കോഴിക്കോട്: ജിഷ്ണു പ്രണോയിയുടെ സഹോദരി അവിഷ്ണ വീട്ടില്‍ നിരാഹാരസമരം തുടങ്ങി. അമ്മയും അച്ഛനും വീട്ടില്‍ മടങ്ങിയെത്തും വരെ സമരം തുടരുമെന്ന് അവിഷ്ണ പറഞ്ഞു. തന്റെ അമ്മയെ മര്‍ദ്ദിക്കാനുളള താത്പര്യം എന്തുകൊണ്ട് പ്രതികളെ പിടിക്കാന്‍ പൊലീസ് കാണിച്ചില്ലെന്നും ജിഷ്ണുവിന്റെ സഹോദരി ചോദിക്കുന്നു.
നെഹ്‌റു ഗ്രൂപ്പ് ചെയര്‍മാന്‍ കൃഷ്ണദാസിനോടുളള അതേ വിരോധം പൊലീസുകാരോട് ഉണ്ടെന്നും അവിഷ്ണ വ്യക്തമാക്കി. കഴിഞ്ഞ വിഷുവിന് മുഖ്യമന്ത്രി പിണറായിയുടെ ചിത്രമാണ് തന്റെ ചേട്ടന്‍ കണി കണ്ടത്. പൊലീസ് അതിക്രമത്തെ ന്യായീകരിച്ചത് ശരിയല്ല. ചേട്ടന്‍ വിശ്വസിച്ച പ്രസ്ഥാനത്തിലെ ചില നേതാക്കള്‍ പൊലീസ് മര്‍ദനത്തെ ന്യായീകരിക്കുന്നതില്‍ വിഷമമുണ്ടെന്നും ജിഷ്ണുവിന്റെ സഹോദരി പറഞ്ഞു. പൊലീസ് മര്‍ദിച്ചതിനെ തുടര്‍ന്ന് തിരുവനന്തപുരം മെഡിക്കല്‍ കോളെജ് ആശുപത്രിയില്‍ നിരാഹാരം നടത്തുകയാണ് ജിഷ്ണു പ്രണോയിയുടെ അമ്മയും ബന്ധുക്കളും.
ഇതിനിടെ സര്‍ക്കാരിനെതിരെ അല്ല പോലിസിനെതിരെയാണ് പ്രതിഷേധമെന്ന് അമ്മ മഹിജയും പറഞ്ഞു. നീതി കിട്ടും വരെ സമരം തുടരും.ജിഷ്ണു ആഗ്രഹിച്ച സര്‍ക്കാരാണ് അധികാരത്തില്‍. അതുകൊണ്ട് എതിരൊന്നും പറയുന്നില്ല. തന്നെ മര്‍ദ്ദിച്ചവര്‍ക്കെതിരെ മുഖ്യമന്ത്രിയ്ക്ക് പരാതി നല്‍കുമെന്നും മഹിജ പറഞ്ഞു
ജിഷ്ണു പ്രണോയ് മരിച്ച് എണ്‍പത് ദിവസം പിന്നിട്ടിട്ടും പ്രതികളെ അറസ്റ്റ് ചെയ്യാത്ത പൊലീസ് നടപടിയില്‍ പ്രതിഷേധിച്ചാണ് കുടുംബം ഏപ്രില്‍ ആറിന് നിരാഹാരസമരം നടത്താനായി പൊലീസ് ആസ്ഥാനത്ത് എത്തിയത്. എന്നാല്‍ അതീവ സുരക്ഷാ മേഖലയാണ് ഡിജിപിയുടെ ഓഫിസെന്ന് വ്യക്തമാക്കി പൊലീസ് ജിഷ്ണുവിന്റെ ബന്ധുക്കള്‍ക്കെതിരെ അതിക്രമം കാട്ടുകയായിരുന്നു. ജിഷ്ണുവിന്റെ അമ്മ മഹിജയെ പൊലീസ് ബലം പ്രയോഗിച്ച് വലിച്ചിഴച്ചാണ് അറസ്റ്റ് ചെയ്തു നീക്കിയത്. തനിക്ക് മര്‍ദനമേറ്റതായി ജിഷ്ണുവിന്റെ അമ്മ മഹിജയും അമ്മാവന്‍ ശ്രീജിത്തും ആരോപിച്ചിരുന്നു.ഇതിനെതിരെ കടുത്ത പ്രതിഷേധമാണ് പൊതുസമൂഹത്തില്‍ നിന്നും ഉയര്‍ന്നത്. തുടര്‍ന്ന് സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ ഐജിയോട് ഡിജിപി ലോക്‌നാഥ് ബെഹ്‌റ നിര്‍ദേശിച്ചിരുന്നു.
Discussion about this post