തിരുവനന്തപുരം: നിയമസഭയില്‍ അമ്പത് വര്‍ഷം തികയ്ക്കുന്ന മുന്‍ മന്ത്രിയും കേരളാ കോണ്‍ഗ്രസ് (എം) ചെയര്‍മാനുമായ കെ.എം.മാണിയ്ക്ക് നിയമസഭയുടെ ആദരം. ഇന്ന് രാവിലെ ചോദ്യോത്തരവേളയ്ക്ക് ശേഷമാണ് നിയമസഭ മാണിയെ അഭിനന്ദിക്കുകയും ആദരിക്കുകയും ചെയ്തത്. മുഖ്യമന്ത്രി പിണറായി വിജയന്‍, സ്പീക്കര്‍ പി ശ്രീരാമകൃഷ്ണന്‍, പ്രതിപക്ഷ അംഗങ്ങളും മാണിക്ക് ആദരവ് അര്‍പ്പിച്ച് സംസാരിച്ചു.
മുഖ്യമന്ത്രി പിണറായി വിജയന്‍ മാണിയെ അഭിനന്ദിച്ചു കൊണ്ട് പ്രമേയം അവതരിപ്പിച്ചു. ലോക പാര്‍ലമെന്ററി ചരിത്രത്തില്‍ തന്നെ അപൂര്‍വമായ ബഹുമതിയാണ് മാണിക്ക് ലഭിച്ചിരിക്കുന്നതെന്ന് മുഖ്യമന്ത്രി പറഞ്ഞു. രാഷ്ട്രീയത്തില്‍ ആര്‍ക്കും മാറ്റി നിറുത്താനാവാത്ത പ്രമാണിയാണ് മാണിയെന്നും അദ്ദേഹം പറഞ്ഞു.
സ്വന്തമായി പ്രത്യയശാസ്ത്രം സൃഷ്ടിച്ച വ്യക്തിയാണ് മാണിയെന്ന് സ്പീക്കര്‍ പി.ശ്രീരാമകൃഷ്ണന്‍ പറഞ്ഞു. പുതിയ സാമാജികര്‍ക്കുള്ള പാഠശാലയാണ് മാണിയെന്നും സ്പീക്കര്‍ പറഞ്ഞു.
നിയമസഭ തന്റെ അമ്മത്തൊട്ടിലാണെന്ന് മാണി പറഞ്ഞു. തനിക്ക് ആരോടും ഒരു വിരോധവും ഇല്ല. ഒരാളെയും താന്‍ നുള്ളി നോവിക്കുക പോലും ചെയ്തിട്ടില്ല. തന്നോട് കാണിക്കുന്ന സ്‌നേഹത്തിന് നന്ദിയുണ്ടെന്നും അദ്ദേഹം പറഞ്ഞു.
Discussion about this post