ഇന്ത്യയുടെ പ്രധാനമന്ത്രി നരേന്ദ്ര മോദിയുടെ ചരിത്രപരമായ ന്യൂസിലൻഡ് സന്ദർശനത്തെ പ്രകീർത്തിച്ച് മുൻ ന്യൂസിലൻഡ് ക്രിക്കറ്റ് ഇതിഹാസം റോസ് ടെയ്ലർ. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തിൽ ഇതൊരു നിർണായകവും സവിശേഷവുമായ നിമിഷമാണെന്ന് അദ്ദേഹം വിശേഷിപ്പിച്ചു. ഓക്ലൻഡിൽ പ്രധാനമന്ത്രി നരേന്ദ്ര മോദിയും ന്യൂസിലൻഡ് പ്രധാനമന്ത്രി ക്രിസ്റ്റഫർ ലക്സനും ഒരുമിച്ച് പങ്കെടുത്ത ഉന്നതതല കായിക ചടങ്ങിനിടെ മാധ്യമ ഏജൻസിയായ എഎൻഐയോട് സംസാരിക്കുകയായിരുന്നു അദ്ദേഹം. നാല് പതിറ്റാണ്ടിന് ശേഷമാണ് ഒരു ഇന്ത്യൻ പ്രധാനമന്ത്രി ന്യൂസിലൻഡ് മണ്ണിൽ കാൽകുത്തുന്നത് എന്നതിനാൽ ഈ സന്ദർശനത്തിന് വലിയ പ്രാധാന്യമുണ്ടെന്ന് ടെയ്ലർ ചൂണ്ടിക്കാട്ടി. ന്യൂസിലൻഡുമായുള്ള ബന്ധത്തിന് പ്രധാനമന്ത്രി മോദി എത്രത്തോളം മൂല്യം കൽപ്പിക്കുന്നു എന്നാണ് ഇത് വ്യക്തമാക്കുന്നതെന്നും അദ്ദേഹത്തെ സ്വീകരിക്കാൻ കഴിഞ്ഞതിൽ തങ്ങളുടെ പ്രധാനമന്ത്രി ലക്സന് വലിയ സന്തോഷമുണ്ടെന്നും ടെയ്ലർ കൂട്ടിച്ചേർത്തു.
അന്താരാഷ്ട്ര ക്രിക്കറ്റിലെ പ്രമുഖനായ റോസ് ടെയ്ലർ, ഇരു രാജ്യങ്ങളും തമ്മിലുള്ള സൗഹൃദം കേവലം കളിസ്ഥലങ്ങൾക്ക് മാത്രമായി ഒതുങ്ങുന്നതല്ലെന്ന് ഓർമ്മിപ്പിച്ചു. സ്പോർട്സിലൂടെ മികച്ചൊരു മത്സരവീര്യവും സൗഹൃദവും ഇരു രാജ്യങ്ങളും തമ്മിലുണ്ടെന്നും, വരാനിരിക്കുന്ന സ്വതന്ത്ര വ്യാപാര കരാറിലൂടെ ഇരു രാജ്യങ്ങളിലെയും ബിസിനസ്സ് സമൂഹത്തിന് പരസ്പരം സഹകരിക്കാൻ ഇതൊരു നല്ല അവസരമൊരുക്കുമെന്നും അദ്ദേഹം പറഞ്ഞു. കായിക രംഗത്തെ നൂറു വർഷത്തെ ഒത്തൊരുമയെ അനുസ്മരിക്കുന്ന ‘100 ഇയേഴ്സ് ഓഫ് യൂണിറ്റി ത്രൂ സ്പോർട്സ്’ ആഘോഷങ്ങളുടെ ഭാഗമായാണ് ഈ സന്ദർശനം നടക്കുന്നത്.
1926-ൽ ഹോക്കി ഇതിഹാസം മേജർ ധ്യാൻ ചന്ദ് നടത്തിയ ചരിത്രപരമായ ന്യൂസിലൻഡ് പര്യടനത്തോടെയാണ് ഈ കായിക ബന്ധത്തിന് തുടക്കമായത്. കായിക മേഖലയിലെ സഹകരണം കൂടുതൽ ആധുനികവൽക്കരിക്കുന്നതിനായി സ്പോർട്സ് സയൻസ്, ഹൈ-പെർഫോമൻസ് കോച്ചിങ്, സ്പോർട്സ് ബിസിനസ് എന്നിവ വ്യാപിപ്പിക്കാൻ ലക്ഷ്യമിട്ടുള്ള ‘ഇന്ത്യ-ന്യൂസിലൻഡ് ജോയിന്റ് ആക്ഷൻ പ്ലാൻ ഓൺ സ്പോർട്സ്’ ഇരു പ്രധാനമന്ത്രിമാരും സ്വാഗതം ചെയ്തു.
കായിക നയതന്ത്രത്തെക്കുറിച്ചുള്ള ചോദ്യത്തിന് മറുപടിയായി, വ്യത്യസ്ത സംസ്കാരങ്ങളെ പരസ്പരം ബന്ധിപ്പിക്കുന്നതിനുള്ള ഒരു സവിശേഷമായ പാലമാണ് കായിക രംഗമെന്ന് ടെയ്ലർ വ്യക്തമാക്കി. ഇരു രാജ്യങ്ങളും തമ്മിലുള്ള സൗഹൃദം കൂടുതൽ ശക്തമാക്കാൻ സ്പോർട്സിന് സാധിക്കുമെന്നും, 2036 ഒളിമ്പിക്സ് വേദിയാകാൻ തയ്യാറെടുക്കുന്ന ഇന്ത്യയ്ക്ക് തങ്ങൾ വർഷങ്ങളായി ആർജ്ജിച്ച സാങ്കേതിക വിദ്യകളും കായിക നവീകരണങ്ങളും പങ്കുവെക്കാൻ ന്യൂസിലൻഡ് സന്നദ്ധമാണെന്നും അദ്ദേഹം പറഞ്ഞു.
ഇരു രാജ്യങ്ങളും തമ്മിലുള്ള ബന്ധം ഇനി ക്രിക്കറ്റിന് അപ്പുറത്തേക്ക് റഗ്ബി പോലുള്ള കായിക ഇനങ്ങളിലേക്കും വളരുകയാണെന്ന് പ്രധാനമന്ത്രി മോദിയും നേരത്തെ വ്യക്തമാക്കിയിരുന്നു. ഇതിന്റെ ഭാഗമായി ഭുവനേശ്വറിൽ ന്യൂസിലൻഡ് റഗ്ബി സംഘടിപ്പിച്ച കോച്ചിങ് പ്രോഗ്രാം വിജയകരമായ തുടക്കമാണെന്നും അദ്ദേഹം ചൂണ്ടിക്കാട്ടിയിരുന്നു. ന്യൂസിലൻഡിന്റെ ഏറ്റവും മികച്ച അത്ലറ്റുകളിൽ ഒരാളായ റോസ് ടെയ്ലർ, ക്രിക്കറ്റിലെ മൂന്ന് ഫോർമാറ്റുകളിലും 100 മത്സരങ്ങൾ വീതം കളിക്കുന്ന ചരിത്രത്തിലെ ആദ്യ താരമാണ്.
16 വർഷത്തെ കരിയറിൽ 18,105 റൺസും 40 സെഞ്ചുറികളും നേടിയ അദ്ദേഹം, 2022-ൽ അന്താരാഷ്ട്ര ക്രിക്കറ്റിൽ നിന്ന് വിരമിച്ചിരുന്നെങ്കിലും 2025-ൽ തന്റെ അമ്മയുടെ ജന്മനാടായ സമോവയ്ക്ക് വേണ്ടി കളിക്കാൻ 41-ാം വയസ്സിൽ അന്താരാഷ്ട്ര ക്രിക്കറ്റിലേക്ക് തിരിച്ചെത്തി കായിക ലോകത്തെ ഞെട്ടിച്ചിരുന്നു.
