കൊച്ചി: പൗരത്വ ഭേദഗതി നിയമത്തിനെതിരായ പ്രതിഷേധത്തില്‍ പങ്കെടുത്ത നോര്‍വീജിയന്‍ വനിത യാന്‍ മേഥെ ജൊഹാന്‍സനോട് ഇന്ത്യ വിടാന്‍ നിര്‍ദേശം. വീസ ചട്ടങ്ങള്‍ ലംഘിച്ചു എന്നതിന്റെ പേരിലാണു നടപടി. സമരത്തില്‍ പങ്കെടുത്ത ഇവരെ കേന്ദ്ര ആഭ്യന്തര മന്ത്രാലയത്തിനു കീഴിലുള്ള ഫോറിനേഴ്സ് റീജിയണല്‍ റജിസ്ട്രേഷന്‍ ഓഫിസ് (എഫ്‌ആര്‍ആര്‍ഒ) അധികൃതര്‍ വ്യാഴാഴ്ച ചോദ്യം ചെയ്തിരുന്നു. തുടര്‍ന്നാണ് രാജ്യം വിടാന്‍ നിര്‍ദേശം നല്‍കിയത്.
‘പൗരത്വ നിയമത്തിനെതിരായി കൊച്ചിയില്‍ തിങ്കളാഴ്ച നടന്ന പീപ്പിള്‍സ് ലോങ് മാര്‍ച്ചില്‍ യാന്‍ മേഥെ ജൊഹാന്‍സന്‍ പങ്കെടുത്തതായി പ്രഥമദൃഷ്ട്യാ തെളിവുണ്ട്. ഇവര്‍ ഗൗരവമായാണോ പ്രതിഷേധത്തില്‍ പങ്കാളിയായത് എന്നാണ് അന്വേഷിച്ചത്.’- കൊച്ചിയിലെ എഫ്‌ആര്‍ആര്‍ഒ ചുമതലയുള്ള അനൂപ് കൃഷ്ണന്‍ ഐപിഎസ് പറഞ്ഞു.
വിദേശ പൗരന്മാര്‍ ഇന്ത്യയില്‍ പ്രതിഷേധങ്ങളില്‍ പങ്കെടുക്കുന്നതു വീസാ ചട്ടപ്രകാരം നിയമലംഘനമാണ്. പ്രകടനത്തില്‍ പങ്കെടുത്തതിന്റെ അനുഭവത്തെക്കുറിച്ച്‌ 23ന് യാന്‍ മേഥെ ജൊഹാന്‍സന്‍ ഫേസ്ബുക്കില്‍ ചിത്രങ്ങള്‍ സഹിതം കുറിപ്പ് പോസ്റ്റ് ചെയ്തതോടെയാണ് എഫ്‌ആര്‍ആര്‍ഒ അന്വേഷണം ആരംഭിച്ചത്.
തിങ്കളാഴ്ചയാണ് പൗരത്വ ഭേദഗതിക്കെതിരായി ഫോര്‍ട്ട് കൊച്ചിയിലേക്ക് നടന്ന ലോംഗ് മാര്‍ച്ചില്‍ 74കാരിയായ ജാനി പങ്കെടുത്തത്. തൊട്ടുപിന്നാലെയാണ് നടപടി.
Discussion about this post