ന്യൂഡൽഹി: രാജ്യത്ത് ഏക സിവിൽ കോഡ് നിയമം നടപ്പിലാക്കുന്നത് വൈകില്ലെന്ന് സൂചന. നിയമം രാജ്യത്ത് നടപ്പിലാക്കാനുള്ള സാധ്യത തേടി കേന്ദ്രസർക്കാർ ചർച്ചകൾ നടത്തുന്നുണ്ടെന്ന് വിവരം. ഏകസിവിൽകോഡുമായി ബന്ധപ്പെട്ട് കേന്ദ്ര ആഭ്യന്തരമന്ത്രി അമിത് ഷാ ഉന്നതതലയോഗം ചേർന്നു.
കേന്ദ്രനിയമമന്ത്രി കിരൺ റിജിജുവും,സോളിസിറ്റർ ജനറൽ തുഷാർ മേത്തയും ഉന്നതല ഉദ്യോഗസ്ഥരും ചർച്ച നടത്തിയെന്നാണ് റിപ്പോർട്ടുകൾ.ഏക സിവിൽകോഡിൽ സർക്കാർ നടത്തുന്ന ആദ്യ യോഗമാണിത്. വരാനിരിക്കുന്ന പാർലമെന്റിന്റെ വർഷകാല സമ്മേളനത്തിൽ ഇത് സംബന്ധിച്ച് ബിൽ കൊണ്ടുവരുമെന്നും സൂചനയുണ്ട്.
ഏക സിവിൽകോഡ് കൊണ്ടുവരുന്നതിന് സർക്കാർ പ്രതിജ്ഞാബദ്ധമാണെന്നും എല്ലാ ജനാധിപത്യപരമായ നടപടിക്രമങ്ങളും പാലിച്ച് ഉചിതമായ സമയത്ത് അത് കൊണ്ടുവരുമെന്നും അമിത് ഷാ നേരത്തെ വ്യക്തമാക്കിയിരുന്നു.
കേന്ദ്രസർക്കാർ ഏക സിവിൽകോഡിനെ പിന്തുണയ്ക്കുന്നതായും കോടതി ഉത്തരവിലൂടെയല്ല, പാർലമെൻറിൽ നിയമനിർമാണത്തിലൂടെയാകും നിയമം രാജ്യത്ത് നടപ്പിലാക്കുകയെന്നും സോളിസിറ്റർ ജനറൽ സുപ്രീംകോടതി അറിയിച്ചിരുന്നു.
Discussion about this post