർ എന്നാലെന്താണ്? അതിൽ ലേഡിയുടെ ആവശ്യമില്ല. ദീപികാ പദുക്കോണിനേയും ആലിയാ ഭട്ടിനേയും കത്രീനാ കെയ്ഫിനെയുമെല്ലാം സൂപ്പർ സ്റ്റാർ എന്നല്ലേ വിളിക്കുന്നതെന്നും മാളവിക ചോദിച്ചിരുന്നു. ഈ പരാമർശത്തിനെതിരെ നയൻതാര ആരാധകരിൽ നിന്ന് രൂക്ഷവിമർശനം ഉയർന്നിരുന്നു.
എന്നാൽ തന്റെ അഭിപ്രായം സ്ത്രീ അഭിനേതാക്കളെ വിശേഷിപ്പിക്കാൻ ഉപയോഗിക്കുന്ന ഒരു പദത്തെക്കുറിച്ചാണ്, അല്ലാതെ ഏതെങ്കിലും പ്രത്യേക താരത്തെക്കുറിച്ചല്ലെന്ന് മാളവിക വ്യക്തമാക്കി. ”ഞാൻ നയൻതാരയെ ശരിക്കും ബഹുമാനിക്കുകയും ആരാധിക്കുകയും ചെയ്യുന്നു. ഒരു സീനിയർ എന്ന നിലയിൽ അവരുടെ അവിശ്വസനീയമായ യാത്രയെ ഞാൻ ശരിക്കും നോക്കിക്കാണുന്നു. ഇനിയെങ്കിലും നിങ്ങൾ ഒന്നടങ്ങൂ.”മാളവിക ട്വീറ്റ് ചെയ്തു.
Discussion about this post