ഡല്‍ഹി: ഇന്ത്യന്‍ ചാരനെന്നാരോപിച്ച് പാക് സൈനിക കോടതി വധശിക്ഷയ്ക്കു വിധിച്ച കുല്ഭൂഷണ് യാദവിനെതിരെ പാക്കിസ്ഥാന്‍ രംഗത്ത്. ഇന്ത്യന്‍ രഹസ്യാന്വേഷണ ഏജന്‍സിയായ റോയുടെ മേധാവിയുമായി കുല്ഭൂഷണ് ബന്ധമുണ്ടെന്നാണ് പാകിസ്ഥാന്‍റെ വാദം. ഏറ്റവും അവസാനമായി പുറത്തുവന്ന വീഡിയോയില്‍, അനില്‍ കുമാര്‍ ഗുപ്ത എന്ന റോയിലെ ഉദ്യോഗസ്ഥനാണ് സിന്ധ്, ബലൂചിസ്ഥാന്‍ മേഖലയിലെ ഭീകരപ്രവര്‍ത്തനങ്ങള്‍ക്ക് സഹായിച്ചതെന്ന് യാദവ് പറയുന്നുണ്ട്.
ഇന്ത്യന്‍ സര്‍ക്കാരിനോട് പാകിസ്ഥാന്‍ ഇക്കാര്യം ഔദ്യോഗികമായി അറിയിച്ചിട്ടുണ്ടോ എന്ന കാര്യം വ്യക്തമല്ല. അതേസമയം യാദവിന്റെ വിചാരണയും റോ മേധാവിക്ക് നേരെയുള്ള ആരോപണവും പ്രഹസനമാണെന്ന് ഇന്ത്യ പ്രതികരിച്ചു.
തെറ്റ് ചെയ്തതായി സമ്മതിക്കുന്നുവെന്നും വധശിക്ഷയില്‍ നിന്ന് ഒഴിവാക്കണമെന്നും അപേക്ഷിച്ച് സൈനിക മേധാവിക്ക് യാദവ് ദയാഹര്‍ജി നല്‍കിയതായി പാകിസ്ഥാന്‍ കഴിഞ്ഞ ദിവസം അറിയിച്ചിരുന്നു. യാദവിന്റെ വധശിക്ഷ ഹേഗിലെ അന്താരാഷ്ട്ര കോടതി സ്‌റ്റേ ചെയ്തിരിക്കുകയാണ്.
മഹാരാഷ്ട്രയിലെ സാംഗ്ലി സ്വദേശിയായ മുന്‍ നാവികസേനാ ഉദ്യോഗസ്ഥന്‍ ജാധവിനെ 2016 മാര്‍ച്ചിലാണ് പാകിസ്ഥാന്‍ രഹസ്യാന്വേഷണ വിഭാഗം അറസ്റ്റ് ചെയ്തത്. തുടര്‍ന്ന് ഇക്കഴിഞ്ഞ ഏപ്രിലില്‍ അദ്ദേഹത്തെ പാക് സൈനികക്കോടതി വധശിക്ഷയ്ക്ക് വിധിച്ചു. ഇന്ത്യയുടെ രഹസ്യാന്വേഷണ സംഘടനയായ ‘റോ'(റിസര്‍ച്ച് ആന്‍ഡ് അനാലിസിസ് വിങ്)യുടെ ഏജന്റായ യാദവ് ബലൂചിസ്ഥാനില്‍ പാകിസ്ഥാന്‍ വിരുദ്ധ പ്രവര്‍ത്തനങ്ങള്‍ ആസൂത്രണം ചെയ്‌തെന്നാരോപിച്ചായിരുന്നു ശിക്ഷ. ഇതിനെതിരെയാണ് ഇന്ത്യ അന്താരാഷ്ട്രക്കോടതിയെ സമീപിച്ചത്.
Discussion about this post