തിരുവനന്തപുരം: ടി.പി സെന്കുമാറിനെ ക്രമസമാധാന ചുമതലയുള്ള ഡി.ജി.പി സ്ഥാനത്ത് നിന്നും മാറ്റിയത് യോഗ്യത ഇല്ലാത്തത് കൊണ്ടാണെന്ന് മുഖ്യമന്ത്രി പിണറായി വിജയന്. സെന്കുമാറിനെ മാറ്റിയത് ജിഷ കേസിലെ വീഴ്ചയുമായി ബന്ധപ്പെട്ടല്ല. സെന്കുമാറിന്റെ ഇപ്പോഴത്തെ ചെയ്തികള് ഇത് ശരിയാണെന്നാണ് തെളിയിക്കുന്നതെന്നും മുഖ്യമന്ത്രി നിയമസഭയില് പറഞ്ഞു.
സെന്കുമാറിനെ മാറ്റിയതിനെ സുപ്രീംകോടതി കഴിഞ്ഞ ദിവസം വിമര്ശിച്ചിരുന്നു. വ്യക്തി താല്പര്യങ്ങള് പരിഗണിച്ചാണു സര്ക്കാര് നടപടിയെടുത്തതെന്നു സുപ്രീം കോടതി നിരീക്ഷിച്ചു. മാധ്യമവാര്ത്തകളുടെ അടിസ്ഥാനത്തിലല്ല സര്ക്കാര് നടപടിയെടുക്കേണ്ടത്. ഇങ്ങനെ നടപടിയെടുത്താല് പൊലീസ് ആസ്ഥാനത്ത് ആരും കാണില്ലെന്നും സുപ്രീം കോടതി അഭിപ്രായപ്പെട്ടു. ഈ മാസം 27നകം ഇക്കാര്യത്തില് സര്ക്കാര് വിശദീകരണം നല്കണമെന്നും സുപ്രീം കോടതി ആവശ്യപ്പെട്ടിട്ടുണ്ട്. കേരളത്തിലെ പൊലീസ് മേധാവി സ്ഥാനത്തുനിന്നു തന്നെ മാറ്റിയതു ശരിവച്ച ഹൈക്കോടതി ഉത്തരവു ചോദ്യം ചെയ്ത് ഡിജിപി ടി.പി. സെന്കുമാര് നല്കിയ ഹര്ജി പരിഗണിക്കുമ്പോഴായിരുന്നു കോടതിയുടെ പരാമര്ശങ്ങള്.
പ്രധാനമായും ജിഷ കേസില് പ്രതികളെ പിടികൂടാന് ആയില്ല എന്ന കാരണമായിരുന്നു സെന്കുമാറിനെ ക്രമസമാധാന ചുമതലയില് നിന്നും മാറ്റിയതിനുളള കാരണമായി പിണറായി സര്ക്കാര് അധികാരത്തില് വന്ന ആദ്യ ഘട്ടം മുതല് പറഞ്ഞിരുന്നത്. ഇത് തിരുത്തിയാണ് ഇപ്പോള് യോഗ്യതയില്ലാത്തത് കൊണ്ടാണ് മാറ്റിയതെന്ന് മുഖ്യമന്ത്രി സഭയെ അറിയിച്ചിരിക്കുന്നത്.
ഡി.ജി.പി സ്ഥാനത്ത് നിന്നും മാനദണ്ഡങ്ങള് പാലിക്കാതെയാണ് സര്ക്കാര് തന്നെ മാറ്റിയതെന്നും നടപടി സി.പി.എമ്മിന്റെ പകപോക്കല് രാഷ്ട്രീയത്തിന്റെ ഭാഗമായിരുന്നുവെന്നും സെന്കുമാര് ആരോപിച്ചിരുന്നു. തനിക്കെതിരെയുള്ള സര്ക്കാര് നടപടി ചോദ്യം ചെയ്ത് കൊണ്ട് സുപ്രീകോടതിയെയും സെന്കുമാര് സമീപിച്ചിരുന്നു. വിഷയത്തില് സുപ്രീംകോടതി സര്ക്കാരിനെതിരെ കഴിഞ്ഞദിവസം രൂക്ഷ വിമര്ശനവും ഉന്നയിച്ചിരുന്നു. ഈ സാഹചര്യത്തിലാണ് നടപടിയെ ന്യായീകരിച്ച് കൊണ്ട് മുഖ്യമന്ത്രി രംഗത്തെത്തിയിരിക്കുന്നത്.
സെന്കുമാര് ബിജെപി ചായ്വു കാട്ടുകയാണെന്ന സൂചന നല്കി മുഖ്യമന്ത്രി പിണറായി വിജയന് നേരത്തെയും നിയമസഭയില് പ്രസ്താവന നടത്തിയിരുന്നു. ഡിജിപി സ്ഥാനത്തിനു യോജിക്കുന്ന രീതിയിലല്ല ടി.പി. സെന്കുമാറിന്റെ പ്രവര്ത്തനമെന്നായിരുന്നു പിണറായിയുടെ പരാമര്ശം. അദ്ദേഹം സര്ക്കാരിനെ ആക്ഷേപിക്കാനും അപകീര്ത്തിപ്പെടുത്താനും ശ്രമിക്കുന്നു. പ്രതിപക്ഷം അതിനു തുനിയുന്നതു മനസ്സിലാക്കാം. എന്നാല് ഒരു സര്ക്കാര് ഉദ്യോഗസ്ഥനാണു രാഷ്ട്രീയം കളിക്കുന്നത്. സെന്കുമാര് പുതിയ താവളം തേടുകയാണെന്നും മുഖ്യമന്ത്രി സൂചന നല്കിയിരുന്നു.
Discussion about this post