ഡല്‍ഹി: എന്‍ഡിഎയുടെ ഉപരാഷ്ട്രപതി സ്ഥാനാര്‍ത്ഥിയായി തന്നെ തെരഞ്ഞെടുത്തത് വലിയ അംഗീകാരമാണെന്ന് മുന്‍ കേന്ദ്രമന്ത്രി എം വെങ്കയ്യ നായിഡു. തന്നെ ഏല്‍പ്പിച്ചിരിക്കുന്നത് വലിയ ഉത്തരവാദിത്വമാണെന്നും ഉപരാഷ്ട്രപതിയായി തെരഞ്ഞെടുത്താല്‍ ആ സ്ഥാനത്തോട് നീതി പുലര്‍ത്താന്‍ കഴിയുമെന്ന് പൂര്‍ണവിശ്വാസമുണ്ടെന്നും അദ്ദേഹം പറഞ്ഞു. ഉപരാഷ്ട്രപതി തെരഞ്ഞെടുപ്പിനായി മന്ത്രിസ്ഥാനം രാജിവെച്ച ശേഷം സംസാരിക്കുകയായിരുന്നു വെങ്കയ്യ നായിഡു.
‘കഴിഞ്ഞ നാലുദശകത്തിലേറെയായി സജീവ രാഷ്ട്രീയപ്രവര്‍ത്തനത്തിലുണ്ട്. വൈസ് പ്രസിഡന്റ് ഓഫീസ് എന്നത് വളരെ വ്യത്യസ്തമായ ഒരു സ്ഥാനമാണ്. അതിന് അതിന്റേതായ പ്രവര്‍ത്തന മാനദണ്ഡങ്ങള്‍ ഉണ്ട്. ആ സ്ഥാനത്തോട് നീതി പുലര്‍ത്താന്‍ കഴിയുമെന്നാണ് വിശ്വസിക്കുന്നത്’. വെങ്കയ്യ പറഞ്ഞു. ‘പാര്‍ലമെന്ററി ജനാധിപത്യ സംവിധാനത്തിലാണ് ഇന്ത്യയുടെ ശക്തിയും സൗന്ദര്യവും. അത് കൂടുതല്‍ ശക്തമാക്കുക എന്ന ദൗത്യമാണ് എനിക്ക് ഇനി ഉണ്ടാവുക. ഉപരാഷ്ട്രപതിയായി തെരഞ്ഞെടുക്കപ്പെടുകയാണെങ്കില്‍ എന്റെ മുന്‍ഗാമികള്‍ കാത്തുസൂക്ഷിച്ച അതിന്റെ പാരമ്പര്യവും മഹത്വവും ഞാന്‍ ഉയര്‍ത്തിപ്പിടിക്കും’. അദ്ദേഹം പ്രതികരിച്ചു.
‘വളരെ ചെറിയ പ്രായത്തില്‍ തന്നെ എനിക്ക് അമ്മയെ നഷ്ടപ്പെട്ടതാണ്. പിന്നീട് എന്റെ പാര്‍ട്ടിയെയാണ് അമ്മയായി കണ്ടത്. ആ പാര്‍ട്ടിയാണ് എന്നെ ഈ നിലയിലേക്ക് ഉര്‍ത്തിയത്. പാര്‍ട്ടിയെ ഉപേക്ഷിക്കുക എന്നത് വളരെ വേദനാജനകമാണ്’. പാര്‍ട്ടിയെ ഉപേക്ഷിക്കേണ്ടി വരുന്നത് സംബന്ധിച്ച് വളരെ വൈകാരികമായ് അദ്ദേഹം പ്രതികരിച്ചു.
Discussion about this post