മലപ്പുറം : മലപ്പുറം ചങ്ങരംകുളത്ത് രണ്ടര വയസ്സുള്ള പെൺകുട്ടി കിണറ്റിൽ വീണു മരിച്ചു. കുട്ടിയുടെ മാതാവ് കുഞ്ഞിനെയും കൂട്ടി ആത്മഹത്യ ചെയ്യാൻ ശ്രമിച്ചതെന്നാണ് കരുതപ്പെടുത്തുന്നത്. മാതാവിനെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. ചങ്ങരംകുളം പേരോത്തയിൽ റഫീഖിന്റെ മകൾ ഇഷ മെഹറിൻ ആണ് മരണപ്പെട്ടത്.
കിണറ്റിൽ നിന്നും കണ്ടെത്തിയ കുട്ടിയുടെ മാതാവ് ഹസീനയെ ഗുരുതര പരിക്കുകളുമായി വളാഞ്ചേരി നടക്കാവിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്ന് രാവിലെയാണ് ഉറങ്ങാൻ കിടന്നിരുന്ന ഹസീനയേയും മകളെയും മുറിയിൽ കാണാതിരുന്നതിനെ തുടർന്ന് ഭർതൃ വീട്ടുകാർ അന്വേഷണം നടത്തിയത്. തുടർന്ന് ഇരുവരെയും കിണറ്റിൽ കണ്ടെത്തുകയായിരുന്നു.
ഫയർഫോഴ്സ് എത്തിയാണ് ഹസീനയെയും മകളെയും കിണറ്റിൽ നിന്നും പുറത്തെടുത്തത്. രണ്ടര വയസ്സുകാരിയായ ഇഷ മെഹറിൻ പുറത്തെത്തുമ്പോഴേക്കും മരണപ്പെട്ടിരുന്നു. ഹസീനയ്ക്ക് ജീവനുണ്ടായിരുന്നതിനാൽ ഉടൻ തന്നെ ആശുപത്രിയിലേക്ക് മാറ്റി. പെരുമ്പടപ്പ് പോലീസ് സ്ഥലത്തെത്തി പരിശോധന നടത്തി. അഞ്ചുവർഷം മുമ്പ് വിവാഹിതയായ ഹസീനയുടെ ഭർത്താവ് റഫീഖ് വിദേശത്താണ് ജോലി ചെയ്യുന്നത്.
Discussion about this post