ഡിസംബര്‍ 23ന് മലചവിട്ടാനെത്തുമെന്നറിയിച്ച വനിതകള്‍ക്ക് സര്‍ക്കാര്‍ സംരക്ഷണം നല്‍കുമെന്ന് ഉറപ്പ് നല്‍കിയിട്ടുണ്ടെന്ന് സംഘാടകര്‍ അറിയിച്ചു. മലചവിട്ടുമെന്നറിയിച്ച വനിത സംഘടനയായ ‘മനിതി’ രണ്ടാഴ്ച മുന്‍പ് തങ്ങള്‍ക്ക് സംരക്ഷണം വേണമെന്ന ആവശ്യവുമായി മുഖ്യമന്ത്രി പിണറായി വിജയന് കത്തയച്ചിരുന്നു. ഇതിന് മറുപടിയായി പിന്തുണ നല്‍കുമെന്ന് മുഖ്യമന്ത്രിയുടെ ഓഫിസ് ശനിയാഴ്ച അറിയിച്ചതായി ‘മനിതി’യുടെ കോ ഓഡിനേറ്റര്‍ സെല്‍വി വ്യക്തമാക്കി. സുരക്ഷ നല്‍കണമെന്ന നിര്‍ദ്ദേശവുമായി മുഖ്യമന്ത്രിയുടെ ഓഫീസില്‍ നിന്നും പൊലീസിന് ഇ-മെയില്‍ അയച്ചിട്ടുണ്ട്.
കേരളത്തിന് പുറമെ നാല് സംസ്ഥാനങ്ങളിലെ സ്ത്രീകളും മലചവിട്ടാനെത്തുന്നതായിരിക്കും. കര്‍ണാടക, ഒഡിഷ, മധ്യപ്രദേശ് എന്നീ സംസ്ഥാനങ്ങളില്‍ നിന്നും ആള്‍ ഇന്ത്യ റാഡിക്കല്‍ വിമെന്‍ ഓര്‍ഗനൈസേഷന്‍ (എ.ഐ.ആര്‍.ഡബ്ല്യു.ഒ) എന്ന സംഘടനയിലെ യുവതികളും സംഘത്തിലുണ്ടാകും. ഡിസംബര്‍ 22ന് ചെന്നൈയില്‍ നിന്നും യാത്ര തിരിച്ച് ഡിസംബര്‍ 23ന് അയ്യപ്പദര്‍ശനത്തിനെത്താനാണ് പദ്ധതി. ‘മനിതി’ സംഘടനയ്ക്ക് പുറമെ ‘നവോത്ഥാന കേരളം ശബരിമലയിലേക്ക്’എന്ന ഫേസ്ബുക്ക് കൂട്ടായ്മയുടെ അംഗങ്ങളും ദര്‍ശനത്തിനെത്തുന്നതായിരിക്കും.
സംസ്ഥാന സര്‍ക്കാരിലും മുഖ്യമന്ത്രി പിണറായി വിജയനിലും തങ്ങള്‍ക്ക് പൂര്‍ണ്ണ വിശ്വാസമുണ്ടെന്ന് ‘മനിതി’ അറിയിച്ചു. തങ്ങള്‍ക്ക് വേണ്ട സുരക്ഷ നിര്‍ദേശങ്ങള്‍ സമയമാകുമ്പോള്‍ പൊലീസ് നല്‍കുമെന്നാണ് പ്രതീക്ഷയെന്നും അവര്‍ പറഞ്ഞു.
Discussion about this post