തിരുവനന്തപുരം: 14-ആം കേരള നിയമസഭയുടെ ബജറ്റ് സമ്മേളനത്തിന് മുന്നോടിയായി ഗവര്‍ണര്‍ നടത്തിയ നയപ്രഖ്യാപനത്തിന്‍മേലുള്ള നന്ദി പ്രമേയ ചര്‍ച്ച നിയമ സഭയില്‍ ഇന്ന് ആരംഭിച്ചു. കൊച്ചിയില്‍ യുവനടിക്കു നേരെ ഉണ്ടായ ആക്രമണം പ്രതിപക്ഷം ഇന്ന് സഭയില്‍ ഉന്നയിച്ചു. നിയമസഭ പ്രക്ഷുബ്ധമായി. നയപ്രഖ്യാപനത്തിന് നന്ദി രേഖപ്പെടുത്താനുള്ള പ്രമേയം എ പ്രദീപ്കുമാര്‍ എംഎല്‍എയാണ് നിയമസഭയില്‍ അവതരിപ്പിക്കുന്നത്.
അതേസമയം സംസ്ഥാനത്തെ ക്രമസമാധാന തകര്‍ച്ചയെച്ചൊല്ലി ചോദ്യോത്തരവേള തടസപ്പെടുത്താന്‍ ശ്രമിച്ച പ്രതിപക്ഷം നിയമസഭയില്‍ നിന്നും ഇറങ്ങിപ്പോയി. നേരത്തെ, എംഎല്‍എമാര്‍ സ്പീക്കറുടെ ഡയസിനുമുന്നില്‍ കൂടിനിന്ന് മുദ്രാവാക്യം വിളിച്ചിരുന്നു. ചോദ്യോത്തരവേള റദ്ദാക്കി കേരളത്തിലെ സ്ത്രീ സുരക്ഷയുമായി ബന്ധപ്പെട്ട വിഷയം ചര്‍ച്ചചെയ്യണമെന്ന് പ്രതിപക്ഷനേതാവ് രമേശ് ചെന്നിത്തല ആവശ്യപ്പെട്ടു.
എന്നാല്‍, ഇത് അനുവദിക്കില്ലെന്ന് സ്പീക്കര്‍ പി. രാമകൃഷ്ണനും വ്യക്തമാക്കി. ശൂന്യവേളയില്‍ അടിയന്തരപ്രമേയത്തിന് നോട്ടിസ് ലഭിച്ചിട്ടുണ്ടെന്നും അപ്പോള്‍ ഇക്കാര്യം പരിഗണിക്കാമെന്നും സ്പീക്കര്‍ വ്യക്തമാക്കി.
ചോദ്യോത്തരവേള ആരംഭിക്കുമ്ബോള്‍ തന്നെ പ്രതിപക്ഷ എംഎല്‍എമാര്‍ എഴുനേറ്റുനിന്ന് പ്രതിഷേധം തുടങ്ങി. കേരളത്തിലെ ക്രമസമാധാന നില തകര്‍ന്നുവെന്നും സ്ത്രീകള്‍ക്ക് സുരക്ഷയില്ലെന്നും ആരോപിച്ചായിരുന്നു പ്രതിപക്ഷത്തിന്റെ പ്രതിഷേധം. പ്രതിപക്ഷനേതാവിനെ സംസാരിക്കാന്‍ അനുവദിക്കണമെന്നാണ് ആവശ്യം. നിയമസഭയ്ക്ക് ഒരു രീതിയുണ്ടെന്നും അതനുസരിച്ച്‌ മാത്രമേ പ്രവര്‍ത്തിക്കാന്‍ സാധിക്കൂവെന്നും സ്പീക്കറും വ്യക്തമാക്കി.
ക്രമസമാധനത്തകര്‍ച്ച, വരള്‍ച്ച, വര്‍ധിച്ചു വരുന്ന രാഷ്ട്രീയ കൊലപാതകങ്ങള്‍, വിജിലന്‍സിനെതിരായുള്ള ഹൈക്കോടതി പരാമര്‍ശങ്ങള്‍, ഉദ്യോഗസ്ഥതല കലഹം തുടങ്ങിയവയെല്ലാം സര്‍ക്കാരിനെതിരെ ആയുധമാക്കി വരും ദിവസങ്ങളില്‍ ആഞ്ഞടിക്കാനുള്ള പുറപ്പാടിലാണു പ്രതിപക്ഷം.
14-ആം കേരള നിയമസഭയുടെ നാലാം സമ്മേളനമാണ് ഇപ്പോള്‍ നടക്കുന്നത്. കഴിഞ്ഞ വ്യാഴാഴ്ചയാണ് ഗവര്‍ണ്ണറുടെ നയപ്രഖ്യാപനത്തോടെ സമ്മേളനം ആരംഭിച്ചത്. ഗവര്‍ണ്ണറുടെ നയപ്രഖ്യാപനത്തിന്‍മേലുള്ള നന്ദി പ്രമേയത്തില്‍ ചര്‍ച്ച ഇന്നും നാളെയുമായി നടക്കും. അടുത്തമാസം മൂന്നാം തിയ്യതിയാണ് ബജറ്റ് അവതരിപ്പിക്കുക. നയപ്രഖ്യാപനദിവസം തന്നെ ബാനറുകളുമായാണ് പ്രതിപക്ഷം സഭയിലെത്തിയത്. വരള്‍ച്ച, റേഷന്‍ സബ്‌സിഡി, നടിക്ക് നേരെയുണ്ടായ ആക്രമണം, ക്രമസമാധാനനില തുടങ്ങി വിവിധ വിഷയങ്ങള്‍ ഉയര്‍ത്തിക്കാട്ടി പ്രതിപക്ഷം സഭയില്‍ പ്രക്ഷോഭം ഉയര്‍ത്താനാണ് സാധ്യത.
അടുത്ത മാസം 16-ആം തിയ്യതി വരെയാണ് 14-ആം കേരള നിയമസഭയുടെ നാലാം സമ്മാളനം നീണ്ടു നില്‍ക്കുക. അടുത്ത സാമ്പത്തികവര്‍ഷത്തേക്കുള്ള വോട്ട് ഓണ്‍ അക്കൗണ്ടും ഈ സാമ്പത്തിക വര്‍ഷത്തെ ഉപധനാഭ്യര്‍ഥനയുടെ അന്തിമ പ്രസ്താവനയും സഭയില്‍ അവതരിപ്പിക്കും.
ആറ്, ഏഴ്, എട്ട് തീയതികളില്‍ ബജറ്റിനെക്കുറിച്ചുള്ള പൊതുചര്‍ച്ച നടക്കും. ഒമ്പതിന് ഉപധനാഭ്യര്‍ഥനയില്‍ ചര്‍ച്ചയും വോട്ടെടുപ്പും നടക്കും. 14ന് വോട്ട് ഓണ്‍ അക്കൗണ്ടില്‍ ചര്‍ച്ചയും വോട്ടെടുപ്പും നടക്കും. 15നാണ് ധനവിനിയോഗ ബില്‍ പരിഗണിക്കുക.
Discussion about this post