ഡല്ഹി: എറണാകുളം ജംഗ്ഷന് ഉള്പ്പെടെ രാജ്യത്തെ 10 റെയില്വേ സ്റ്റേഷനുകള് വിമാനത്താവള മാതൃകയില് വികസിപ്പിക്കാനൊരുങ്ങി ഇന്ത്യന് റെയില്വേ. നഗരവികസന മന്ത്രാലയത്തിനു കീഴിലുള്ള നാഷനല് ബില്ഡിങ് കണ്സ്ട്രക്ഷന് കോര്പറേഷനുമായി ഒപ്പിട്ട കരാറിന്റെ തുടര്ച്ചയായാണു നടപടി.
എറണാകുളത്തിനൊപ്പം ഡല്ഹി സരായ് രോഹില, ലക്നൗ, ഗോമതി നഗര്, കോട്ട, തിരുപ്പതി, നെല്ലൂര്, പുതുച്ചേരി, മഡ്ഗാവ്, താനെ എന്നിവയാണു പദ്ധതിയിലുള്ള മറ്റ് സ്റ്റേഷനുകള്. റെയില്വേ സ്റ്റേഷനുകളെ രാജ്യാന്തര നിലവാരത്തിലുയര്ത്താനുള്ള പദ്ധതിയില് ആദ്യഘട്ടത്തില് കേരളത്തില് നിന്നു കോഴിക്കോട് സ്റ്റേഷനാണുണ്ടായിരുന്നത്. സ്വകാര്യ സംരംഭകരെ പങ്കെടുപ്പിച്ചു സ്റ്റേഷന് വികസനം നടപ്പാക്കാന് ടെന്ഡര് നടപടികള് പൂര്ത്തിയായെങ്കിലും പദ്ധതി മുന്നോട്ടു പോയിട്ടില്ല.
അതേസമയം കേന്ദ്ര ഏജന്സിയായ എന്ബിസിസി നടപ്പാക്കുന്ന സ്റ്റേഷന് വികസന മാതൃകയാകും മറ്റിടങ്ങളിലേക്കു വ്യാപിപ്പിക്കുക.
ഡിസംബര് അവസാനത്തോടെയോ അടുത്ത വര്ഷമാദ്യമോ നിര്മാണ ജോലി ആരംഭിക്കും. രണ്ടര വര്ഷത്തിനുള്ളില് പദ്ധതി പൂര്ത്തികരിക്കാനാണു എന്ബിസിസി ലക്ഷ്യമിടുന്നത്. ഇതിനുള്ള സമയപരിധി 2020 ആയി കേന്ദ്ര സര്ക്കാര് നിശ്ചയിച്ചു.
Discussion about this post