തിരുവനന്തപുരം: സ്ത്രീകള്ക്കെതിരെ പെരുകുന്ന കുറ്റകൃത്യങ്ങള്ക്ക് തടയിടുന്നതിന്റെ ഭാഗമായി പൊലീസ് രാത്രി യാത്രകളില് ഒറ്റപ്പെടുന്ന സ്ത്രീകള്ക്ക് സൗജന്യ യാത്ര ഒരുക്കുന്നതായി ഒരു കുറിപ്പ് സാമൂഹ്യമാധ്യമങ്ങളില് വൈറലാണ്. ഇതിനായി ഹെല്പ് ലൈനുള്ളതായും കുറിപ്പില് പറയുന്നു. എന്താണ് ഇതിന് പിന്നിലെ യാഥാര്ത്ഥ്യം എന്ന് നോക്കാം
കുറിപ്പ് ഇങ്ങനെ
‘വര്ധിച്ചുവരുന്ന കുറ്റകൃത്യങ്ങള് കണക്കിലെടുത്ത് രാത്രി 10 മുതല് രാവിലെ 6 വരെ വീട്ടിലേക്ക് പോകാന് വണ്ടികാത്ത് ഒറ്റയ്ക്കിരിക്കുന്ന ഏതൊരു സ്ത്രീക്കും പൊലീസ് ഹെല്പ്പ് ലൈനുമായി ബന്ധപ്പെടാവുന്ന സൗജന്യ യാത്രാപദ്ധതി കഴിഞ്ഞ ബുധനാഴ്ച മുതല് ആരംഭിച്ചിട്ടുണ്ട് (No 1091, 100, 7837018555) ഒരു വാഹനം ആവശ്യപ്പെടുക. അവര് 24×7 മണിക്കൂറും പ്രവര്ത്തിക്കും. കണ്ട്രോള് റൂം വാഹനമോ അടുത്തുള്ള PCR വാഹനമോ SHO വാഹനമോ അവളെ സുരക്ഷിതമായി ലക്ഷ്യസ്ഥാനത്ത് എത്തിക്കും. ഇത് സൗജന്യമാണ്. നിങ്ങള്ക്ക് അറിയാവുന്ന എല്ലാവരിലേക്കും ഈ സന്ദേശം പ്രചരിപ്പിക്കുക.
നിങ്ങളുടെ ഭാര്യയ്ക്കും പെണ്മക്കള്ക്കും സഹോദരിമാര്ക്കും അമ്മമാര്ക്കും സുഹൃത്തുക്കള്ക്കും നിങ്ങള്ക്ക് അറിയാവുന്ന എല്ലാ സ്ത്രീകള്ക്കും നമ്പര് അയക്കുക. അവരോട് അത് സേവ് ചെയ്യാന് ആവശ്യപ്പെടുക. എല്ലാ പുരുഷന്മാരും ദയവായി നിങ്ങള്ക്കറിയാവുന്ന എല്ലാ സ്ത്രീകളുമായും ഷെയര് ചെയ്യുക. അടിയന്തിര സാഹചര്യങ്ങളില് സ്ത്രീകള് ബ്ലാങ്ക് മെസേജ് അല്ലെങ്കില് മിസ്ഡ് കോള്… നല്കുക. അങ്ങനെ പൊലീസിന് നിങ്ങളുടെ ലൊക്കേഷന് കണ്ടെത്താനും നിങ്ങളെ സഹായിക്കാനും കഴിയും. ഇത് ഇന്ത്യ മുഴുവന് ബാധകമാണ്’- വാട്സ്ആപ്പിലും ഫേസ്ബുക്കിലും വൈറലായ സന്ദേശത്തിലുള്ളത് ഇത്രയും വിവരങ്ങളാണ്.
ഇനി കേരള പൊലീസിന്റെ മീഡിയ സെന്റര് 2024 ഓഗസ്റ്റ് 25ന് എഫ്ബിയില് പങ്കുവെച്ച വിവരങ്ങള് കാണാം. വൈറലായിരിക്കുന്ന കുറിപ്പ് വ്യാജമാണെന്നും ഇത്തരമൊരു അറിയിപ്പ് കേരള പൊലീസ് പുറപ്പെടുവിച്ചിട്ടില്ല എന്നും കേരള പൊലീസ് മീഡിയ സെന്ററിന്റെ ഫേസ്ബുക്ക് പോസ്റ്റിലുണ്ട്. വ്യാജവാര്ത്തകള് നിര്മ്മിക്കുന്നതു മാത്രമല്ല പ്രചരിപ്പിക്കുന്നതും കുറ്റകരമാണ് എന്നും മീഡിയ സെന്റര് വ്യക്തമാക്കുന്നു.
Discussion about this post