എവിടെയും പോകാതെ വീട്ടില്‍ വിശ്രമിക്കുകയായിരുന്നു തന്റെ അക്കൗണ്ടില്‍ നിന്നും 220 രൂപ ടോള്‍ ഈടാക്കിയെന്ന വെളിപ്പെടുത്തലുമായി പഞ്ചാബ് സ്വദേശി. 2024 ഓഗസ്റ്റ് 14 -ന് ഉച്ചയ്ക്ക് 2 മണിക്ക് ലഡോവല്‍ ടോള്‍ പ്ലാസയില്‍ വച്ച് കിഴിവ് നടത്തിയതാണ് സുന്ദര്‍ദീപ് സിംഗ് എന്ന വ്യക്തി എക്‌സില്‍ കുറിച്ചത്. അക്കൗണ്ടില്‍ നിന്നും പണം ഈടാക്കുമ്പോള്‍ താന്‍ എവിടെയും പോകാതെ വീട്ടില്‍ വിശ്രമിക്കുകയായിരുന്നുവെന്നും ഈ മാസം ഒരിക്കല്‍ പോലും താനാ റൂട്ടില്‍ പോയിട്ടില്ലെന്നും അദ്ദേഹം പറയുന്നു.
എന്താണ് സംഭവിക്കുന്നതെന്ന് തനിക്ക് മനസ്സിലാകുന്നില്ലെന്നും അദ്ദേഹം തന്റെ പോസ്റ്റില്‍ കുറിച്ചു. അനധികൃതമായി പണം ഈടാക്കിയതിന് ശേഷം ഫാസ്ടാഗ് അക്കൗണ്ടില്‍ ബാക്കിയുള്ളത് 790 രൂപയാണെന്നും സ്‌ക്രീന്‍ഷോട്ടില്‍ വ്യക്തമാണ്. അതേസമയം, സുന്ദര്‍ ദീപിന്റെ പോസ്റ്റ് ശ്രദ്ധയില്‍പ്പെട്ട ടോള്‍ പ്ലാസ സിംഗിനോട് ബാങ്കിന്റെ കസ്റ്റമര്‍ സര്‍വീസ് ഡെസ്‌കുമായി ബന്ധപ്പെട്ട് പരാതി നല്‍കാന്‍ ആവശ്യപ്പെട്ടിട്ടുണ്ട്.
അനധികൃതമായാണ് പണം ഈടാക്കിയതെന്ന് കണ്ടെത്തിയാല്‍ പണം തിരികെ നല്‍കുമെന്നും അവര്‍ ഉറപ്പു നല്‍കി. 6 ലക്ഷത്തിലധികം ആളുകളാണ് ഈ പോസ്റ്റ് ഇതുവരെ കണ്ടത്. സമാനമായ ദുരനുഭവം തങ്ങള്‍ക്കും നേരിട്ടതായി നിരവധി പേര് പോസ്റ്റിന് താഴെ കുറിച്ചു. ഇത്തരം സംഭവങ്ങള്‍ക്കെതിരെ ശക്തമായി പ്രതികരിക്കണമെന്നും ഇവര്‍ പറയുന്നു.
Discussion about this post