കണ്ണൂര്‍: സിപിഎമ്മിനെതിരെ രാജ്യവ്യാപക പ്രക്ഷോഭമെന്ന് ബിജെപി ദേശീയ അദ്ധ്യക്ഷന്‍ അമിത് ഷാ. രാഷ്ട്രീയ കൊലപാതകങ്ങളുടെ ഉത്തരവാദി മുഖ്യമന്ത്രിയെന്നും അദ്ദേഹം പറഞ്ഞു. 84 മരണങ്ങള്‍ക്ക് പിണറായിയാണ് ഉത്തരവാദിയെന്നും ബിജെപി ദേശീയ അദ്ധ്യക്ഷന്‍ വ്യക്തമാക്കി. പയ്യന്നൂരില്‍ ജനരക്ഷാ യാത്ര ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഡല്‍ഹിയില്‍ നാളെ മുതല്‍ 17 വരെ എകെജി ഭവനിലേക്ക് മാര്‍ച്ച് നടത്തും. എല്ലാ സംസ്ഥാന തലസ്ഥാനങ്ങളിലും യുവമോര്‍ച്ചയുടെ പ്രതിഷേധം സംഘടിപ്പിക്കുമെന്നും അദ്ദേഹം പറഞ്ഞു.
സിപിഎമ്മിന്‍റെ അക്രമത്തിനെതിരെ രാജ്യം ഒറ്റക്കെട്ടായി പ്രവര്‍ത്തിക്കും. സമാധാനത്തിന്‍റെ ഭൂമിയില്‍ സിപിഎം അസ്വസ്ഥത സൃഷ്ടിക്കുന്നു. സിപിഎം അധികാരത്തില്‍ വരുമ്പോള്‍ അക്രമം പതിവ്. രാഷ്ട്രീയ കൊലപാതകങ്ങള്‍ക്ക് മുഖ്യമന്ത്രി ഉത്തരം പറയണം.
കേരളത്തിലെ അക്രമങ്ങള്‍ക്ക് നേതൃത്വം നല്‍കുന്ന മുഖ്യമന്ത്രിയുടെ ജില്ലയാണ്. ഏറ്റവും കൂടുതല്‍ ബിജെപി ആര്‍എസ്എസ് പ്രവര്‍ത്തകര്‍ കൊല്ലപ്പെട്ട ജില്ലയാണിത്. അതുകൊണ്ടാണ് കണ്ണൂര്‍ ജില്ലയില്‍ നിന്ന് പദയാത്ര നടത്താന്‍ തീരുമാനിച്ചത്. കേരളത്തില്‍ അക്രമത്തിന്റെ ചെളിക്കുണ്ട് സൃഷ്ടിക്കാന്‍ സിപിഎം എത്ര ശ്രമിച്ചാലും ആ ചെളിക്കുണ്ടില്‍നിന്ന് താമര ഉയര്‍ന്നുവരും- അമിത്ഷാ പറഞ്ഞു.
പയ്യന്നൂരില്‍ ജനരക്ഷായാത്രയുടെ ഉദ്ഘാടനം കുമ്മനം രാജശേകരന് കുങ്കുമഹരിത പതാക കൈമാറി അമിത് ഷാ നിര്‍വ്വഹിച്ചു. ജിഹാദി-ചുവപ്പ് ഭീകരതയ്ക്കെതിരെയാണ് ജനരക്ഷായാത്ര. പദയാത്രയിലും അമിത് ഷാ പങ്കെടുക്കും.
ബിജെപി നേതാക്കളായ കുമ്മനം രാജശേഖരന്‍, അല്‍ഫോണ്‍സ് കണ്ണന്താനം, സുരേഷ് ഗോപി, രാജീവ് ചന്ദ്രശേഖരന്‍ തുടങ്ങിയവരും ഉദ്ഘാടന സമ്മേളനത്തില്‍ പങ്കെടുത്തു.
രാവിലെ അമിത്ഷാ തളിപ്പറമ്പ് രാജ രാജേശ്വര ക്ഷേത്രത്തില്‍ ദര്‍ശനം നടത്തിയിരുന്നു. രാവിലെ പത്തരയോടെ ബിജെപി സംസ്ഥാന പ്രസിഡന്റ് കുമ്മനം രാജശേഖരന്‍, കെ.സുരേന്ദ്രന്‍ തുടങ്ങിയ നേതാക്കന്‍മാരോടൊപ്പം ക്ഷേത്രത്തിലെത്തിയ അമിത്ഷാ പൊന്നിന്‍കുടം വെച്ച് തൊഴുതു.
ആദ്യദിവസം പയ്യന്നൂര്‍മുതല്‍ പിലാത്തറവരെയാണ് യാത്ര. ഈ പദയാത്രയില്‍ അമിത്ഷാ പങ്കെടുക്കും. ഹരിയാനയില്‍ നിന്നുള്ള എം.പി.മാരും എം.എല്‍.എമാരും നേതാക്കളും അടങ്ങുന്ന നൂറ് പേര്‍ ആദ്യ ദിവസത്തെ പദയാത്രയില്‍ പങ്കെടുക്കുന്നുണ്ട്. ഓരോ ദിവസവും വിവിധ സംസ്ഥാനങ്ങളില്‍നിന്നുള്ള സംഘം പദയാത്രയില്‍ അണിചേരും. 300 സ്ഥിരാംഗങ്ങള്‍ ജാഥയില്‍ ഉണ്ടാകും.
സംസ്ഥാന ജനറല്‍ സെക്രട്ടറിമാരായ കെ.സുരേന്ദ്രന്‍, ശോഭ സുരേന്ദ്രന്‍, എ.എന്‍.രാധാകൃഷ്ണന്‍, എം.ടി.രമേശ് എന്നിവര്‍ യാത്രയിലുണ്ട്. യാത്രാ നായകന്‍ കുമ്മനം രാജശേഖരന്‍ തിങ്കളാഴ്ച രാവിലെ മുതല്‍ തന്നെ പയ്യന്നൂരിലുണ്ട്. കാസര്‍കോട് ജില്ലയില്‍നിന്നുള്ളവര്‍ ആദ്യദിവസം പയ്യന്നൂര്‍ മുതല്‍ പിലാത്തറ വരെയുള്ള യാത്രയില്‍ പങ്കെടുക്കും. പയ്യന്നൂര്‍ ശ്രീപ്രഭാ ഓഡിറ്റോറിയത്തില്‍ 10,000 പേര്‍ക്ക് ഉച്ചഭക്ഷണമൊരുക്കും. ദൂരെനിന്ന് എത്തുന്ന പ്രവര്‍ത്തകര്‍ക്കുവേണ്ടിയാണിത്. 20 കൗണ്ടറുകളിലായി വെജിറ്റബിള്‍ ബിരിയാണിയാണ് വിതരണം ചെയ്യുക.
പയ്യന്നൂര്‍ ടൗണിലെ മൂന്ന് കേന്ദ്രങ്ങളില്‍നിന്ന് തുടങ്ങി സെന്‍ട്രല്‍ ബസാറില്‍ സംഗമിച്ചാണ് ജാഥ പ്രയാണം തുടങ്ങുക. പയ്യന്നൂരില്‍നിന്ന് ആരംഭിക്കുന്ന യാത്ര ഏഴിലോട്ട് അരമണിക്കൂര്‍ വിശ്രമിക്കും. ആറുമണിക്ക് പിലാത്തറയിലെത്തുകയും തുടര്‍ന്ന് പൊതുയോഗം നടക്കും.
Discussion about this post